މޯލްޑިވްސް ނޭޝަނަލް ޔުނިވަރސިޓީގެ މި އަހަރުގެ ފުރަތަމަ ޓާމަށް ހުޅުވާލި ސްކޮލަރޝިޕްތަކަށް ހޮވުނު ދަރިވަރުންނަށް ލިޔުން ހަވާލުކޮށްފިއެވެ. 24 ދަރިވަރަކަށް ސްކޮލަރޝިޕް ދީފައިވާއިރު 1 ދަރިވަރަކަށްވަނީ ޝަހީދު އެވޯޑް ދީފައެވެ.
ޤައުމީ ޔުނިވަރސިޓީގެ ސްކޮލަރޝިޕް ފުރުޞަތުތަކަކީ މަތީ ތަޢުލީމަށް ކިޔެވުމަށް ބޭނުންވާ ފެންވަރު ހުރިނަމަވެސް މާލީގޮތުންނާއި އެކި ގޮތްގޮތުން މަތީ ތަޢުލީމަށް ކިޔެވުމަށް ދަތިވެފައިވާ ފަރާތްތަކަށް އެ ފުރުޞަތު ފަހިކޮށްދިނުމުގެ ގޮތުން އެ ޔުނިވަރސިޓީން ދޭ ފުރުޞަތުތަކެކެވެ.
މޯލްޑިވްސް ނޭޝަނަލް ޔުނިވާސިޓީ އޮޑިޓޯރިއަމްގައި ބޭއްވި ރަސްމިއްޔާތުގައި މިއަހަރު ސްކޮލަރޝިޕް ލިބުނު 24 ދަރިވަރަކަށް ވަނީ ލިޔުން ހަވާލުކޮށްފައެވެ. އޭގެތެރޭގައި 20 ދަރިވަރަކަށް ޓިއުޝަން ފީ ލިބޭ ސްކޮލަރޝިޕް ދީފައިވާއިރު އަންޑަރ ގުރެޖުއޭޓް އަދި ފޯސްޓް ގުރެޖުއޭޓަށް ކިޔަވާ 4 ދަރިވަރަކަށް ފުލް ސްކޮލަރޝިޕްވަނީ ދީފައެވެ.
މީގެއިތުރުން އެ ޔުނިވަރސިޓީގެ މާސްޓާރ އޮފް ބިޒްނަސް އެޑްމިނިސްޓްރޭޝަން ކިޔަވަމުންދާ ދަރިވަރެއްކަމަށްވާ ޙުސެއިން ޝަރީފަށްވަނީ ސަހީދު އެވޯޑްދީފައެވެ. ޝަހީދު އެވޯޑަކީ 3 ނޮވެމްބަރ ގައި ޝަހީދުވި ފަރާތްތަކުގެ ހަނދާން އާކުރުމުގެ ގޮތުން، ޤައުމީ ޔުނިވަރސިޓީގެ އެންމެ މަތީ ފަންތީގެ ކޯސްތައް ކިޔަވާ ދަރިވަރުންގެ ތެރެއިން އެންމެ ރަނގަޅު ނަތީޖާ ޙާސިލްކުރާ ކުދިންނަށް ރައީސުލްޖުމްހޫރިއްޔާގެ އޮފީހުން 1999 ވަނަ އަހަރުން ފެށިގެން ދޭ އެވޯޑެކެވެ.
ސްކޮލަރޝިޕް ލިބުނު ދަރިވަރުންނަށް ލިޔުން ހަވާލުކުރުމުގެ ރަސްމިއްޔާތުގައި ވާހަކަދައްކަވަމުން ޤައުމީ ޔުނިވަރސިޓީގެ ކައުންސިލް މެންބަރ ޑރ.ފާތިމަތު ނަޒްލާ ރަފީޤް ވިދާޅުވީ ވަޒީފާގެ މާހައުލަށް ނިކުތުމަށްފަހު މީހާ ކުރިއަރައިގެންދާނީ ހަމައެކަނި އަތުގައި އޮންނަ ސެޓްފިކެޓަކުން ނޫންކަމަށެވެ. ސެޓްފިކެޓާއެކު އިލްމުވެސް މުހިންމުކަމަށް ނަޒްލާ ވިދާޅުވިއެވެ.
