އެކި ދާއިރާތަކުން ޒުވާނުން ކުރިއަށްނެރެ ޤައުމު ހިންގުމުގައި ޒުވާނުންގެ ބައިވެރިވުން އިތުރުކުރުމަށްޓަކާ ފާއިތުވި 4 އަހަރުގެ ތެރޭގައި ސަރުކާރުން ވަނީ ކާމިޔާބު މަސައްކަތްތަކެއް ކޮށްފައެވެ. އަނެއްކާވެސް މިއޮތީ ޒުވާނުންނަށް އުފާވެރި ޙަބަރެކެވެ. އެގޮތުން "ޔޫތް ޕްރޮޑަކްޓް"ގެ ނަމުގައި ޒުވާނުންނަށް ޙާއްސަކޮށްގެން އެއް މިލިއަން ރުފިޔާއާ ހަމައަށް ލޯން ނެގޭނެ ސްކީމެއް ސަރުކާރުން މިހާރު މިވަނީ ތަޢާރަފުކޮށްފައެވެ. ހައުސިންގ ޑިވެލޮޕްމަންޓް ފައިނޭންސް ކޯރޕަރޭޝަން، އެޗް.ޑީ.އެފް.ސީ މެދުވެރިކޮށް މިފަދަ ލޯން ސްކީމެއް ތަޢާރަފުކޮށްފައިވާއިރު، ޒުވާނުންނަށްޓަކާ ގެދޮރުވެރިކުރުމުގެ ބިޔަ މަޝްރޫޢެއް ސަރުކާރުން މިހާރުވެސް އަންނަނީ ހުޅުމާލޭގައި ހިންގަމުންނެވެ.
ތަހުޒީބާއި ތަރައްޤީގެ ފޮނިމީރުކަމާއެކު ޒުވާނުން ބާރުވެރިކުރުވައި، އެފަރާތްތަކަށް އެކި ރޮނގުރޮނގުން ކުރިއަށްދެވޭނެ މަގު ތަނަވަސްކޮށްދެއްވުމަކީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ވަރަށް މުހިއްމު ތަޞައްވުރެކެވެ. އެގޮތުން ޒުވާނުންނަށް ދަތިވެފައިވާ ކަންކަން ހައްލުކޮށްދީ ދުނިޔޭގެ އެންމެ ކުރިއަރާފައިވާ ޤައުމުތަކުން ލިބޭފަދަ ޒަމާނީ ޚިދުމަތްތައް މިކުޑަ ކުޑަ ދިވެހިރާއްޖެއިން ލިބޭނެ މަގުފަހިކޮށްދިނުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. ރާއްޖޭގެ އާބާދީގެ ބޮޑުބަޔަކީ ޒުވާނުންކަމަށްވާއިރު، ރައީސް ޔާމީންގެ ސަރުކާރު ސިފަވަމުންދަނީ ޒުވާނުންނާއި ރައްޓެހި، ޒުވާނުންގެ އިޙްސާސްތައް ދަންނަ ސަރުކާރެއްގެ ގޮތުގައެވެ.
ބޯހިޔާވަހިކަމުގެ މައްސަލައަކީ ޒުވާނުންގެ ތެރޭގައިވެސް މިވަގުތު އޮތް އެންމެ ބޮޑު އެއް މައްސަލައެވެ. ގޯތިގެދޮރުގެ ދަތިކަމާހުރެ ޒަވާޖީ ހަޔާތެއް ފަށަން ބޭނުންވެ، އެފުރުޞަތު ނުލިބިފައިވާ އެތަކެއް ޒުވާނުންނެއް ރާއްޖޭގައިވެސް އެބަތިއްބެވެ. އެފަރާތްތަކުގެ މޫނުމައްޗަށް ސަރުކާރުން އަނެއްކާވެސް މިވަނީ ހިނިތުންވުން ގެނުވާފައެވެ.
ހައުސިންގ ޑިވެލޮޕްމަންޓް ފައިނޭންސް ކޯރޕަރޭޝަން، އެޗް.ޑީ.އެފް.ސީގެ 15 ވަނަ އަހަރީ ދުވަހާއި ދިމާކޮށް ތަޢާރަފުކުރި "ޔޫތް ޕްރޮޑަކްޓް" އަކީ އުމުރުން 21 އަހަރާއި 35 އަހަރާއި ދެމެދުގެ ޒުވާނުންނަށް އަމާޒުކޮށްގެން ތަޢާރަފުކޮށްފައިވާ ލޯން ސްކީމެކެވެ. މި ސްކީމްގެ ދަށުން 1 މިލިއަން ރުފިޔާއާ ހަމައަށް ލޯން ދޫކުރުމަށް ވަނީ ހަމަޖެހިފައެވެ. 10.9 ޕަސެންޓު އިންޓަރެސްޓާއެކު ދޫކުރާ މިލޯން އަނބުރާ އަދާކުރުމަށް 30 އަހަރުގެ މުއްދަތެއް ލިބިގެންދާނެއެވެ. އަދި މި ސްކީމްގެ ދަށުން އަމިއްލަ އަށް ޙިއްސާގެ ގޮތުގައި ދައްކަންޖެހޭނީ އެންމެ 15 ޕަސެންޓެވެ.
