އޭޝިޔަން ޕޭސްޓްރީ ކަޕްގައި ފުރަތަމަ ފަހަރަށް ރާއްޖެއިން ބައިވެރިވެއްޖެއެވެ. އަންނަ މަހުގެ 25 ގައި ސިންގަޕޫރުގައި ފަށާ މި މުބާރާތުގައި ދިވެހިރާއްޖެ ތަމްސީލްކުރުމަށް 3 ޝެފުން އަންނަނީ ތައްޔާރުވަމުންނެވެ.
މި މުބާރާތުގައި ރާއްޖެ ތަމްސީލްކުރާނީ ކޮންރަޑް މޯލްޑިވްސް ރަންގަލި އައިލަންޑްގެ ޝެފް އާމިނަތު ހަމީދާއި، ސޮނެވާ ފުށީގެ ޝެފް އިބްރާހިމް ފަރީދުގެ އިތުރުން ހުޅުލެ އައިލެންޑް ހޮޓެލްގެ ޝެފް އިންދްރަ ކުމާރް ލިމްބޫއެވެ.
ޕޭސްޓްރީ ކަޕް އޭޝިއާ އަކީ މި ސަރަހައްދުގެ ޤައުމުތަކުން ގިނަ އަދަދެއްގެ ޝެފުން ބައިވެރިވާ އެގްޒިބިޝަނަކާއެކު ކުރިއަށްގެންދާ މުބާރާތެކެވެ. މުބާރާތުގައި މާކްސް ދިނުމުގައި ބަލާނީ ކެއްކުމުގެ ހުނަރުގެ އިތުރުން، ޑިޒައިން ކުރުމާއި ހުށަހަޅައިދިނުމަށެވެ.މި ތިން ބައިވެރިންގެ ދަތުރު ސްޕޮންސާ ކުރަނީ ބެސްޓް ބައި މޯލްޑިވްސް (ބީބީއެމް) އާއި މޯލްޑިވްސް އެގްޒިބިޝަން އެންޑް ކޮންފަރެންސް ސާވިސް (އެމްއީސީއެސް) އިންނެވެ.
ބީބީއެމުން ބުނީ ފުރަތަމަ ފަހަރަށް ރާއްޖެއިން މިފަދަ ސަރަހައްދީ މުބާރާތެއްގައި ބައިވެރިވާއިރު އެންމެ ބޮޑު އަމާޒަކީ މުބާރާތުގައި ވަރަށް ފުރިހަމައަށް ރާއްޖެ ތަމްސީލުކޮށް ޝަރަފުވެރި މަޤާމެއް ހޯދުން ކަމަށެވެ. ބެސްޓްބައި މޯލްޑިވްސް އަކީ ރާއްޖޭގައި ބާއްވާ ކަލިނަރީ މުބާރާތްތައް އިންތިޒާމްކުރުމުގައިވެސް އިސް ދައުރެއް އަދާކުރާ ކުންފުންޏެކެވެ.