މިއަހަރަށް ރައްޔިތުންގެ މަޖިލިސް ހުޅުވާ ރައީސުލްޖުމްޙޫރިއްޔާ ރިޔާސީ ބަޔާން އިއްވުން މާދަމާ ބާއްވަން ނިންމައިފިއެވެ. މާދަމާ ރައްޔިތުން މަޖިލީހުގެ ޖަލްސާތައް ފަށާނެކަން އިޢުލާން ކުރެއްވީ ސަރުކާރު ހިންގާ މައި ޕާޓީ ޕީޕީއެމްއިން ރުމާލު ދޭއް ޖަގަހާގައި މިރޭ ބޭއްވި ޖަލްސާގައި އެޕާޓީގެ ޕާލިމަންޓްރީ ގްރޫޕްގެ ލީޑަރ އަދި ވިލިމާލެ ދާއިރާގެ މެމްބަރ އަޙްމަދު ނިހާން ޙުސައިން މަނިކުއެވެ.
ނިހާން ވިދާޅުވީ މާދަމާ ރައްޔިތުންގެ މަޖިލީހުގެ ޖަލްސާތައް މިއަހަރަށް ފަށާނެ ކަމަށެވެ. ނަމަވެސް ޖަލްސާ ފަށާ ގަޑިއެއްވެސް ޖަލްސާ އޮންނާނެ ތަނެއްވެސް ވިދާޅެއްނުވެއެވެ.
"ﷲ ގެ އިރާދަފުޅާއިއެކު ދެން މާދަން ރައްޔިތުން މަޖިލީހުގެ މިއަހަރުގެ ޖަލްސާ މާދަމާގެ ވަގުތެއްގައި، ކޮންމެވެސް އެއް ވަގުތެއްގައި އިރާދަކުރެއްވިއްޔާ މަޖިލީހުގެ އާ ދައުރު ފެށެންވާއިރަށް ރައްޔިތުންނަށް އެންމެ ބޮޑު އުއްމީދެއް ދޭން ތިބި ބަޔަކީ އަޅުގަނޑުމެން،" ނިހާން ވިދާޅުވިއެވެ.
މަޖިލީހުގެ ފުރަތަމަ ދައުރުގެ ފުރަތަމަ ޖަލްސާގައި އޮންނާނީ ޤައުމުގެ ހާލަތު ބަޔާންކޮށްދީ އަދި ޤައުމުގެ ހާލަތު އިތުރަށް ރަނގަޅުކުރުމަށް ކުރަންޖެހޭކަމަށް ރައީސުލްޖުމްހޫރިއްޔާއަށް ފެންނަ ކަންތައްތަކުގެ މައްޗަށް އެކުލެވޭ ރިޔާސީ ބަޔާން ރައީސުލްޖުމްހޫރިއްޔާ މަޖިލީހަށް އިއްވެވުމެވެ.
މާދަމާ ރައްޔިތުންގެ މަޖިލީހުގެ މިއަހަރުގެ ފުރަތަމަ ޖަލްސާ ބާއްވަން ތައްޔާރުވަމުންދާއިރު އެ ޖަލްސާ ފުރަތަމަ ބޭއްވުމަށް ތާވަލުކޮށްފައި އޮތީ މިމަހުގެ 5 ވަނަދުވަހުއެވެ. އެހެންނަމަވެސް ސަލާމަތީ ސަބަބުތަކަށްޓައި އެ ޖަލްސާވަނީ ކެންސަލްކޮށްފައެވެ.
މަޖިލީހުގެ ޤަވާއިދުގައިވާ ގޮތުން ކޮންމެ އަހަރަކަށްވެސް މަޖލިސް ހުޅުވާ ޖަލްސާ ފެބްރުއަރީ މަހެއްގެ ފުރަތަމަ ހަފްތާގައި ބާއްވަންޖެހެއެވެ.
ޤާނޫނު އަސާސީގެ 253ވަނަ މާއްދާގެ ދަށުން ރައީސުލްޖުމްހޫރިއްޔާ ކުއްލި ނުރައްކަލުގެ ޙާލަތު އިޢުލާން ކުރި ޤަރާރާއި ކުއްލި ނުރައްކަލުގެ ޙާލަތުގެ މުއްދަތު އިތުރުކުރުމަށް ހުށައެޅި ހުށައެޅުން ފާސްކުރުމަށް ދައުރުން ބޭރުން މަޖިލީހުގެ ދެ ޖަލްސާއެއް ވަނީ ދައުރުން ބޭރުން ބާއްވާފައެވެ.
މިއަހަރަށް ރައްޔިތުންގެ މަޖލިސް ހުޅުވުމާއިއެކު ސާޅީސް ފަސް ބިލެއް ސަރުކާރުން ރައްޔިތުންގެ މަޖިލީހަށް ހުށައަޅުއްވާނެ ކަމަށް ބަންޑާރަ ނައިބް މުޙައްމަދު އަނިލް ވަނީ ވިދާޅުވެފައެވެ. މީގެއިތުރުން ބަޣާވާތް ކުރުމާއި ރިޝްވަތު ދިނުމުގެ ކުށަކީ ވަކި ކުށްތަކެއްގެ ގޮތުގައި ކަނޑައެޅުމަށް ޤާނޫނުލް އުޤޫބާތަށް ދެ އިޞްލާޙް ހުށަހަޅުއްވާކެމަށްވެސް ބަންޑާރަ ނައިބް ވިދާޅުވިއެވެ. އަދި ވޭތުވެދިޔަ އިންތިޚާބުތަކުގައި އަމަލުކުރި ސުޕްރީމް ކޯޓުގެ ގައިޑްލައިނާއި އިންތިޚާބުތަކުގެ އޮބްޒާވަރުން ފާހަގަކުރެއްވި ކަންކަމަށް ރިޢާޔަތްކޮށް އިންތިޚާބުތަކާބެހޭ ޤާނޫނަށް ގިނަ އިސްލާޙުތަކެއް ގެންނަވަން ވަނީ ނިންމަވާފައެވެ.