މިކުންފުންޏާ މެދު ހަޤީޤަތާ ޚިލާފު ވާހަކަތައް ފަތުރާ ފަރާތްތަކާމެދު ފިޔަވަޅު އަޅާނަން - ސްޓެލްކޯ
ސްޓެލްކޯއިން ފޯރުކޮށްދޭ ޚިދުމަތްތަކަށް ރައްދުވާގޮތަށް ޞައްޙަ ނޫން ލިޔުންތަކާއި ޚަބަރުތައް ބައެއް ފަރާތްތަކުން ފަތުރަމުންދާކަމަށާއި، އެ ކުންފުނީގެ ތަޞައްވުރު ގެއްލޭގޮތަށް ހަޤީޤަތާ ޚިލާފު ވާހަކަތައް ޝާއިޢުކޮށް ނުފެތުރުމަށް ސްޓެލްކޯއިން އިލްތިމާސްކޮށްފިއެވެ.
ސްޓެލްކޯއިން ޢާއްމުކޮށްފައިވާ އިޢުލާނެއްގައި ބުނެފައިވަނީ އެކުންފުނިން އާއްމުންނަށް ފޯރުކޯށްދޭ ޚިދުމަތްތަކާގުޅޭ ގޮތުން ޞައްޙަ ނޫން މަޢުލޫމާތު ބައެއް ފަރާތްތަކުން ފަތުރަމުންދާކަން އެކުންފުންޏަށް ފާހަގަކުރެވިފައިވާކަމަށެވެ. އަދި އެކަމުގެ ސަބަބުން ސްޓެލްކޯއިން ފޯރުކޮށްދޭ ޚިދުމަތްތަކާމެދު ކަސްޓަމަރުންގެ މެދުގައި އޮންނަ އިތުބާރަށް ހީނަރުކަން އައުމާއި، ޚިދުމަތް ފޯރުކޮށްދިނުމުގައި ދަތިތަކާ ކުރިމަތިވާކަމަށެވެ.
ރާއްޖޭގެ ރައްޔިތުންނަށް ބޭނުންވާ ކަރަންޓުގެ ޚިދުމަތް ފޯރުކޮށްދިނުމަށް ކުރަމުންދާ މަސައްކަތްތަކަށް ދަތިތަކާ ކުރިމަތިކުރުވުމަކީ ބަލައިގަންނާނެކަމެއް ނޫންކަމަށާ، އެގޮތަށް ޢަމަލުކުރާ ފަރާތްތަކާމެދު ފިޔަވަޅު އަޅާނެކަމަށްވެސް ސްޓެލްކޯއިން ޢާއްމުކޮށްފައިވާ ބަޔާނުގައި ބުނެފައިވެއެވެ. އަދި އެކުންފުނިން ދެމުންދާ ޚިދުމަތްތަކާމެދު ހިތްހަމަނުޖެހޭނަމަ ނުވަތަ ކަމަކާގުޅޭގޮތުން ޞައްޙަ މަޢުލޫމާތު ހޯދުމަށް ސީދާ ކުންފުންޏާ ގުޅައިގެން ސާފުކުރުމަށާއި، އެފަދަ ކަމެއްގައި ކުންފުންޏަށް ހުށަހަޅައި ޙައްލެއް ހޯދުމަށް ނުވަތަ ޙައްލެ ނުލިބުނު ކަމުގައި ވީނަމަވެސް، އެކަމާގުޅޭ ތެދު މަޢުލޫމާތު ފެތުރުމަށްވެސް ސްޓެލްކޯއިން ވަނީ އިލްތިމާސްކޮށްފައެވެ.
ސްޓެލްކޯއަކީ ރާއްޖޭގެ ރައްޔިތުންނަށް ބޭނުންވާ އަސާސީ ޚިދުމަތްތަކުގެ ތެރެއިން ކަރަންޓުގެ ޚިދުމަތް އެންމެ ފުޅާ ދާއިރާއެއްގައި ދެމުން އަންނަ ކުންފުންޏެވެ.