ރާއްޖޭ ގައި ސޭވިން ޕެޓާން ނުވަތަ ފައިސާ ރައްކާކުރާ މިންވަރު ނިޞްބަތުން ދައްކަމުގައިވާއިރު، ފްލެޓުގަތުމުގައި ޒުވާނުންނަށް ދިމާވާ އެންމެ ބޮޑު އެއް ގޮންޖެހުމަކީ އޯނަރސް އިކުއިޓީ ނުވަތަ ރަޙުނުގެ މިންވަރު މަތިވުމެވެ. ނަމަވެސް އެޗް.ޑީ.އެފް.ސީ އިން ކަނޑައަޅާފައިވާ 15 ޕަސެންޓަކީ އޯނަރސް އިކުއިޓީގެ ގޮތުގައި ރާއްޖޭގައި މިހާތަނަށް ހިމެނޭ ނިޞްބަތުން އެންމެ ކުޑަ އަދަދެވެ.
އެޗް.ޑީ.އެފް.ސީގެ ކްރެޑިޓައިބެހޭ ޖެނެރަލް މެނޭޖަރު ޢައިޝަތު ރަޝީދާ ވިދާޅުވީ، އަލަށް މި ތަޢާރަފުކުރި ލޯން ސްކީމަކީ އަމިއްލަ ދިރިއުޅުމެއް ފަށަން ބޭނުންވެފައިތިބި ޒުވާނުންނަށް ހުޅުވާލެވިގެންދާ ރަނުގެ ފުރުޞަތެއްކަމަށެވެ. ޔޫތް ސިޓީއަށް ވަކިން އަމާޒުކޮށްގެން ތަޢާރަފުކޮށްފައިވާ މި ލޯން ސްކީމަކީ 1 ކޮޓަރީގެ ސްޓޫޑިއޯ އެޕާރޓްމަންޓަށާއި، 2 ކޮޓަރީގެ އެޕާރޓްމެންޓްތަކަށް ޚާއްޞަކޮށް ފަރުމާކޮށްފައިވާ ލޯން ސްކީމެއް ކަމަށް އެޗް.ޑީ.އެފް.ސީން ބުނެއެވެ. އަދި މިހާރުވެސް މާކެޓުގައި ހުރި މިފަދަ ޕްރޮޑަކްޓުތަކަށް މި ސްކީމް މެދުވެރިކޮށް ލޯނަށް ކުރިމަތި ލެއްވޭނެކަމަށްވެސް ޢައިޝަތު ރަޝީދާ ވިދާޅުވިއެވެ.
ހައުސިންގ ޑިވެލޮޕްމެންޓް ކޯރޕަރޭޝަން، އެޗް.ޑީ.ސީގެ އެހީއާއިއެކު "ޔޫތް ޕްރޮޑަކްޓް"ގެ ނަމުގައި ޙާއްސަ ލޯން ސްކީމެއް ތަޢާރަފުކޮށްފައިވާއިރު، ހުޅުމާލޭ ދެވަނަ ފިޔަވަހީގައި މިހާރުވެސް 7000 ހައުސިންގ ޔުނިޓް ތަރައްޤީކުރުމުގެ މަސައްކަތް ސަރުކާރުން އަންނަނީ ކުރަމުންނެވެ. ތަފާތު ކެޓަގަރީތަކަކަށް ބަހާލައިގެން ތަރައްޤީކުރާ މި ފްލެޓްތަކަށް ކުރިމަތިލުމަށް އެދޭ ފޯމް މިހާރު ވަނީ ދޫކުރަން ފަށާފައެވެ. 18 އަހަރުން މަތީގެ ކައިވެންޏެއްކޮށްފައިވާ ކޮންމެ ދިވެއްސަކަށްވެސް މި ފްލެޓްތަކަށް ކުރިމަތިލެވޭއިރު، މީގެ ތެރޭގައި ޒުވާނުންނަށް ޙާއްސަކޮށްގެން 2 ކެޓަގަރީއެއް ތަޢާރަފުކޮށްފައިވާކަން ފާހަގަކޮށްލެވެއެވެ.