ސްޓެލްކޯގެ ޗެއަރމަންކަމުގައި ރައީސް ޔާމީނު ހުންނެވިއިރު ކޮރަޕްޝަނުގެ ޢަމަލެއް ހިންގަވާފައިވާނަމަ މިއަދު ދިވެހިރާއްޖޭގެ ރައީސުލްޖުމްހޫރިއްޔާކަމުގެ މަޤާމުގައި އެމަނިކުފާނު ނުހުންނަވާނެކަމަށް ސްޓެލްކޯގެ ސީއީއޯ އަޙްމަދު ޒުހޫރު ވިދާޅުވެއްޖެއެވެ.
ޕީއެސްއެމް ނިއުސްއިން ގެނެސްދޭ "ނޭޝަން ފަސްޓް" ޕްރޮގްރާމުގައި ވާހަކަދައްކަވަމުން ސްޓެލްކޯގެ ސީއީއޯ އަޙްމަދު ޒުހޫރު ވިދާޅުވީ، ރައީސް ޔާމީނު ސްޓެލްކޯގެ ޗެއަރމަންކަމުގައި ހުންނަވައި ކޮރަޕްޝަނުގެ ޢަމަލެއް ހިންގަވާފައިވާނަމަ ދެންއައި އެމްޑީޕީ ސަރުކާރުން އެކަން ނުބަލާ ދޫކޮށްނުލާނެކަމަށެވެ. އެމްޑީޕީގެ ވެރިކަމުގައި ހަމައެކަނި ރައީސް ޔާމީނުގެ މައްސަލަތައް ބެލުމަށްޓަކައި ބޮޑު ރިޔާސީ ކޮމިޝަންއެއް އެކުލަވާލާފައިވާކަމަށް ޒުހޫރު ވިދާޅުވިއެވެ.
"އެމްޑީޕީ ސަރުކާރުގައި ތިފަދަ ހުރިހާކަމެއް އިންވެސްޓިގޭޓްކޮށް އެމަނިކުފާނާއިމެދު ފިޔަވަޅު އެޅިފައިވަނީ. ހަމައެކަނި އެމަނިކުފާނުގެ މައްސަލަތައް ބެލުމަށްޓަކައި ބޮޑު ރިޔާސީ ކޮމިޝަނެއް އެކުލަވާލި. އެ ރިޔާސީ ކޮމިޝަނުން ކުރި ޙަރަދު ގިނަ ރައްޔިތުންނަށް ޙިދުމަތްކުރަން ކުރި ޙަރަދަށްވުރެ. އެހެންވީމާ ސްޓެލްކޯގެ ޗެއަރމަންކަމުގައި ރައީސް ޔާމީން ހުންނެވިއިރު ތިފަދަކަމެއް ތިފަދަ ގޮތަކަށް ހިނގާފަ އޮތްނަމަ މިއަދު ރައީސް ޔާމީން ދިވެހިރާއްޖޭގެ ވެރިކަމަކު ނުހުންނެވީސް." ސްޓެލްކޯގެ ސީއީއޯ އަޙްމަދު ޒުހޫރު ވިދާޅުވިއެވެ.
ސްޓެލްކޯގައި ކޮރަޕްޝަނުގެ ޢަމަލެއް އޮތްނަމަ ހެއްކާއިއެކު ވަޑައިގަތުމަށް ޒުހޫރުވަނީ ގޮވާލާފައެވެ. "ނޭޝަން ފަސްޓް" ޕްރޮގްރާމުގައި އިތުރަށް ވާހަކަދައްކަވަމުން ޒުހޫރު ވިދާޅުވީ އެއްވެސް ސިޔާސީ ޙަރަކާތެއްގައި ބައިވެރިވުމަށް ސްޓެލްކޯގެ މުވައްޒަފުންނަށް މަޖުބޫރުކޮށްފައި ނުވާނެކަމަށެވެ. އަދި މުވައްޒަފުންގެ ލާބައާއި މަންފާއަށް އަބަދުވެސް އެ ކުންފުނިން މަސައްކަތްކުރާނެކަމަށް ޒުހޫރު ވިދާޅުވިއެވެ.