2016ވަނަ އަހަރު އަމިއްލަ ޖަމްޢިއްޔާތަކަށް 2.3 މިލިއަން ރުފިޔާ ޚަރަދުކޮށްފައިވާކަމަށް ހޯމް މިނިސްޓަރ އަޒްލީން އަޙްމަދު ވިދާޅުވެއްޖެއެވެ.
މިނިސްޓަރ ވިދާޅުވީ މިއީ އަމިއްލަ ޖަމްޢިއްޔާތައް ހިންގުމަށް ސަރުކާރުން ދީފައިވާ ހިލޭ އެހީކަމަށެވެ. އެގޮތުން އެހީދިނުމުގައި ލިބެންހުރި ވަސީލަތްތަކުން، މެދުކެނޑުމެއްނެތި ހިންގަމުންދާ އެންޖީއޯތަކަށް އިސްކަންދީ އެހީދީފައިވާކަމަށް މިނިސްޓަރ ވިދާޅުވިއެވެ.
މިނިސްޓަރ މިހެން ވިދާޅުވީ އީ.ބީ.ޕީ ހެލްތް ޗެންޕިއަންސް މޯލްޑިވްސްގެ ފަރާތުން ބޭއްވި ވާކްސޮޕް "އެވިޑެންސް ބޭސް ޕްރެކްޓިސް ވަރކްޝޮޕް" ނިންމައި ބައިވެރިންނަށް ސެޓްފިކެޓް ހަވާލުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.
މި މަސައްކަތު ބައްދަލުވުމަކީ ބަލިމީހުންނަށް ދޭ ފަރުވާއަކީ އެމީހަކަށް އެންމެ އެކަށީގެންވާ ވޭންކުޑަ ފަރުވާއެއްތޯ ދެނެގަތުމަށް އެވިޑެންސްޑް ބޭސް ރިސާރޗް މެދުވެރިކޮށް ދެނެގަންނާނެ ގޮތްތައް ދަސްކޮށްދިނުމަށް ކުރިއަށްގެންދިޔަ މަސައްކަތު ބައްދަލުވުމެކެވެ. މި މަސައްކަތު ބައްދަލުވުމުގައި ބަލިމީހުންނަށް ފަރުވާދިނުމުގައި ބޭނުންކުރެވިދާނެ ޒަމާނީ ވަސީލަތްތަކާއި، ގޮތްތަކާއި ގުޅޭގޮތުންވެސް މަޢުލޫމާތުދީފައިވެއެވެ.
މި ތަމްރީން ޕްރޮގްރާމްގެ ބައިވެރިންވަނީ ސިއްޙީ ފަރުވާދިނުމުގައި އިތުރަށް ސަމާލުވެވިދާނެ ގޮތްތަކާއި ގުޅޭގޮތުން ރިސަރޗް ޕޭޕަރުތަކެއް ހުށައަޅާފައެވެ. އަދި މިއިން އެންމެ ރަނގަޅު ތިން ޕޭޕަރު ހުށައެޅި ފަރާތްތަކަށްވަނީ އިންޓަރނޭޝަނަލް ކޮންފަރެންސް އީ.ބީ.ޕީގައި ރިސަރޗް ޕޭޕަރުތައް ހުށައެޅުމުގެ ފުރުސަތު ދީފައެވެ. މި ކޮންފަރެންސްއަކީ އީ.ބީ.ޕީ ހެލްތް ޗެންޕިއަންސް މޯލްޑިވްސްއިން އިންތިޒާމްކޮށްގެން، ޔޫކޭ، ނެދަލޭންޑްސް، ސައުދީޢަރަބިއްޔާ ފަދަ ޤައުމުތަކުގެ ސިއްޙީ ދާއިރާގައި ހަރަކާތްތެރިވާ ފަރާތްތަކާއިއެކު ބާއްވާ ކޮންފަރެންސްއެކެވެ.
އީބީޕީ މަސައްކަތު ބައްދަލުވުމުގައި ޖުމްލަ 20 ފަރާތުންވަނީ ބައިވެރިވެފައެވެ. އޭގެތެރޭގައި 19 ނަރުހުންނާއި ޑޮކްޓަރަކު ހިމެނެއެވެ. މި މަސައްކަތު ބައްދަލުވުމުގައި ބައިވެރިވެފައިވަނީ އައިޖީއެމްއެޗާއި، ހުޅުމާލެ ހޮސްޕިޓަލާއި، ފެކަލްޓީ އޮފް ނަރސިންގއާއި، ހެލްތް މިނިސްޓްރީގައި މަސައްކަތްކުރާ ފަރާތްތަކުންނެވެ.