ރާއްޖޭގެ ސަލާމަތީ ބާރުތައް މިހާރު އޮތީ މީގެ ކުރިން ދުވަހަކުވެސް ބަދަހި ނުވާ މިންވަރަށް ބަދަހިކޮށްކަމަށް ޑިފެންސް މިނިސްޓަރ އާދަމް ޝަރީފް އުމަރު ވިދާޅުވެއްޖެއެވެ.ޕީއެސް އެމް ނިއުސްއަށް ދެއްވި އިންޓަރވިއުއެއްގައި ޑިފެންސް މިނިސްޓަރ އާދަމް ޝަރީފް ޢުމަރު ވިދާޅުވީ، ސަރުކާރަށާއި ރައްޔިތުންނަށްވެސް މިވަގުތު އޮތް އެންމެ ބޮޑު ހިތްހަމަޖެހުމަކީ ރާއްޖޭގެ ސަލާމަތީ ބާރުތަކުގެ މެދުގައި އޮތް ގުޅުން ބަދަހިވުމާއި ހަރުދަނާ ލީޑަރޝިޕެއްގެ ދަށުން މި ދެ މުއައްސަސާ ހިނގަމުންދާކަންކަމަށެވެ. އޭގެ ނަތީޖާއެއްގެ ގޮތުން މި ދެ މުއައްސަސާގެ ކަންކަން ވަރަށް ރަނގަޅަށް ކުރިއަށްދާތަން ފެންނަމުންދާކަމަށާ ރާއްޖޭގައި އިދިކޮޅު ފަރާތްތަކުން ހިންގަމުންދާ ޣައިރު ޤާނޫނި ކަންކަން ހުއްޓުވުމުގައިވެސް ސަލާމަތީ ބާރުތަކުން ގުޅިގެން ޒިންމާދާރުކަމާއެކު ޤާނޫނީ އިމުގެ ތެރެއިން މަސައްކަތް ކުރަމުންދާކަމަށް މިނިސްޓަރ ވިދާޅުވިއެވެ.
"ސަލާމަތީ ޚިދުމަތްތަކުން ފެންނަމުންމިދަނީ މިހާތަނަށް ރާއްޖެއިން ނުފެންނަ ރަނގަޅު ރީތި މިސާލެކޭ މިހާރު ފެނިގެންދަނީ. ހަމަ މިއާއެކީ އަޅުގަނޑު ފާހަގަކޮށްލަން ދެ މުއައްސަސާގެ ތެރޭގައި އޮންނަންޖެހޭ ގުޅުންވެސް މީގެކުރިން ދުވަހަކުވެސް ބަދަހިނުވާ މިންވަރަށް ބަދަހިވެފައި އޮތްކަން." ޑިފެންސް މިނިސްޓާރު ވިދާޅުވިއެވެ.ޑިފެންސް މިނިސްޓަރ ވިދާޅުވީ، ރާއްޖޭގައި މިވަގުތު އުފެދިފައިވާ ސިޔާސީ ހަމަނުޖެހުމަކީ، މަދުފަރާތްތަކަކުން ވަކި މަޤްޞަދެއްގައި ކުރަމުން ކަންތައްތަކެއް ކަމަށެވެ. އެގޮތުން ޢާންމުންނަށް އިޖުތިމާޢީ އުނދަގުލަކަށް ވާގޮތަށް ކުރިއަށް ގެންދާ މި ޙަރަކާތްތަކަކީ ޤާނޫނީ ގޮތުން ހުއްދަ ލިބިގެން ކުރެވޭނެ ކަންތައްތަކެއް ނޫންކަމަށާ އެއީ ޣައިރު ޤާނޫނީ ޙަރަކާތްތަކެއް ކަމަށް މިނިސްޓަރ ވިދާޅުވިއެވެ.
