އަނިޔާއިން މުޅިން ރަނގަޅު ވެގެން ކެޕްޓަން އަދި ގޯލްކީޕަރު މެނުއަލް ނޯޔާ އެނބުރި އައިސް ކުޅުނު ފުރަތަމަ މެޗުން ޖަރުމަނު ރޭ ބަލިވެއްޖެއެވެ.
މި މަހުގެ 14 ވަނަ ދުވަހު ފަށާ ވޯލްޑް ކަޕަށް ތައްޔާރުވުމަށް ކުޅުނު އެކުވެރިކަމުގެ މެޗުގައި އެންމެ ފަހުގެ ޗެމްޕިއަން ޖަރުމަނު ބަލިވީ ވޯލްޑްކަޕަށް ކޮލިފައިނުވާ ޤައުމެއް ކަމަށްވާ އޮސްޓްރިއާއާ ވާދަކޮށް 2-1 ނެވެ.
މެސުޓް އޮޒިލް ގޯލު ޖަހާފައިވަނިކޮށް ޖަރުމަނު ބަލިވި މެޗަށް ފަހު ކޯޗު ޖޯހިމް ލޯ ބުނީ ބަލިވުމަކީ މައްސަލައެއްނޫން ކަމަށެވެ.
"ބަލިވި ގޮތް މައްސަލައަކީ. އަހަރުމެންނަށް ފުރަތަމަ 20 މިނިޓަށް ފަހު މެޗުތެރޭގައެއްނޫން ތިބެވުނީ. އޭގެ ސަބަބުން ބަލިވީ. އަހަރުމެން ހަދަން ނުޖެހޭ ގޯސްތަކެއް ހެދުނު. މެޗުގެ ބޮޑު ބައި ކޮންޓްރޯލްކުރީ އެމީހުން. މިއީ މައްސަލައަކީ،" ކޯޗު ބުންޏެވެ.
މިއީ މިދިޔަ ސެޕްޓެމްބަރު މަހު ފަޔަށް ލިބުނު އަނިޔާއަށް ފަހު ކީޕަރު މެނުއަލް ނޯޔާ ކުޅުނު ފުރަތަމަ މެޗެވެ. މެޗުގެ ކުރީކޮޅު ކޮންމެވެސް ވަރަކަށް ހާސްވެފައި ހުރި ނަމަވެސް އޭނާ ވަނީ އާދައިގެ ކުޅުމެއް ދައްކާފައެވެ. ކޯޗު ޖޯހިމް ލޯ ބުނީ ނޯޔާ ޖަރުމަނު ޓީމާއެކު ވޯލްޑް ކަޕަށްދާނަމަ އޭނާ އަކީ އެއްވަނަ ކީޕަރު ކަމަށެވެ. ނަމަވެސް ޓީމު އަދި މުޅިން ފައިނަލް ނުކުރެ އެވެ.