ރާއްޖޭގެ ކަނޑުގެ ސަރަޙައްދުގައި ބޭރު ޤައުމެއްގެ އަސްކަރީ އުޅަނދުތަކެއް ހަރަކާތްތެރިވަމުންދާކަމަށް ބުނެ ފަތުރުމުންދާ ޙަބަރުތައް ޑިފެންސް މިނިސްޓަރ ޢާދަމް ޝަރީފް އުމަރު ދޮގުކުރައްވައިފިއެވެ.ޑިފެންސް މިނިސްޓަރ ވިދާޅުވީ، ރާއްޖޭގެ ޙާއްސަ އިޤްތިޞާދީ ސަރަޙައްދާއި ސިޔާސީ ސަރަޙައްދުގައި ބޭރުގެ އަސްކަރީ އުޅަނދުތަކެއް އުޅެމުންދާކަމަށް ބުނެ ފަތުރަމުންދަނީ ހަޤީޤަތާއި ޚިލާފު މަޢުލޫމާތުތަކެއްކަމަށެވެ.ޕީ.އެސް.އެމް ނިއުސްއަށް ދެއްވި ޙާއްސަ އިންޓަރވިއުއެއްގައި ޑިފެންސް މިނިސްޓަރ އާދަމް ޝަރީފް އުމަރު ވިދާޅުވީ، ރާއްޖޭގެ ކަނޑުގެ ސަރަޙައްދުގައި ބޭރު ޤައުމެއްގެ އަސްކަރީ އުޅަނދުތަކެއް ހަރަކާތްތެރިވަމުންދާ ކަމަށްބުނެ ފަތުރަމުންދަނީ ހަޤީޤަތާއި ޚިލާފު މަޢުލޫމާތުތަކެއްކަމަށެވެ. އަދި ރާއްޖޭގެ ސިޔާސީ މަސްރަހު ހަލަބޮލިވެފައިވާ މިފަދަ ދަނޑިވަޅެއްގައި ސިޔާސީ މަންފާއެއް ޙާސިލްކުރުމުގެ މަޤްޞަދުގައި ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް ހަޤީޤަތާއި ޚިލާފު ޙަބަރުތައް ނުފެތުރުމަށް މިނިސްޓަރ ގޮވާލެއްވެވިއެވެ. ޑިފެންސް މިނިސްޓަރ ވިދާޅުވީ، ރާއްޖޭގެ ޙާއްސަ އިޤްތިޞާދީ ސަރަޙައްދާއި، ސިޔާސީ ސަރަޙައްދު ބެލެހެއްޓުމުގެ މަސައްކަތް ރާއްޖޭގެ ޤައުމީ ދިފާޢީ ބާރުން ވަރަށް ފުރިހަމައަށް ބަލަމުންދާކަމަށެވެ. އަދި ރާއްޖޭގެ ކަނޑުގެ ސަރަޙައްދުގައި ބޭރުގެ އަސްކަރީ އުޅަނދުތަކެއް ހަރަކާތްތެރިވާކަމުގެ މަޢުލޫމާތެއް ނުވަތަ އެފަދަ އިޝާރާތެއް ޑިފެންސް މިނިސްޓްރީއަށް ލިބިވަޑައިގެންފައިނުވާކަމަށްވެސް މިނިސްޓަރ ވިދާޅުވިއެވެ."އިންޑިއާ ކަނޑަކީ ވަރަށް ބޮޑު ކަނޑެއް. ރާއްޖެއަށް މިއޮންނަ ޙާއްސަ އިޤްތިޞާދީ ސަރަޙައްދަކީ ދުއިސައްތަ މޭލު ރާއްޖެއިން ފެށިގެން. އަޅުގަނޑުމެންގެ ސިޔާސީ ސަރަހައްދަކަށް މި އިންނަނީ ބާރަ މޭލު ދުރުން. ރާއްޖޭގެ ކޯސްޓްގާޑުން މިދަނީ ވަރަށް ރަނގަޅަށް ރާއްޖޭގެ ކަނޑުގެ ސަރަޙައްދު ބަލަހައްޓަމުން. ރާއްޖޭގެ ކަނޑުގެ ސަރަޙައްދެއްގައި ބޭރުގެ އަސްކަރީ އުޅަނދުތަކެއް އުޅޭކަމުގެ މަޢުލޫމާތެއް އަޅުގަނޑުމެންނަށް ލިބިފައެއްނެތް. އަދި މި ޙާލަތުގައި އަޅުގަނޑުމެންނަށް ފާހަގަކުރެވޭ އަނެއްކަމަކީ ރާއްޖޭގައި މި ސިޔާސީ ހަލަބޮލިކަން އުފެދުމާއެކީގައި އިންޑިއާގެ މަނަވަރުތަކެއްވެސް ރާއްޖެއަށް އައުމަށްޓަކާ ތައްޔާރުވެގެންދިޔަ ޙަބަރު ފެތުރިގެންދިޔަ. ނަމަވެސް އިންޑިއާއިންވެސް ސީދާ އެފަދަ އަމަލެއް ހިންގިކަމުގެ މަޢުލޫމާތެއް ލިބިފައެއްނެތް" ޑިފެންސް މިނިސްޓަރ ޢާދަމް ޝަރީފް އުމަރު ވިދާޅުވިއެވެ.