"އަޅުގަނޑަށްވެސް އެނގޭ ސެޓްފިކެޓްސް. ޑިގްރީސް މާސްޓާރސް މިއީ މުހިންމު އެއްޗެއް. ވަޒީފާގެ ބާޒާރުގަ ވަރަށް މުހިންމު ހަމަ އެ ކަރުދާސް. ވަޒީފާއަށް ނިކުތުމަށްފަހު މީހާ ކުރިއަށްދަނީކީ، މީހާއަށް މީހުންގެ ރެސްޕެކްޓް ލިބެނީކީ، ޤަދަރު މީހުން ކުރަނީކީ ހަމައެކަނީ އޭނަގެ ޑިޤްރީއެއް އޮންނާތީއެއްނޫން. އެއަށްވުރެ ބޮޑަށް އެމީހަކަށް އެނގޭ ނޮލެޖް."ޑރ ފާތިމަތު ނަޒްލާ ވިދާޅުވިއެވެ.
ސްކޮލަރޝިޕް ލިބުނު ދަރިވަރުންނާއި މުޚާތަބުކޮށް ވާހަކަދައްކަވަމުން ޤައުމީ ޔުނިވަރސިޓީގެ ވައިސް ޗާންސެލަރ އައިޝަތު ޝާހީން ވިދާޅުވީ ސްކޮލަރޝިޕް ލިބުނު ދަރިވަރުންނަކީ ޤައުމީ އަދި ޔުނިވަރސިޓީ ފެންވަރުގައިވެސް ތަފާތު ދައްކާގެ ކުދިންތަކަކަށް ވާނެކަމަށް އުންމީދުކުރާކަމަށެވެ. އަދި ސުކޫލް ދައުރުގައި ހޯދި ކާމިޔާމީއާއި އެއްފަދަ ކާމިޔާބީއެއް ޔުނިވަރސިޓީގައިވެސް ހޯދުމަށް އައިޝަތު ޝާހީން ވިދާޅުވިއެވެ.
"ސްކޮލަރޝިޕް މިއަދު މި ހަވާލުކުރެވޭ ހުރިހާ ދަރިވަރުންވެސް ތަފާތު ދައްކައިދޭނެކަމަށް އަޅުގަނޑު އުންމީދުކުރަން. ދެން މި ތަފާތު ދައްކައިދިނުމަކީ ޤައުމީ ފެންވަރުގައާއި އަދި ޔުނިވަރސިޓީ ފެންވަރުގަ މުޖްތަމައުއަށް ފައިދާހުރި ކަންތައްތައް ކޮށްދިނުމުގަ ތަފާތު ދައްކުވައިދޭނެކަމަށް އަޅުގަނޑު އުންމީދުކުރަން." ޤައުމީ ޔުނިވަރސިޓީގެ ވައިސް ޗަންސެލަރ އައިޝަތު ޝާހީން ވިދާޅުވިއެވެ.
އެމްއެންޔޫ އިން 2018 ވަނަ އަހަރުގެ ފުރަތަމަ ޓާމަށް ހުޅުވާލި ސްކޮލަރޝިޕްތަކަށްއެދި 207 ދަރިވަރަކު ވަނީ ހުށަހަޅާފައެވެ. ދަރިވަރުންނަށް ސްކޮލަރޝިޕްތައް ދީފައިވަނީ ކުދިންގެ ތައުލީމީ ފެންވަރު ބެލުމަށްފަހު ކަނޑައަޅާފައިވާ ޚާއްސަ ކޮމިޓީއަކުންކަމަށް ޔުނިވަރސިޓީން ބުނެއެވެ.