ބަޖެޓް ތަންފިޒްކުރުމާއިގުޅޭ މުޢާމަލާތްތައް އިލެކްޓްރޯނިކް ވިއުގައަކުން ގުޅާލުމަށް ފިނޭންސް މިނިސްޓްރީން ތައާރަފްކޮށްފައިވާ "ބަނޑޭރި ޕޯޓަލް" އަންނަ އާދިއްތަ ދުވަހު ރަސްމީކޮށް ބޭނުންކުރަންފަށާނެކަމަށް އެ މިނިސްޓްރީން ބުނެފިއެވެ. ފިނޭންސް މިނިސްޓްރީން ނެރެފައިވާ ސަރކިއުލަރގައި ބުނެފައިވަނީ އާދިއްތަ ދުވަހުން ފެށިގެން އެ މިނިސްޓްރީއަށް ހުށަހަޅަންޖެހޭ ލިޔެކިޔުންތަކަށް އެ މިނިސްޓްރީން ޖަވާބު ދިނުމަށް ހަމަޖެހިފައިވަނީ "ބަނޑޭރި ޕޯޓަލް" މެދުވެރިކޮށްކަމަށެވެ. އެހެންކަމުން އެފަދަ ލިޔެކިޔުންތައް ފޯޓަލް މެދުވެރިކޮށް މިނިސްޓްރީއަށް ހުށަހަޅާދިނުމަށް އެ މިނިސްޓްރީން އެދޭކަމަށް އެ ސަރކިއުލާގައި ބުނެފައިވެއެވެ.
ބަނޑޭރި ޕޯޓަލް ބޭނުންކުރަން ފެށުމާއިއެކު މިހާރު ފިނޭންސް މިނިސްޓްރީއާއިއެކު ބަދަލުކުރެވޭ ލިޔެކިޔުންތައް އިލެކްޓްރޯނިކް ނިޒާމެއްގެދަށުން ބަދަލުކުރެވިގެންދާނެއެވެ. ފިނޭންސް މިނިސްޓްރީން މަޢުލޫމަތުދޭގޮތުގައި މި ޕޯޓަލް މެދުވެރިކޮށް ފިނޭންސް މިނިސްޓްރީއާއިއެކު ކުރާ މުޢާމަލާތްތައް އަވަސްވެ، މުޅި ދަޢުލަރުގެ މާލީ ނިޒާމުގެ ހިންގުން އަވަސްވެ ޚިދުމަތް ހަރުދަނާވެގެންދާނެކަމަށް ފިނޭންސް މިނިސްޓްރީން ބުނެއެވެ.
އެގޮތުން ކުރިއާއި ޚިލާފަށް، ބަޖެޓާއި ގުޅޭގޮތުން ހުށައެޅޭ އެކިއެކި ހުށައެޅުންތައް ފިނޭސް މިނިސްޓްރީން ބޭނުންވާ ފޯމެޓްއާއި އެއްގޮތަށް ހުށައެޅުމުގެ ފުރުސަތު ޕޯޓަލް މެދުވެރިކޮށްް ފަހިވެގެންދާނއެވެެ. މި ޕޯޓަލް މެދުވެރިކޮށް ތިންބާވަތެއްގެ ހުށައެޅުންތައް އޮފިސްތަކުން ފިނޭންސް މިނިސްޓްރީއަށް ހުށައެޅޭނއެވެެ. އެއީ ބަޖެޓުގެ އެއް ކޯޑުން އަނެއް ކޯޑަށް ފައިސާ ބަދަލުކުރުމާއި، އެޑްވާންސް ފަންޑުން ފައިސާ ހޯދުން ނުވަތަ ބަޖެޓު އިތުރުކުރުމާއި، ޚިދުމަތް ހޯދުމަށް ވަކި ފަރާތަކާއި ހަވާލުކުރުމަށް ހުށައަލާ ހުށައެޅުންތަކެވެ.