ބެލްޖިއަމްގެ ޤައުމީ ޓީމަށް ޑިފެންޑަރު ޔޭން ވާޓޮންގެން 100 މެޗު ހަމަކުރިއިރު، ކެޕްޓަން ވިންސެންޓް ކޮމްޕެނީއަށް އަނިޔާވެއްޖެއެވެ.
މި މަހުގެ 14 ވަނަ ދުވަހު ފަށާ ވޯލްޑް ކަޕަށް ތައްޔާރުވާން ކުޅުނު މެޗުގައި ރޭ ޕޯޗުގަލްއާ ވާދަކޮށް ލަނޑެއް ނުޖެހި އެއްވަރުވި މެޗުގެ ފުރަތަމަ 10 މިނިޓަށް ފަހު ކޮމްޕެނީ ވަނީ ބަދަލުކޮށްފައެވެ.
"އޭނާ އަށް އަނިޔާވެގެން ކުޅެން އުނދަގޫވާތީ ބޭލީ. އަހަރުމެން ޖެހޭނީ އޭނާގެ އަނިޔާގެ މިންވަރު ޓެސްޓް ހަދައި ދެނެގަންނަން،" މެޗަށްފަހު ކޯޗު ރޮބާޓޯ މާޓިނޭޒް ބުންޏެވެ.
ކޮމްޕެނީ އަކީ ފާއިތުވެދިޔަ ފަސް އަހަރު ވެސް އަނިޔާގެ މައްސަލަ ގިނަގިނައިން ކުރިމަތިވެފައިވާ ކުޅުންތެރިއެކެވެ. ނަމަވެސް މިދިޔަ ޖެނުއަރީ މަހަށް ފަހު މިއީ އޭނާއަށް މިފަދަ އަނިޔާއެއް ކުރިމަތިވި ފުރަތަމަ ފަހަރެވެ. ކޮމްޕެނީގެ އަނިޔާ ސީރިއަސް ވެއްޖެނަމަ އެއީ ޓީމަށް ކުރިމަތިވާނެ ފޫބައްދަން އުނދަގޫ މައްސަލައެއް ކަމަށް ކޯޗު ވަނީ އެއްބަސްވެފައެވެ. ބެލްޖިއަމް ޓީމުގެ ސެންޓްރަލް ތިން ޑިފެންޑަރުންގެ ތެރެއިން ބާސެލޯނާގެ ތޯމަސް ވަލާމަންއަކީ ވެސް މި ސީޒަނުގައި ވަރަށް ގިނަގިނައިން އަނިޔާގެ މައްސަލަ ކުރިމަތިވެފައިވާ ޑިފެންޑަރެކެވެ.
ޗުއްޓީ ދީފައިވާތީވެ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ރޭގެ މެޗުގައި ނުކުޅެއެވެ. އަދި ޓޮޓެންހަމުގެ ޑިފެންޑަރު ވާޓޮންގެން ވެފައިވަނީ ބެލްޖިއަމުގެ ޤައުމީ ޓީމަށް މިހާތަނަށް 100 މެޗު ހަމަކުރި ފުރަތަމަ ކުޅުންތެރިޔާ އަށެވެ.
މެޗަށް ފަހު އޭނާ ބުނީ "މިއީ ރެކޯޑެއް ނަމަވެސް އެކަމާމެދު ނުވިސްނަން،" ކަމަށެވެ. އަދި ބޭނުންވަނީ ވޯލްޑް ކަޕުގައި ރަނގަޅު ނަތީޖާއެއް ހޯދަން ކަމަށެވެ.
ބެލްޖިއަމް ހިމެނެނީ އިނގިރޭސިވިލާތާއިއެކު ގްރޫޕް ޖީގަ އެވެ.