ޑިފެންސް މިނިސްޓަރ އާދަމް ޝަރީފް އުމަރު ވިދާޅުވީ، ރާއްޖޭގައި އުފެދިގެން އުޅެނީ ދުސްތޫރީ މައްސަތަކެއް ކަމަށާއި، މިއީ ބޭރުގެ ފަރާތްތަކުން އެކަމަށް ނުފޫޒު ފޯރުވައި، ބަސްބުނަން ޖެހޭ މައްސަލަތަކެއް ނޫންކަމަށެވެ. އަދި މިނިވަން މުސްތަޤިއްލު ޤައުމަކަށް އެ ޤައުމެއްގެ ތެރޭގައި ހިނގާ ދާޙިލީ ކަންކަމުގެ ތެރެއަށް ވަނުމަށްޓަކާ ޤައުމެއް ހިޞާރުކުރުމަކީ ބައިނަލްއަޤްވާމީ ޤަރާރުތަކާއި، ދުނިޔޭގެ ސުލްޙަޔަށް ލޯބިކުރާ އެއްވެސް ޤައުމަކުން އެއްވެސް ހާލެއްގައި ބަލައިގަންނާނެކަމެއް ނޫންކަމަށެވެ. އެހެންކަމުން ރާއްޖޭގެ މިނިވަންކަން ގެއްލުވާލުމަށް ހިތްވަރު ލިބޭނޭހެން ވާހަކަތައް ނުފެތުރުމަށާއި، ޤައުމީ މަސްލަޙަތު އިސްކުރެއްވުމަށްވެސް ޑިފެންސް މިނިސްޓަރ ވަނީ ގޮވާލައްވާފައެވެ."ދުނިޔޭގެ ޙާއްސަކޮށް އދ. ގައި މިހާރު ހެދިފައިހުރި ނިޒާމްތަކަށް ބަލާއިރުގައިވެސް މިނިވަން މުސްތަޤިއްލު ޤައުމަކަށް، އެ ޤައުމެއްގެ ތެރޭގައި ހިނގާ ދާހިލީ ކަންތައްތަކުގެ ތެރެއަށް ވަނުމަށްޓަކާ، ޤައުމެއް ހިޞާރުކޮށް ނުވަތަ ޤައުމަކަށް އަރައިގަންނާކަށެއް އދ. އަކުންވެސް އަދި ދުނިޔޭގެ ސުލްހަޔަށް ލޯބިކުރާ ތަޙްޒީބުވެފައިވާ އެއްވެސް ޤައުމަކުން ބޭނުންވާނެކަމެއް ނޫން އެއީކީ. ރާއްޖޭގައި މިހާރު އުފެދިގެން މިއުޅޭ މައްސަލައަކީ ކަނޑިއަކުން ނުވަތަ ބަނޑިއަކުން ނުވަތަ ހަނގުރާމައަކުން މައްސަލަތައް ހައްލުކުރަންޖެހޭ ކަހަލަ މައްސަލައެއް ނޫން" ޑިފެންސް މިނިސްޓަރ ޢާދަމް ޝަރީފް އުމަރު ވިދާޅުވިއެވެ.ރާއްޖޭގެ ކަނޑުގެ ސަރަޙައްދުގައި ބޭރުގެ އަސްކަރީ އުޅަނދުތަކެއް ހަރަކާތްތެރިވަމުންދާކަމަށް ބުނެ ފަތުރަމުންދާ ޙަބަރު ޑިފެންސް މިނިސްޓްރީން ދޮގުކޮށްފައިވާއިރު، ރާއްޖެއަށް އިންޑިއާ ސިފައިން އަރަން އުޅޭކަމަށް ބުނެ ދާދި ފަހުންވެސް މީޑިއާތަކުގައި ދޮގު މަޢުލޫމާތުތަކެއް ފަތުރާފައިވާކަން ފާހަގަކޮށްލަންޖެހެއެވެ. ރާއްޖޭގައި ސިޔާސީ ހަލަބޮލިކަން އުފެދިފައިވާ ދުވަސްވަރެއްގައި ޤައުމީ ސަލާމަތަށް ނުރައްކާވެ، ރާއްޖޭގެ މިނިވަންކަމަށް ބުރޫއަރާފަދަ ވާހަކަތައް ނުފެތުރުމަށް ޑިފެންސް މިނިސްޓްރީން ވަނީ އިލްތިމާސްކުރައްވާފައެވެ. އަދި ބޭރުގެ އެއްވެސް އަސްކަރީ ބާރެއްގެ ނުފޫޒު ރާއްޖެއަށް ފޯރުވުމަށް ހިތްވަރު ލިބޭފަދަ ގޮތްގޮތަށް ވާހަކަ ނުފެތުރުވުމަށްވެސް އެ މިނިސްޓްރީން އިލްތިމާސްކުރައްވާފައިވެއެވެ.