ބޭންކް އޮފް މޯލްޑިވްސްގެ މުވައްޒަފުން ޗެރިޓީ ރަންއެއް ބާއްވާ 3 ޖަމިއްޔާއަކަށް ފައިސާގެ އެހީދީފިއެވެ.
ބީއެމްއެލްގެ ޗެރިޓީ ރަންގައި ފައިސާގެ އެހީ ދީފައިވަނީ މޯލްޑިވްސް އޯޓިޒަމް އެސޯސިއޭޝަން، މޯލްޑިވްސް އެސޯސިއޭޝަން އޮފް ފިސިކަލް ޑިސޭބަލްސް އާއި ބިއުޓިފުލް އައިސް ޑައުންސިންޑްރޯމް އެސޯސިއޭޝަނަށްށެވެ. ފައިސާގެ އެހީ ގޮތުގައި ބޭންކުންވަނީ އެ ޖަމްއިއްޔާތަކަށް 90,000 ރުފިޔާ ދީފައެވެ. ބޭންކުގެ ފަރާތުން ރަމްޒީ ޗެކް ހަވާލުކޮށްދެއްވީ ބީއެމްއެލްގެ ސީއީއޯ އަދި މެނޭޖިން ޑައިރެކްޓަރ އެންޑްރޫ ހީލީ އެވެ.
"ބީއެމްއެލް ސްޓާފް ޗެރިޓީ ރަން" ގެ ނަމުގައި ބޭއްވި މި ހަރަކާތަކީ މުޖުތަމައަށް ފައިދާހުރި ހަރަކާތްތައް ހިންގާ ޖަމިއްޔާ ޖަމާއަތްތަކަށް އެހީވުމަށް ބޭންކުން ކޮންމެ އަހަރަކުވެސް ބާއްވާ ހަރަކާތެކެވެ. މި ދުވުމުގައި މިއަހަރު އެ ބޭންކުގެ 200 މުވައްޒަފުން ވަނީ ބައިވެރިވެފައެވެ.
މިދުވުން ބޭއްވީ ހުޅުމާލޭ ސެންޓްރަލް ޕާކު ކުރިމަތިންނެވެ. ދުވުން ނިންމާލީވެސް ސެންޓްރަލް ޕާކު ސަރަހައްދަށެވެ.
"އަހަރެންގެ ބޭންކް" ކެންޕެއިންގެ ދަށުން ފެބްރުވަރީ މަހުގެ ކޮންމެ ދުވަހެއްގައި އަދި މުޅި އަހަރުތެރޭގައި ތައުލީމް، ކުޅިވަރު، ތިމާވެށީގެ އެކިއެކި ހަރަކާތްތަކަށާއި ހިލޭ ސާބަހަށް މަސައްކަތްކުރާ ފަރާތްތަކަށް ބޭންކުގެ އެހީތެރިކަން ފޯރުކޮށްދިނުމަށް ވަނީ ނިންމާފައެވެ.