"ކުއްލި ޙާލަތުގެ ތެރޭގައިވެސް ސަރުކާރުން އެބައޮތް ފުރުޞަތު ދެއްވާފައި މުޒާހަރާއް ކުރަން ބޭނުންވެއްޖެނަމަ ކަނޑައެޅިފައިވާ އުސޫލްތަކުގެ ތެރެއިން ހުއްދަ ނަގައިގެން ޤާނޫނީ ގޮތުން މުޒާހަރާކުރަން ހުއްދަ ދީފައިވާ ތަންތަނުގައި މުޒާހަރާކުރުމުގެ ފުރުޞަތު. އެ އުސޫލްތަކުގެ ބޭރުން މުޒާހަރާކުރާނަމަ އެއީ ހުއްދަ ކުރެވޭނެކަމެއްނޫން. މިހާރު ރާއްޖޭގައި ކުރިއަށްދާ މުޒާހަރާތަކަކީ ޤާނޫނީގޮތުން ފުށުއަރާ ހަރަކަތްތަކެއްކަން ހުރިހާ ބޭފުޅުންނަށްވެސް އެނގިވަޑައިގަންނަވާނެ. އެކަން އެނގިތިބެ ޢާންމުންނަށް އެވާ އުނދަގޫވާގޮތަށް ހިންގާ ހަރަކަތްތަކުގެ ސަބަބުންނާއި، ޣައިރު ޤާނޫނީ އެއްވުންތަކަށް ދިއުމުގެ ސަބަބުން ފުލުހުން ހިންގާ ހަރަކާތްތަކުން ފުލުހުންގެ ބެލުމުގެ ދަށަށް ގެންދާ މީހުންނަކީ އެމީހުން އަމިއްލައަށް ޒިންމާ ނަގަންޖެހޭނެ ފަރާތްތަކެއް. އެއަށްވުރެ މާ ޒިންމާދާރު ގޮތެއްގައި އަޅުގަނޑުމެން ތަހުޒީބް ދުނިޔެއެއްގައި އުޅެން ދަސްކުރަން އެބަޖެހޭ." ޑިފެންސް މިނިސްޓަރ ވިދާޅުވިއެވެ.ދިވެހި ސިފައިންނާއި ފުލުހުންނަކީ ޤައުމުގެ މިނިވަންކަމާއި އިސްތިޤްލާލު ދަމަހައްޓައި ރައްޔިތުންގެ ލާބަޔާއި މަންފާއަށާއި މީހުންގެ ފުރާނައާއި މުދާ ރައްކާތެރިކޮށް، ޤާނޫނުން ލާޒިމްކޮށްފައިވާ ވާޖިބު އަދާކުރަންތިބޭ ބައެއްކަން ފާހަގަކުރައްވަމުން މިނިސްޓަރ ވިދާޅުވީ، ފުލުހުންނާއި ސިފައިންގެ ވާޖިބުގެ ތަކުގެ ތެރޭގައި މާތްވެގެންވާ އިސްލާމްދީނާއި ޤައުމުގެ މިނިވަންކަމާއި އިސްތިޤްލާލް ދެމެހެއްޓުމާއި، ޤާނޫނީގޮތުން އުފެދިފައިވާ ސަރުކާރު ހިމާޔަތްކުރުމާއި، އެހީތެރިކަން ފޯރުކޮށްދިނުމަކީ އެމީހުންނަށް ޤާނޫނުން ލާޒިމްކޮށްފައިވާކަންކަން ކަމަށެވެ. އަދި މި ވާޖިބުތައް ސަލާމަތީ ބާރުތަކުން އަދާކުރާނެކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ، އިދިކޮޅު ފަރާތްތަކުން މިހާރު ހިންގާ ސިޔާސީ ހަރަކާތްތަކަށް ރައްޔިތުން އިޖާބަ ނުދޭކަމަށެވެ. އިދިކޮޅު ފަރާތްތަކުން ހިންގާ ހަމަނުޖެހުންތައް ކޮންޓްރޯލްކޮށް މަގުތައް ތަރުތީބުކުރުމުގައި ފުލުހުން ޙަރަކާތްތެރިވަމުންދާކަމަށާ، އެކަމުގައި ސިފައިން މަގުމައްޗަށް ނިކުމެ ފުލުހުންނަށް އެހީތެރިކަން ފޯރުކޮށްދިނުމުގެ ހާލަތަކަށް ނުދާކަމަށެވެ. ނަމަވެސް މިމަހުގެ ސޯޅަ ވަނަ ދުވަހުގެ ރޭ ބަޔަކު ގްރީން ޒޯނަށް އެއްވާން މަސައްކަތްކުރުމުން ސިފައިން ހަރަކާތްތެރިވެފައިވާނެކަމަށް ޑިފެންސް މިނިސްޓަރ ވިދާޅުވިއެވެ.
"މި ވޭތުވެދިޔަ ދުވަސްތަކަށް ބަޅާއިރު ވަރަށް ބޮޑަށް ފާހަގކުރެވެމުންމިދަނީ، އިދިކޮޅު ފަރާތްތަކުން ޣައިރު ޤާނޫނީގޮތުން އެ ހިންގާ ހަރަކާތްތައް ހުއްޓުވުމަށްޓަކައި ފުލުހުން ވަރަށް ޒިންމާދާރުކަމާއެކީގައި، އަދި ވަރަށް ޕްރޮފެޝަނަލްކޮށް އެކަންތައް ކުރައްވަމުން ގެންދަވާތަން. އަދި ރައްޔިތުންނަށް ކުރިމަތިވާ ކޮންމެ ގޮންޖެހުމަކުން އަރައިގަތުމަށްޓަކައި، ދިވެހި ސިފައިން ބަރާބަރަށް ހަރަކާތްތެރިވަމުންދާނެ." ޑިފެންސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ސިޔާސީ ގޮތުން ރާއްޖޭގައި މިހާރު ހިންގާ ހަރަކާތްތައް ފުލުހުން ހުއްޓުވަމުން ގެންދަނީ ވަރަށް ޕްރޮފެޝަނަލްކޮށްކަމަށެވެ. އަދި ޤާނޫނުގެބޭރުން އެއްވެސް ކަމެއް ނުކުރާކަމަށާއި، މިހިނގާ ހުރިހާކަމެއް ހައްލުކުރަނީ ދެ މުއައްސަސާ ރަނގަޅަށް ކޯޑިނޭޓްކޮށްގެންކަމަށް ޑިފެންސް މިނިސްޓަރ އާދަމް ޝަރީފް ޢުމަރު ވިދާޅުވިއެވެ.