އޮސްޓްރޭލިއާގެ މަޝްހޫރު ކޮފީ ބްރޭންޑެއް ކަމަށްވާ "ގްލޯރިއާ ޖީންސް ކޮފީސް"ގެ ފްރެންޗައިސް ރެސްޓޯރެންޓެއް ރަސްފަންނުގައި ހުޅުވައިފިއެވެ.
މިރޭ ބޭއްވި ކުލަގަދަ ރަސްމިއްޔާތެއްގައި މިތަން ހުޅުވައިދެއްވީ ރައީސުލްޖުމްހޫރިއްޔާގެ އަނބިކަނބަލުން ފާޠިމަތު އިބްރާހީމެވެ. އެކަމަނާގެ އަރިހުގައި ދައުލަތުގެ ވަޒީރުންނާއި ބައެއް ވިޔަފާރިވެރިން ވަނީ ބައިވެރިވެފައެވެ.
މި ރަސްމިއްޔާތުގައި ވާހަކަފުޅުދައްކަވަމުން ހައުސިން މިނިސްޓަރު ޑރ.މުޙައްމަދު މުޢިއްޒު ވިދާޅުވީ މީގެ ތިން އަހަރުކުރިން ރަސްފަންނު ސަރަހައްދު އޮތީ ދިރުމެއްނެތް ސަރަހައްދެއްގެ ގޮތުގައި ކަމަށެވެ. ހިތްގައިމު ތަނަކަށް މިތަން ބަދަލުކުރުމަށް ސަރުކާރުން ކުރި މަސައްކަތް މިނިސްޓަރު ފާހަގަކުރެއްވިއެވެ. މިއީ ރައީސް ޔާމީނުގެ ވިސްނުންފުޅެއްކަން މިނިސްޓަރު ފާހަގަކުރެއްވިއެވެ.
މިރަސްމިއްޔާތުގައި ވާހަކަފުޅުދައްކަވަމުން ޕެވީލިއަންގެ މަސައްކަތް ކުރި ކުންފުނި އެމްޑަބްލިއުއެސްސީގެ މެނޭޖިން ޑިރެކްޓަރު އިބްރާހީމް ފަޒުލް ރަޝީދު ވިދާޅުވީ، މި ޕެވީލިއަންގައި އަދިވެސް ދުނިޔޭގެ މަޝްހޫރު އިތުރު ދެ ފްރެންޗައިޒް ރެސްޓޯރެންޓް ހުޅުވާނެ ކަމަށެވެ. އޭގެތެރޭގައި ޢާއިލާތަކާއި ކުޑަކުދިންނަށް ޚާއްސަ ފްރެންޗައިސް ރެސްޓޯރެންޓްތައް ހިމެނޭނެކަމަށް ފަޒުލް ވިދާޅުވިއެވެ.
ރަސްފަންނުގެ އިތުރުން މާލޭގެ އެކި ސަރަޙައްދުތަކަށް ފަހަކަށްއައިސް ދަނީ ދުނިޔޭގެ މަޝްހޫރު ފުޑް ފްރެންޗައިޒް ތައް އަންނަމުންނެވެ.