މިއަހަރުގެ ޓްރެވެލް ޓްރޭޑް ޝޯ އޮފް މޯލްޑިވްސް (ޓީޓީއެމް) ފެއަރގައި 100 އަށްވުރެ ގިނަ ފަރާތުން ބައިވެރިވާނެކަމަށް މި ފެއަރ އިންތިޒާމްކުރާ މޯލްޑިވްސް ގެޓަވޭސްއިން ބުނެފިއެވެ.
މޯލްޑިވްސް ގެޓަވޭސްއިން އިންތިޒާމްކޮށްގެން ބާއްވާ ޓީޓީއެމް ފެއަރއަކީ ރާއްޖޭގެ ޓޫރިޒަމް ދާއިރާގައި މަސައްކަތްކުރާ ފަރާތްތަކާއި ދުނިޔޭގެ ބޮޑެތި ޓްރެވަލް އޭޖެންޓުންނާއި ގުޅުވާލުމަށް ކުރިއަށް ގެންދާ ފެއަރއެކެވެ.
ހޮޓެލިއަރ މޯލްޑިވްސްއިން ބުނީ ރާއްޖޭގެ 100 އަށްވުރެ ގިނަ ރިސޯޓްތަކާއި ހޮޓާރަކުން މިއަހަރުގެ ޓީޓީއެމް ފެއަރގައި ބައިވެރިވާނެކަން ޔަޤީންވެފައިވާކަމަށެވެ. އެހެންނަމަވެސް 140 ރިސޯޓް، ހޮޓާތަކާއި، ބައިނަލްއަޤްވާމީ 200 ފަރާތުން ބައިވެރިވާނެކަމަށް އަންދާޒާކުރެވޭކަމަށެވެ.
ޓްރެވެލް ޓްރޭޑް މޯލްޑިވްސް ފެއަރއަކީ ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތައް އެއްތަނަކުން ބައްދަލުވެވޭ ނެޓްވޯކިންގ ސެޝަނެކެވެ. މިއަހަރުގެ ޓީޓީއެމް ފެއަރ އޮންނާނީ މޭ މަހުގެ 1 އިން 3 އަށް ދަރުބާރުގޭގައެވެ. 3 ދުވަހުގެ މުއްދަތަކަށް ކުރިއަށްދާ ޓީޓީއެމް ފެއަރގެ ތެރެއިން ހޮޓެލިއާ ސަމިޓަކާއި، ގެސްޓްހައުސް އެކްސްޕޯއަކާއި، ޑައިވް އެކްސްޕޯއެއްގެ އިތުރުން ސަޕްލައި އެކްސްޕޯއެއް ކުރިއަށްދާނެކަމަށް މޯލްޑިވްސް ގެޓަވޭސްއިން ބުނެއެވެ.
މޯލްޑިވްސް ގެޓަވޭސްއިން މީގެ ކުރިން ބުނެފައިވަނީ މިއަހަރުގެ ޓީޓީއެމް ފެއަރގެ ތެރެއިން، ދިވެހިރާއްޖެއަށް 2 މިލިއަން ފަތުރުވެރިން ގެނައުމަށް ގިނަ މަސައްކަތްތަކެއް ކުރާނެކަމަށެވެ.
މި ޓްރެވަލް ޓްރޭޑް ޝޯއަކީ ރާއްޖޭގެ ރިސޯޓްތަކާއި ރިސޯޓް ސެގްމަންޓްގައި ހުރި ޕްރޮޕަޓީތައް ޕްރޮމޯޓްކުރުމަށް ބާއްވަން ހަމަޖައްސާފައިވާ އިވެންޓެކެވެ.