ޗައިނާގައި ބާއްވާ "ސައުތު އޭޝިއާ އެކްސްޕޯ"، ކުންމިން ފެއާރ ގައި ބައިވެރިވާން ބޭނުންވާ ދިވެހި އުފެއްދުންތެރިންނަށް ފުރުޞަތު ހުޅުވާލައިފިއެވެ.
ކުންމިން ފެއަރއާއި ބެހޭގޮތުން ނޫސްވެރިންނަށް މަޢުލޫމާތުދިނުމަށް ބޭއްވި ބައްދަލުވުމުގައި އިކޮނޮމިކް މިނިސްޓްރީގެ އެކްސްޕޯ ކޯޑިނޭޓަރު އުސްމާން ޝާކިރު ވިދާޅުވީ 19 އެޕްރީލްގެ ނިޔަލަށް ފެއަރގައި ބައިވެރިވާން ބޭނުންވާ ފަރާތްތަކަށް އެ ފުރުސަތު ހުޅުވާލެވިފައިވާކަމަށެވެ. ކުންމިން ފެއަރގައި ބައިވެރިވާން ހުށަހަޅަންޖެހޭ ފޯމް އިކޮނޮމިކް މިނިސްޓްރީ އާއި އެ މިނިސްޓްރީގެ ވެބަސައިޓުން ލިބެންހުންނާނެކަމަށާއި މި ފެއަރއަކީ ސައުތު އޭޝިޔާ ސަރަހައްދުގެ ގިނަ ޢަދަދެއްގެ އުފެއްދުންތައް ދައްކާލާ ފެއަރއެއްކަމަށް ޝާކިރު ވިދާޅުވިއެވެ.
މިފަދަ ފެއާއެއްގައި ބައިވެރިވުމަކީ ދިވެހި ވިޔަފާރިވެރިންނާއި އުފެއްދުންތެރިންނަށް އެފަރާތްތަކުންގެ އުފެއްދުންތައް ބޭރުގެ ފަރާތްތަކަށް ތަޢާރަފްކުރުމަށް ލިބިގެންދާ ވަރަށް ރަނގަޅު ފުރުޞަތެއްކަމަށާއި، އެހެން ޤައުމުތަކުގެ އުދެއްދުންތައް ރާއްޖެއަށް ސަޕްލައި ކުރުމަށްވެސް ފެއަރގެ ސަބަބުން ފުރުސަތު ފަހިވެގެންދާނެކަން ޝާކިރު ވިދާޅުވިއެވެ.
"ރާއްޖޭގެ އުފެއްދުންތެރިންވެސް ރާއްޖޭގައި އުފައްދާ ކޮންމެ އެއްޗެއްވެސް މި ފެއަރގައި ބައިވެރިކުރެވިދާނެ. އެއްޗިކި ވިއްކާ އިތުރަށް މާކެޓް ހޯދުމަށްވެސް މަސައްކަތް ކުރެވިދާނެ އެ ފުރުސަތު ލިބޭނެ. ދެން މީގަ އަނެއް ކަމަކީ މިހާގިނަ ޤައުމުތައް ބައިވެރިވާ ފެއަރއެއްގައި ތަފާތު ޕްރޮޑަކްޓައް ފެންނަ އިރުގައި ރާއްޖޭގެ ވިޔަފާރިވެރިންނަށްވެސް އެތަންތަނުން އެބޭފުޅުންނަށް ބޭނުންއެއްޗެއް ބޭނުން ވައްތަރެއްގެ އެއްޗެއް އިންޕޯޓްކުރުމަށް އެ އުފައްދާ މީހުންނާއި ވާހަކަދެއްކުމުގެ ފުރުސަތު އެބަލިބޭ." އުސްމާން ޝާކިރު ވިދާޅުވިއެވެ.
މިއަހަރުގެ ކުންމިން ފެއަރ އޮންނާނީ ޖޫން މަހުގެ 14 އިން 20 އަށް ޗައިނާގެ ބެއިޖިންގައެވެ. މިއަހަރު ދިވެހި 16 ފަރާތަކަށް ފެއަރގައި ބައިވެރިވުމުގެ ފުރުސަތު ދޭނެކަމަށް އިކޮނޮމިކް މިނިސްޓްރީން މަޢުލޫމާތުދެއެވެ. މި ފެއަރގައި ބައިވެރިވާ ދިވެހި ވިޔަފާރިތަކަށް ސްޓޯލްތައް ދޫކުރަނީ މުޅިން ހިލޭކަމަށާއި ކޮންމެ ފަރަތަކަށްވެސް ނުވަ ފޫޓް ނުވަ ފޫޓްގެ ސްޓޯލްއެއް ލިބޭނެކަމަށް އެ މިނިސްޓްރީން ބުނެއެވެ.
ކުންމިން ފެއަރއަކީ ދެކުނު އޭޝިއާގެ ޤައުމުތަކުގެ އުފެއްދުންތެރިކަމުގެ ދާއިރާ ފުޅާކުރުމާއި، އެއްތަނަކުން އުފެއްދުންތައް ވިއްކުމުގެ މަގުފަހިކޮށްދިނުމުގެ ގޮތުން ބާއްވާ ފެއާރއެކެވެ. މިއީ މި ފެއަރގައި ރާއްޖެއިން ބައިވެރިވާ 3 ވަނަ އަހަރެވެ.