އުރީދޫ މޯލްޑިވްސްގެ ހިއްސާއަކަށް 3.20 ލާރި ބަހަން ނިންމައިފިއެވެ. މިގޮތަށް ނިންމާފައިވަނީ އެކުންފުނީގެ 2 ވަނަ އަހަރީ އާންމުޖަލްސާގައެވެ. ހޮޓެލްޖެންގައި ބޭއްވި އުރީދޫގެ 2017 ވަނަ އަހަރުގެ އަހަރީ އާންމު ޖަލްސާގައި 89 ހިއްސާދާރުންވަނީ ބައިވެރިވެފައެވެ.
އުރީދޫ މޯލްޑިވްސް އަށް 2017 ވަނަ އަހަރު ސާފު ފައިދާގެ ގޮތުގައި ލިބުނީ 580.4 މިލިޔަން ރުފިޔާއެވެ. މީގެތެރެއިން 85 ޕަސެންޓް ހިއްސާދާރުންގެ މެދުގައި ބަހާނެ އެވެ.
މި ޖަލްސާއަށްފަހު ނޫސްވެރިންނަށް މަޢުލޫމާތުދެމުން އުރީދޫ މޯލްޑިވްސްގެ ޑިރެކްޓަރ ސޭލްސް އެންޑް ޑިސްޓްރިބިއުޝަން ޙުސައިން ނިޔާޒް ވިދާޅުވީ މިދިޔަ އަހަރަކީ އެ ކުންފުންޏަށް ގިނަ ކާމިޔާބީތަކެއް ހާސިލްކުރެވުނު އަހަރެއްކަމަށެވެ. އެގޮތުން މުޅި ރާއްޖެއަށް 4ޖީ ތައާރަފްކޮށް، އުރީދޫގެ ސްޕަރނެޓްގެ ޙިދުމަތް މާލޭގެ އިތުރުން އަތޮޅުތަކަށް ފުޅާކުރެވި، ކަސްޓަމަރަކު ބޭނުންވާގޮތަށް ބައްޓަންކޮށްލެވޭ މަގޭޕްލޭންގެ ޙިދުމަތް ތަޢާރަފް ކުރެވިފައިވާކަން ނިޔާޒް ފާހަގަކުރެއްވިއެވެ.
"އަޅުގަނޑުމެން ވަރަށް ގިނަ ކަންތައްކޮށްފިން މިދިޔަ އަހަރު. މުޅި ރާއްޖެއަށް 4ޖީ ދެވުނު މިދިޔަ އަހަރު. އަދި އޭގެއިތުރުން މުޅި ދިވެހިރާއްޖެއަށް ފުރަތަމަ ފަހަރަށް ބުރޯޑްބޭންޑް ކޮންމެ ގެއަކަށް ބްރޯޑްބޭންޑް ދެވޭކަހަލަ ފަސޭހަ ބުރޯޑްބޭންޑް އަޅުގަނޑުމެން ލޯންޗްކުރިން. އަދި އޭގެއިތުރުން މާލޭގަ އަޅުގަނޑުމެން މިދޭ ސްޕަރނެޓް އަޅުގަނޑުމެން މާލޭން ބޭރު ރަށްރަށައް ތ. ވިލުފުއްޓަށާއި ކުޅުދުއްފުއްޓަށް އޭތި އެކްސްޓެންޑް ކުރެވުނު." ހުސައިން ނިޔާޒް ވިދާޅުވިއެވެ.
އުރީދޫ މޯލްޑިވްސްގެ އަހަރީ އާންމު ޖަލްސާގައި ވަނީ ޑިރެކްޓަރުންގެ އުޖޫރަވެސް ކަނޑައަޅާފައި. އެގޮތުން، ދެން ބާއްވާ ބޯޑުގެ ކޮންމެ ބައްދަލުވުމެއްގައި ބައިވެރިވާ ޑިރެކްޓަރަކަށް 30،000ރުފިޔާގެ ސިޓިން ފީއެއް ލިބޭނެއެވެ. އަދި މަހު ފީގެ ގޮތުގައި ކޮންމެ ޑިރެކްޓަރަކަށް 2،000ރ. ލިބޭގޮތަށްވެސް ވަނީ ހަމަޖައްސާފަ އެވެ. މީގެއިތުރުން އުރީދޫގެ އެކްސްޓާނަލް އޮޑިޓަރުންގެ ގޮތުގައި މިދިޔަ އަހަރު ވެސް އެ މަސައްކަތް ކުރި ކޭޕީއެމްޖީ މޯލްޑިވްސް ވަނީ ހަމަޖައްސާފައެވެ.