އައްޑޫ ސިޓީއާއި ފުވައްމުލަކުގައި އަމިއްލައަށް ކުނި އުކާލާ އުޅަނދުތަކުން ފީއެއް ނެގުމަށް ވޭސްޓް މެނޭޖްމަންޓް ކޯޕަރޭޝަން ވެމްކޯއިން ނިންމައިފިއެވެ.
އެ ކުންފުނިން ބުނީ ފީ ނެގުމަށް ނިންމާފައިވަނީ ހަތަރު ފުރޮޅުލީ އުޅަނދުތަކުން އެކަނި ކަމަށެވެ. އަދި ފީ ނަގާނީ އުކާލާ ކުނީގެ ޓަނަށް ބަލައި ކޮންމެ ޓަނަކުން 100 ރުފިޔާގެ ރޭޓުންކަމަށެވެ.
ވެމްކޯއިންވަނީ މާލޭގައިވެސް ހަރަތު ފުރޮޅުލީ އުޅަނދުތަކުން އުކާލާ ކުނިން ފީ ނަގަން ފަށާފައެވެ. އެގޮތުން ފީނަގަމުން ގެންދަނީ އުކާލާ ކޮންމެ ޓަނަކުން 200 ރުފިޔާގެ ރޭޓުންކަމަށް ވެމްކޯއިން ބުނެެއެވެ.
ކުނި އުކަން އަންނަ ހަތަރު ފުރޮޅުލީ އުޅަނދުތަކުން ފީއެއް ނަގަނީ ކުނި އުކުމުގެ މަސައްކަތް ޢާއްމު ފަރާތްތަކުން ކުރުމުގެ ބަދަލުގައި ވެމްކޯ މެދުވެރިކޮށް ރައްކާތެރި ގޮތުގައި ކުރުމަށް ބާރުއެޅުމުގެ ގޮތުންކަމަށެވެ. އެގޮތުން ގިނަ ޢަދަދަށް ކުނި އުކަން ބޭނުންވާ ފަރަތްތަކަމަށް ވެމްކޯއިންވަނީ "ކެޕްސް" އަދި "ކެޕްސް ލައިޓް"ގެ ނަމުގައި މީގެ ކުރިންދެ ޚިދުމަތެއް ތަޢާރަފްކޮށްފައިވާކަމަށްވެސް ވެމްކޯއިން ބުނެއެވެ.
ކެޕްސް ލައިޓް ޚިދުމަތުގައި ހިމެނެނީ މައިގަނޑު ތިން ޚިދުމަތެކެވެ. މި ހިދުމަތުގެ ދަށުން ވެމްކޯއިން އުކާލަދެނީ އާއްމުކޮށް ގޭގެއިން ކޮންމެ ދުވަހަކު އުކާލާ ކުނީގެ އިތުރުން، ޓިވީ އާއި ފްރިޖް ފަދަ އިލެކްޓްރޯނިކް ސާމާނާއި ފަރުނީޗަރުގެ ބާވަތްތަކެވެ. މި ޚިދުމަތައް އަގުނަގަނީ މި ތިން ދާއިރާގެ ތެރެއިން އެ ކުންޏެއްގެ ސައިޒައް ބަލައިގެންކަމަށް ވެމްކޯއިން ބުނެއެވެ.