ރަސްފަންނުގައި ގްލޯރިއާ ޖީންސް ކޮފީސްގެ އައުޓްލެޓެއް ހުޅުވާފައިވާއިރު، މިތަނަކީ ކޮފީއަށް ލޯބިކުރާ ފަރާތްތަކަށް ތަފާތު ތަޖުރިބާއެއް ކޮށްލުމުގެ ފުރުޞަތު ލިބިގެންދާ ތަނެއްކަން ފާހަގަކޮށްލަންޖެހެއެވެ. ކޮފީގެ ބުއިންތަކަށް ޙާއްސަ މި އައުޓްލެޓް ރޭ ރަސްމީކޮށް ހުޅުވިނަމަވެސް، މިތަން އާއްމުންނަށް ހުޅުވާލުމަށް ނިންމާފައިވަނީ މިއަދު ހަވީރު 17:30 ގައެވެ.
ގްލޯރިއާ ޖީންސް ކޮފީސްއަކީ އޮސްޓްރޭލިއާގެ ރީޓެއިލް ފުޑް ގްރޫޕުން ހިންގާ ކޮފީގެ އެކި ކަހަލަ ބުއިންތަކާއި އުފެއްދުންތަކަށް ޚާއްސަ ފްރެންޗައިޒް ބްރޭންޑެކެވެ. 1979 ވަނަ އަހަރުގެ ތެރޭގައި ތަޢާރަފުވި މި ފްރެންޗައިޒްގެ 1000 އަށްވުރެ ގިނަ އައުޓްލެޓްތައް ދުނިޔޭގެ 39 ޤައުމެއްގައި މިހާރުވެސް އަންނަނީ ހިންގަމުންނެވެ. އެގޮތުން އޮސްޓްރޭލިއާގައި އެކަނިވެސް މި ބްރޭންޑްގެ 460 އައުޓްލެޓް ހުރެއެވެ. މިއީ ކޮފީއަށް ލޯބިކުރާ ފަރާތްތަކުގެ މެދުގައި ވަރަށް ބޮޑު މަޤްބޫލުކަމެއް ހޯދާފައިވާ ދުނިޔޭގައި އެންމެ ދުވަސްވީ އެއް ކޮފީ ބްރޭންޑްކަންވެސް ފާހަގަކޮށްލަންޖެހެއެވެ.
ރާއްޖޭގައި ގްލޯރިއާ ޖީންސް ކޮފީސްގެ ފުރަތަމަ އައުޓްލެޓް ރަސްފަންނުގެ ޕެވީލިއަންގައި ހުޅުވާފައިވާއިރު، މިއީ ދިވެހި ޒުވާނުންނަށް ވަކިން ޚާއްސަކޮށް ކޮފީ ބުއިމަށް ލޯބިކުރާ ފަރާތްތަކަށް އެމީހުންގެ ޢާއިލާއާއި ރައްޓެހިންނާއެކު ވަގުތު ހޭދަކޮށްލާ، ތަފާތު ތަޖުރިބާއެއް ކޮށްލުމުގެ ފުރުޞަތު ލިބިގެންދާނެ ތަނެކެވެ. ރާއްޖޭގައި ގްލޯރިއާ ޖީންސް ކޮފީސްގެ އައުޓްލެޓް ހުޅުވާފައިވަނީ "ބްރޫ އެންޑް ފީސްޓް" ކިޔާ ދިވެހި ކުންފުންޏަކާ ގުޅިގެންނެވެ. ޕީ.އެސް.އެމް ނިއުސްއަށް މަޢުލޫމާތުދެއްވަމުން އެކުންފުނީގެ ޑިރެކްޓަރ އޮފް މާރކެޓިންގ ސަނީޙު އަންވަރު ވިދާޅުވީ، ގްލޯރިއާ ޖީންސް ކޮފީސްއިން ކޮފީއަށް ޚާއްސަ ބުއިންތައް މިވަގުތު ލިބުނުކަމުގައިވިޔަސް، އެތަނުގެ ފުޑް ވެރައިޓީޒްތައްވެސް ވަރަށް ކައިރި މުސްތަޤުބަލެއްގައި ތަޢާރަފުކުރާނެކަމަށެވެ.
ސަނީޙު ވިދާޅުވީ، މިތަނުގެ ޚިދުމަތްތައް ފަރުމާކޮށްފައިވަނީ ވިހާވެސް ބޮޑަށް ޒުވާނުން ގަޔާވާނޭހެންކަމަށާއި، ޒުވާން ފަންނުވެރި ފަރާތްތަކަށް އެކި ގޮތްގޮތުން ކުރިއަށްދެވޭނެ މަގު ފަހިކޮށްދިނުމަކީވެސް އެތަނުގެ އަމާޒެއްކަމަށެވެ. އެގޮތުން އެތަނުގައި މަސައްކަތް ކުރާ މުވައްޒަފުންގެ 70 އިންސައްތައަކީ ދިވެހި ޒުވާނުންކަން އޭނާ ފާހަގަކުރެއްވިއެވެ.
ގްލޯރިއާ ޖީންސް ކޮފީސްގެ ފަރާތުން އެތަނުގެ ބުއިންތައް ތަޖުރިބާކޮށްލުމުގެ ފުރުޞަތު ފުރަތަމަ ފަހަރަށް ދިވެހި ޒުވާނުންނަށް ހުޅުވާލާފައިވާއިރު، ޕީ.އެސް.އެމްއާ ވާހަކަދެއްކި ބައެއް ޒުވާނުންވަނީ ކޮފީގެ ރަހަޔާމެދު ތަޢުރީފުކޮށް ވާހަކަދައްކާފައެވެ. އަދި ދުނިޔޭގެ ނަން މަޝްހޫރު ބްރޭންޑްތައް ރާއްޖެއަށް އަންނަމުންދާތީ ދިވެހި ޒުވާނުން ތިބީ ވަރަށް އުފަލުންނެވެ.
ގްލޯރިއާ ޖީންސް ކޮފީސްގެ ރާއްޖޭގެ ފުރަތަމަ އައުޓްލެޓް މާލޭގައި ހުޅުވިނަމަވެސް، ރާއްޖޭގެ އާބާދީ ބޮޑު ސަރަޙައްދުތަކަށް މި ބްރޭންޑްގެ އައުޓްލެޓްތައް ތަޢާރަފުކުރުމުގެ ވިސްނުން އެފަރާތުން އަންނަނީ ގެންގުޅެމުންނެވެ. އެގޮތުން އައްޑޫ ސިޓީ އާއި ހދ.ކުޅުދުއްފުއްޓަށް މި ބްރޭންޑް ތަޢާރަފުކުރުމުގެ މަޝްވަރާތައް ކަމާގުޅޭ ފަރާތްތަކާއެކު މިހާރު ކުރަމުންދާކަން ފާހަގަކޮށްލެވެއެވެ.