200 ބައިވެރިންނާއެކު "މޯލްޑިވްސް މާކެޓަރސް ފޯރަމް" ފަށައިފިއެވެ.
ވިޔަފާރިއާއި މާކެޓިންގ ދާއިރާގައި ހަރަކާތްތެރިވާ ފަރާތްތަކަށް ޢަމާޒުކޮށްގެން ކޯޕަރޭޓް މޯލްޑިވްސް އެކަޑަމީ (ސީއެމްއޭ) އިން ރާއްޖޭގައި ބާއްވާ ފުރަތަމަ މޯލްޑިވްސް މާކެޓަރސް ފޯރަމް ކުރިއަށްދަނީ މޯލްޑިވްސް ނޭޝަނަލް ޔުނިވަރސިޓީގެ ބިޒްނަސް ސުކޫލް އޮޑިޓޯރިއަމްގައެވެ.
"މޯލްޑިވްސް މާކެޓަރސް ފޯރަމް" އާއި ބެހޭގޮތުން ޕީއެސްއެމް ނިއުސްއަށް މައުލޫމާތުދެއްވަމުން ސީއެމްއޭގެ ސީއީއޯ އިލްޔާސް ހަނީފް ވިދާޅުވީ، މި ފޯރަމް ބޭއްވުމުގެ މައިގަނޑު މަޤްސަދަކީ، ރާއްޖޭގެ މާކެޓިންގ އިންޑަރސްޓްރީ ފުޅާވަމުން އަންނައިރު މި ދާއިރާގައި މަސައްކަތްކުރާ މީހުން އެއްތަނަކުން ބައްދަލުވުމުގެ ފުރުޞަތު ހޯދައިދީ މި ދާއިރާ އިތުރަށް ތަރައްޤީ ކުރުންކަމަށެވެ. މި ފޯރަމްގައި ރާއްޖެއާއި އަދި ރާއްޖެއިން ބޭރުގެ ކަމާގުޅުންހުރި ފަންނީ މާހިރުން ޕްރެޒެންޓޭޝަންތައް ހުށަހަޅައިދީ ޕެނަލް ޑިސްކަޝަންތައް ކުރިއަށްގެންގޮސް އެމީހުންގެ ތަޖުރިބާ ހިއްސާކުރާނެކަމަށްވެސް ހަނީފް ވިދާޅުވިއެވެ.
"މޯލްޑިވްސް މާކެޓާސް ފޯރަމް" ގައި 3 ދާއިރާއަކުން ރާއްޖެއާއި ރާއްޖެއިން ބޭރުގެ ކަމާބެހޭ ތަޖުރިބާކާރު ބޭފުޅުން މައުލޫމާތު ދެއްވާނެއެވެ. މީގެ ތެރޭގައި މާކެޓިންގ ސްޓްރެޓެޖީއާއި، މާކެޓިންގ ގައި ސައިކޮލޮޖީ ބޭނުންކުރާނެ ގޮތްތަކާއި، ޑިޖިޓަލް މާކެޓިން ހިމެނެއެވެ.
ފޯރަމްގައި ބައިވެރިވި ބައެއް ފަރާތްތަކުން ބުނީ މި ފޯރަމްގެ ތެރެއިން ގިނަ ކަންތައްތަކެއް ދަސްވެގެންދިޔަކަމަށެވެ.
"މޯލްޑިވްސް މާކެޓާސް ފޯރަމް" ކޮންމެ އަހަރަކު އެއްފަހަރު ބާއްވާނެކަމަށް ކޯޕަރޭޓް މޯލްޑިވްސް އެކަޑަމީން ބުނެއެވެ.