ދަރުމަވަންތަ ހޮސްޕިޓަލްގެ މަސައްކަތް ކުރާ ކުންފުންޏަށް ޕަބްލިކް ސަރވިސް ޑިވެލޮޕްމަންޓްގެ އެވޯޑު
"އިންޓަރނޭޝަނަލް ޕްރޮޕަޓީ އެވޯޑްސް"ގެ އޭޝިއާ ޕެސިފިކް ސަރަޙައްދުގެ އެންމެ މޮޅު ޕަބްލިކް ސަރވިސް ޑިވެލޮޕްމަންޓްގެ އެވޯޑް، ރާއްޖޭގެ ދަރުމަވަންތަ ހޮސްޕިޓަލުގެ މަސައްކަތް ކުރާ ކުންފުނިކަމަށްވާ ޝެންހުއާ ކޮންސްޓްރަކްޝަނަށް ލިބިއްޖެއެވެ.
އިންޓަރނޭޝަނަލް ޕްރޮޕަޓީ އެވޯޑްސްއަކީ ޢިމާރާތްކުރުމުގެ ދާއިރާއިން ދުނިޔޭގެ ފެންވަރުގައި ދެވޭ އެންމެ ޝަރަފުވެރި އެއް އެވޯޑެވެ. އިންޓަރނޭޝަނަލް ޕްރޮޕަޓީ އެވޯޑްސްއަކީ ޢިމާރާތްކުރުމުގެ ދާއިރާއިން ދުނިޔޭގެ ފެންވަރުގައި ދެވޭ އެންމެ ޝަރަފުވެރި އެއް އެވޯޑެވެ. މިފަދަ އެވޯޑެއް ދިނުމުގެ އެންމެ ބޮޑު މަޤްޞަދަކީ އިމާރާތް ކުރުމުގެ ސިނާޢަތުގައި މަސައްކަތް ކުރާ ފަރާތްތަކާއި، ކުންފުނިތަކުގެ އަގުވަޒަންކުރުމުގެ އިތުރުން، މި ސިނާޢަތުގެ ވާދަވެރިކަން އިތުރުކޮށް، އުފެއްދުންތެރިކަން އިތުރުކުރުމަށް ހިތްވަރު ދިނުމެވެ.
"އިންޓަރނޭޝަނަލް ޕްރޮޕަޓީ އެވޯޑްސް"ގެ އޭޝިއާ ޕެސިފިކް ސަރަޙައްދުގެ އެންމެ މޮޅު ޕަބްލިކް ސަރވިސް ޑިވެލޮޕްމަންޓްގެ އެވޯޑް ހާސިލުކޮށްފައިވަނީ ސިންގަޕޫރުގެ ޝެންހުއާ ކޮންސްޓްރަކްޝަނެވެ. އެކުންފުންޏަށް މި އެވޯޑް ލިބިފައިވަނީ ރާއްޖޭގައި އިމާރާތްކުރާ އެންމެ އުސް އިމާރާތްކަމުގައިވާ 25 ބުރީގެ ދަރުމަވަންތަ ހޮސްޕިޓަލްގެ މަޝްރޫޢަށެވެ. މިއީ އިމާރާތްކުރުމުގެ ދާއިރާއާއި ގުޅުންހުރި، ވަކިން ޙާއްސަކޮށް ރާއްޖޭގެ ސިއްޙީ ދާއިރާގެ މަޝްރޫޢަކަށް ދުނިޔޭގެ ފެންވަރުގެ މިހާ އަގުހުރި އެވޯޑެއް ލިބުނު ފުރަތަމަ ފަހަރެވެ. އޭޝިއާ ޕެސިފިކް ޕްރޮޕަޓީ އެވޯޑްސް 2018 ހަފުލާގައި ޝެންހުއާ ކޮންސްޓްރަކްޝަންގެ ފަރާތުން މި އެވޯޑާއި ހަވާލުވެފައިވަނީ އެކުންފުނީގެ ސީ.އީ.އޯ އަދި ޗެއަރމަން ލީ ފެއިޗަންގއެވެ.
ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ އުފެއްދުންތެރި ހިޔާލާ އެއްގޮތަށް ރާއްޖޭގެ ތާރީޚުގައިވެސް ސިއްހީ ދާއިރާއަށްކުރާ އެންމެ ބޮޑު އިންވެސްޓްމަންޓުގައި ބައިވެރިވުމުގެ ފުރުޞަތު ލިބުމަކީ ވަރަށް ބޮޑު ޝަރަފެއްކަމަށާއި، އެ މަސައްކަތް ދުނިޔޭގެ ފެންވަރުގައިވެސް ބަލައިގަންނަކަމީ ލިބުނު ވަރަށް ބޮޑު އުފަލެއްކަމަށް ޝެންހުއާއިން ސިފަކުރެއެވެ.