ނުކުޅެދުންތެރިކަން ހުންނަ ފަރާތްތަކަށް ތަފާތު އެހީތެރިކަން ފޯރުކޮށްދީ ހަރަކާތްތައް ހިންގުމަށް މިނިސްޓްރީ އޮފް ޖެންޑަރ އެންޑް ފެމިލީއިން 2 ޖަމިއްޔާއަކާއިއެކު އެއްބަސްވުމުގައި ސޮއިކޮށްފިއެވެ. އެ މިނިސްޓްރީން އެއްބަސްވުމުގައި ސޮއިކޮށްފައިވަނީ މޯލްޑިވްސް އޯޓިޒަމް އެސޯސިއޭޝަން އާއި ބިއުޓިފުލް އައިޒް ޑައުން ސިންޑްރޯމް އެސޯސިއޭޝަން އާއިއެކުއެވެ.
އެއްއަހަރު ދުވަހުގެ މުއްދަތަކަށް ސޮއެކުރި މި ދެ އެއްބަސްވުމުގައި ޖެންޑަރ މިނިސްޓްރީގެ ފަރާތުން ސޮއިކުރެއްވީ އެ މިނިސްޓްރީގެ ޑެޕިއުޓީ މިނިސްޓަރ ލީޝާ މުޙައްމަދެވެ. އަދި މޯލްޑިވްސް އޯޓިޒަމް އެސޯސިއޭޝަންގެ ފަރާތުން ސޮއެކުރެއްވީ އެ އެސޯސިއޭޝަންގެ ޑިރެކްޓަރ އިފްހާމް ހުސައިން އެވެ. ބިއުޓިފުލް އައިޒް ޑައުން ސިންޑްރޯމް އެސޯސިއޭޝަންގެ ފަރާތުން ސޮއެކުރެއްވީ ޗެއަރ ޕާރސަން އާއިޝަތު ޝިފާއެވެ.
މި ދެ ޖަމިއްޔާއާއިއެކު އެމްއޯޔޫއެއްގައި ސޮއެކުރުމުގެ މަޤްސަދަކީ މިޖަމިއްޔާތަކާއި ޖެންޑަރ މިނިސްޓްރީ ގުޅިގެން ނުކުޅެދުންތެރިކަން ހުންނަ ކުދިންނާއި މީހުންނަށް އަމާޒުކޮށްގެން މާލެއާއި އަތޮޅުތެރޭގައި ތަފާތު ހަރަކާތްތައް ހިންގުމެވެ. އަދި ނުކުޅެދުންތެރިކަމާއި ބެހޭގޮތުން ހޭލުންތެރިކަން އިތުރުކުރުމާއި ދާއިރާއިން މީހުން ބިނާކުރުމަށް ތަމްރީން ޕްރޮގުރާމްތައް ހިންގުންވެސް ހިމެނޭކަމަށް މިނިސްޓްރީ އޮފް ޖެންޑަރ އެންޑް ފެމިލީއިން ބުނެއެވެ.