ދައުލަތުގެ ލިޔެކިޔުންތައް ބެލެހެއްޓުމާއިބެހޭ އުޞޫލެއް އެކުލަވާލުމަށް ދިވެހިރާއްޖޭގެ ޤައުމީ އަރުޝީފާއި، އިންފޮމޭޝަން ކޮމިޝަނަރުގެ އޮފީހާއި ދެމެދު އެއްބަސްވުމެއްގައި ސޮއިކޮށްފިއެވެ.
އިންފޮމޭޝަން ކޮމިޝަނަރުގެ އޮފީހުގައި ބޭއްވި ރަސްމިއްޔާތެއްގައި މި އެއްބަސްވުމުގައި އެ ކޮމިޝަންގެ ފަރާތުން ސޮއިކުރެއްވީ އިންޕޮމޭޝަން ކޮމިޝަނަރު އަބްދުލް އަޒީޒް ޖަމާލު އަބޫބަކުރުއެވެ. އަދި ދިވެހިރާއްޖޭގެ ޤައުމީ އަރުޝީފްގެ ފަރާތުން ސޮއިކުރެއްވީ ޑިރެކްޓަރ ޖެނެރަލް މުޙައްމަދު ޝާތިރުއެވެ.
ސޮއިކުރެއްވުމަށްފަހު ވާހަކަދައްކަވަމުން މުޙައްމަދު ޝާތިރު ވިދާޅުވީ މި އެއްބަސްވުމުގެ ސަބަބުން ދައުލަތުގެ މުއައްސަސާތައް ހިންގުން ހަރުދަނާވެ ޚިދުމަތް ދިނުމުގައި ލުއިފަސޭހަތަކެއް ލިބިގެންދާނެކަމަށެވެ. އަދި ދައުލަތުގެ ލިއެކިޔުންތައް ބަލަހައްޓާނެ އުސޫލެއް މި އެއްބަސްވުމުގެ ދަށުން އެކަށައަޅާނެކަމަށްވެސް ޝާތިރު ވިދާޅުވިއެވެ.
"މިކަމަކީ މިކަން ފުރިހަމަވުމަށްފަހު ދައުލަތުގެ ހިންގުން ވަރަށް ބޮޑަށް ހަރުދަނާވެގެންދާނެކަމެއް. އެއީ ދައުލަތުގެ ލިއެކިޔުންތައް ބަލަހައްޓާނެގޮތް ނުވަތަ ޕަބްލިކް ރިކޯޑްސް މެނޭޖްމަންޓް ޕޮލިސީއެއް ކަނޑައެޅޭއިރު އޭގަ ވަރަށް ތަފްސީލުކޮށް އެކި ބައިތައް ހިމެނޭނެ." މުޙައްމަދު ޝާތިރު ވިދާޅުވިއެވެ.
މި އުސޫލު އެކުލަވާލުމުގެ މަސައްކަތް އަންނަ ހަފްތާތެރޭގައި ފެށޭނެކަމަށް އިންފޮމޭޝަން ކޮމިޝަނަރުގެ އޮފީހުން ބުނެއެވެ.