މި އަހަރުގެ އާތު އަވަރ ފާހަގަކުރުމަށް ގިނަ ޙަރަކާތްތަކެއް ހިންގުމަށް ރާވާފައިވާކަމަށް އެންވަޔަރަންމެންޓް މިނިސްޓްރީން ބުނެފިއެވެ. އާތު އަވަރ އަކީ ތިމާވެއްޓަށްވަމުނދާ ގެންލުންތަކަށް ޢާއްމުން ހޭލުންރިކުރުވައި، އެކަންކަން ދުނިޔޭގެ ސަމަލުކަމަށް ގެންނައުމަށް ހުރިހާ ޤައުމުތައް ހިމެނޭގޮތަށް ފާހަގަކުރަމުން އަންނަ ޚާއްސަ ޙަރަކާތެކެވެ.
2009ވަނަ އަހަރު ފެށިގެން ރާއްޖޭގައިވެސް އަންނަނީ އާތު އަވަރ ފާހަގަކުރަމުންނެވެ. އެންވަޔަރަންމެންޓް މިނިސްޓްރީއާ، އާތު އަވަރ މޯލްޑިވްސް ގުޅިގެން ކުރިއަށް ގެންދާ މިޙަރަކާތް މިއަހަރު ރަސްމީކޮށް ފާހަގަކުރުމަށް ނިންމާފައިވަނީ އައްޑޫ ސިޓީގައެވެ.
އާތު އަވަރ މޯލްޑިވްސްއިން ބުނެފައިވަނީ މިގޮތަށް ނިންމާފައިވާނީ، ޖައްވަށް ދޫކުރާ ވިހަ ގޭސްތަކާއި މޫސުމީ ބަދަލުތަކުގެ ސަބަބުން ރާއްޖެ ފަދަ ތިމާވެށީގެގޮތުން ނާޒުކު ޤައުމުތަކަށް ލިބޭ ގެއްލުން ބޮޑުކަން ހާމަކޮށްދިނުމަށްކަމަށެވެ.
އާތު އަވަރ ފާހަގަކުރުމާއި ގުޅޭގޮތުން ނޫސްވެރިންނަށް މަޢުލޫމާތުދެއްވަމުން އެންވާރަމެންޓް މިނިސްޓްރީގެ ޕާމަނަންޓް ސެކްރެޓަރީ އަޖްވަދު މުސްޠަފާ ވިދާޅުވީ މިފަދަ ހަރަކާތެއް ހިންގުމުގެ އެންމެ މުހިންމު މަޤްސަދަކީ ދުނިޔެ ހޫނުވެ، ލިބެމުންދާ ގެއްލުންތަކާއި ގުޅޭގޮތުން ފަދުރީ ގޮތުން މީހުން ހޭލުންތެރިކުރުވުންކަމަށެވެ.
އެގޮތުން ހޮނިހިރު ދުވަހު އާތު އަވަރ ފާހަގަކުރާ ވަގުތު ކަރަންޓުން ބޭނުންކުރާ ވަސީލަތްތައް އާއްމުން ފަރުދުންނާއި، ގެތަކާއި، އޮފީސްތަކުގައިވެސް ވީހާވެސް މަދުން ބޭނުންކުރުމަށްވަނީ އިލްތިމާސްކޮށްފައެވެ. އެހެން އަހަރުތަކާ ޚިލާފަށް މިއަހަރު މަގުމަތީގައި ދުއްވޭނެކަމަށް މިނިސްޓްރީން ބުނެއެވެ. މިގޮތަށް ނިންމާފައިވާނީ، މިކަމަށް މަޖުބޫރުކުރުމުގެ ބަދަލުގައި، އެމީހަކު އަމިއްލަ ޒިންމާ އަދާކުރުވުމަށް ބާރުއެޅުވުމުގެ ގޮތުންކަމަށް އެފަރާތުން ބުނެއެވެ.
އާތު އަވަރ މޯލްޑިވްސްގެ އެޑްވޮކަސީ ލީޑް މަޢީދު މުޙައްމަދު ޒާހިރު ވިދާޅުވީ މިއަހަރު ހިންގުމަށް ހަމަޖެހިފައިވާ ހަރަކާތްތަކުގެ ތެރޭގައި ބައިކް މޯލްޑިވްސްގެ ބައިސްކަލް ބުރަކާއި، ރެސްޓޯރެންޓް ތަކުގައި މިއުޒިކާއިއެކި ކެނޑްލް ލައިޑް ޑިނަރތައް ބޭއްވުމަށް ހަމަޖެހިފައިވާކަމަށެވެ.
މިއަހަރުގެ އާތު އަވަރގައި މައިގަނޑު ހަ ކަމަކަށް ހޭލުންތެރިކުރެވޭނެކަމަށާއި، އޭގެތެރޭގައި ފައިމަގުގައި އުޅުމާއި، އެއްފަހަރު ބޭނުންކުރެވޭ ޕްލާސްޓިކްގެ ބާވަތްތައް ބޭނުންކުރުން މަދުކުރުން ހިމެނޭކަމަށް އޭނާ ވިދާޅުވިއެވެ.
މިއަހަރުގެ އާތު އަވަރގެ ޝިއާރެއްގެ ގޮތުގައި ކަނޑައަޅާފައިވަނީ "ކަނެކްޓް ޓު އަރތް" މި ޝިއާރު. އާތު އަވަރގެ ޙަރަކާތްތައް ކުރިއަށްގެންދާނީ އަންނަ ހޮނިހިރު ދުވަހުގެ އަށްގަޑި ތިރީހުން ނުވަގަޑި ތިރީހަށެވެ. ނަމަވެސް ތިމާވެއްޓާއިމެދު މީހުން ހޭލުތެރިކުރުވުމަށް ކުރިއަށްގެންދާ ހަރަކާތްތައް މުޅި އަހަރަށް ދެމިގެންދާނެކަމަށް އާތު އަވަރ މޯލްޑިވްސްއިންބުނެއެވެ.