ރިކޯޑް އަދަދެއްގެ ނޮމިނޭޝަނާއެކު މިއަހަރުގެ ސައުތު އޭޝިއަން ޓްރެވެލް އެވޯޑްސް، ސަޓާގެ ނޮމިނޭޝަން ނިންމާލައިފިއެވެ.
ސަޓާ އެވޯޑުގެ ކަންކަން އިންތިޒާމްކުރާ ކުންފުނި ހައިރައިޒުން ބުނީ މިއަހަރުގެ ސަޓާ އެވޯޑަށް 500 އަށްވުރެ ގިނަ ކުންފުނި ނޮމިނޭޓް ކޮށްފައިވާކަމަށެވެ. މި އެވޯޑަށް ސައުތު އޭޝިޔާގެ 5 ޤައުމަކުން ވާދަކުރެއެވެ. އެއީ އިންޑިއާ، ސްރީލަންކާ، ނޭޕާލް، ބޫޓާން އަދި ދިވެހިރާއްޖެއެވެ.
ހައިރައިޒުން ބުނީ ސަޓާ އެވޯޑަށް ވާދަކުރި ފަރާތްތައް އިވެލުއޭޓްކުރުމުގެ މަސައްކަތް އަންނަ ޖޫން މަހާއި ޖުލައި މަހުގެ ތެރޭގައި ފަށާނެކަމަށެވެ. އަދި އޮންލައިންކޮށް ވޯޓުލުމުގެ ފުރުޞަތު އަންނަ ޖޫންމަހުގެ ނިޔަލަށް މިހާރު ހުޅުވާލާފައިވަކަމަށްވެސް ހައިރައިޒުން ބުނެއެވެ.
މިއަހަރުގެ ސަޓާ އެވޯޑް އޮންނާނީ އިންޑިއާގެ މުންބާއީގައެވެ. މިއަހަރުގެ އެވޯޑް ހަފްލާގައި 36 ދާއިރާއަކުން އެވޯޑްދޭނެކަމަށް ހައިރައިޒުން ބުނެއެވެ.
ސައުތު އޭޝިއަން ޓްރެވެލް އެވޯޑްސްގެ ފުރަތަމަ އެޑިޝަން ސްރީލަންކާގައި ބާއްވާފައިވާއިރު އެއަހަރު އެވޯޑަށް ނޮމިނޭޓްކޮށްފައިވަނީ 260 ފަރާތެވެ. މިދިޔަ އަހަރުގެ އެވޯޑަށް 414 ފަރާތެއް ނޮމިނޭޓްކުރިއިރު އެވޯޑް ހަފްލާ ބޭއްވީ އައްޑޫ ސިޓީގެ އިކުއޭޓަރ ވިލެޖްގައެވެ. ސަޓާ އެވޯޑަކީ ދުނިޔޭގެ ބޮޑެތި ކުންފުނިތަކަކުން އެންޑޯޒް ކޮށްފައިވާ އެވޯޑެކެވެ.