އެމެރިކާގެ ކުންފުންޏެއްކަމަށްވާ މައިންޑް ފިޝް ކޯއިން ދިވެހި ދަޅުމަސް އެމެރިކާގެ ކެލިފޯނިއާގެ ލޮސް އެންޖަލަސްގެ ބާޒާރަށް ނެރެފިއެވެ.
ލޮސް އެންޖަލަސްގެ ބާޒާރަށް ތަޢާރަފްކޮށްފައިވާ މިމަސްދަޅަކީ ހޮރައިޒަން ފިޝަރީޒްއިން ސަޕްލައިކުރާ ކަޅުބިލަމަސް ދަޅެވެ. މިމަސްދަޅު ވިއްކަމުންދަނީ އެމެރިކާގެ އޯގަނިކް ކާބޯތަކެތީގެ ވިޔަފާރިކުރާ "ޔުނައިޓަޑް ނެޗުރަލް ފުޑްސް"ގެ އިތުރުން އަޕްސްކޭލް ގްރޯސަރީ ޗެއިނެއްކަމަށްވާ "އާރބަން ރެޑިޝް"ގައެވެ.
ލޮސްއެންޖަލަސްއަށް މައިންޑް ފިޝް ކޯއިން ތަޢާރަފްކޮށްފައިވަނީ ތެޔޮ މަސްދަޅާއި ފެން މަސްދަޅެވެ. މިމަސްދަޅު ވިއްކާ އަގަކީ ތިން ޑޮލަރެވެ.
ބައިނަލްއަޤްވާމީ ގޮތުން ހިންގާ އޮންލައިން މަސްވެރިކަމާ ގުޅުން ހުރި ވިޔަފާރި ޕޯޓަލް "ސީފުޑްސޯސް"އަށް ދިން އިންޓަރވިއުއެއްގައި މައިންޑް ފިޝް ކޯގެ ކޯ-ފައުންޑަރ ޖެރީ ލިން ބުނީ ތައިލޭންޑް، ވިއެޓްނާމް އަދި އިންޑޮނީޝިއާގެ ބަދަލުގައި ރާއްޖެއިން ދަޅުމަސް ސަޕްލައި ކުރުމަށް ނިންމީ ރާއްޖެއަކީ ދެމެހެއްޓެނިވި ގޮތެއްގައި ކުރާ ދޮށީގެ މަސްވެރިކަމަށް މަސްހުރު ލާމަސީލް ޤައުމަކަށްވާތީކަމަށެވެ.
މައިންޑް ފިޝް ކޯއަކީ މަހުގެ ބާވަތްތައް އިޔާދަކުރެނިވި ގޮތެއްގައި ހިފައި ބޭނުންކުރުމަށް ބާރުއަޅާ މަސައްކަތް ކުރާ ކުންފުންޏެކެވެ. އަދި ގެއްލުން ނުވާނެހެން ބާނާފައިވާ މަހުގެ ބާވަތްތަކުގެ ޕްރޮޑަކްޓް ވިއްކުމުގައި ހަރަކާތްތެރިވާ ކުންފުންޏެކެވެ.