ދިރާސީ އާ އަހަރަށްޓަކާ ދަރިވަރުންނާއި، މުދައްރިސުންނަށް ސްކޫލްތަކުން ވަނީ ހޫނު މަރުޙަބާއެއް ކިޔާފައިއެވެ ރާއްޖޭގެ 217 ސްކޫލެއްގައި މިއަދު ކިޔެވުން ފަށާފައިވާއިރު، ދިރާސީ އާ އަހަރަށް ދަރިވަރުންނާއި، ޓީޗަރުން ކުރިމަތިލީ އާ އުއްމީދުތަކާއި، ލަނޑުދަނޑިތަކަކާއެކުއެވެ.
މިއަހަރުގެ ދިރާސީ އާ އަހަރު ރާއްޖޭގެ ހުރިހާ ސްކޫލެއްގައި އަށްޑިހަ އެއްހާހަށްވުރެ ގިނަ ދަރިވަރުން ތައުލީމް ހާސިލްކުރާނެކަމަށް އެޑިއުކޭޝަން މިނިސްޓްރީން ވިދާޅުވެއެވެ. މި ދަރިވަރުންނަށް ކިޔަވައިދެއްވުމަށްޓަކާ އަށްހާސް ފަސްސަތޭކައަށްވުރެ ގިނަ ޓީޗަރުން ޙަރަކާތްތެރި ވާނެކަމަށްވެސް އެޑިއުކޭޝަން މިނިސްޓްރީން ވިދާޅުވެއެވެ. ދިރާސީ އާ އަހަރުގެ ކިޔެވުން ރާއްޖޭގެ ހުރިހާ ސްކޫލެއްގައި ފަށާފައިވާއިރު، ދަރިވަރުންނަށާއި، ޓީޗަރުންނަށްޓަކާ ސްކޫލްތައް ވަނީ ވަރަށް ބޮޑަށް ޒީނަތްތެރިކޮށްފައެވެ. ހަމައެހެންމެ އާ އަހަރަށް މަރުހަބާކިޔުމުގެ ކަންކަންވެސް ސްކޫލްތަކުގައި ވަނީ ކުރިއަށްގެންގޮސްފައެވެ.
img:http://s1.psmnews.mv/images/660x400/15159040892506.gif|
އަހަރަކަށްވުރެ އަހަރެއް ރާއްޖޭގެ ތަޢުލީމީ ދާއިރާ ހަރުދަނާކޮށް، ސްކޫލްތަކުން ނިމޭ ދަރިވަރުންގެ ޢިލްމީ ޤާބިލުކަމާއި، ތަޢުލީމީ ފެންވަރު ރަނގަޅުކުރުމަށްޓަކާ ސަރުކާރުން އަންނަނީ ތަފާތު މަސައްކަތްތަކެއް ކުރަމުންނެވެ. އެގޮތުން މި ދިރާސީ އާ އަހަރާއެކުވެސް ތަޢުލީމީ ދާއިރާ ވަކިން ޚާއްސަގޮތެއްގައި ދަރިވަރުންގެ ކިޔަވައިދިނުމުގެ ނިޒާމަށް ބޮޑެތި ބަދަލުތަކެއް އަންނާނެކަމަށް އެޑިއުކޭޝަން މިނިސްޓްރީން ފާހަގަކުރެއެވެ. މީގެތެރެއިން އެންމެ ބޮޑު އެއްބަދަލަކަށް ވެގެންދާނީ ސްކޫލަށް ޑިޖިޓަލައިޒްކުރުމަށް ކުރަމުންދާ މަސައްކަތެވެ. އެގޮތުން މި މަޝްރޫޢުގެ ޕައިލެޓް ޕްރޮޖެކްޓެއް މިހާރު ފަށާފައިވާއިރު، ސްކޫލްތައް ޑިޖިޓަލް ކުރުމަށް ސަރުކާރުން ހިންގާ ބިޔަ މަޝްރޫޢު ތަންފީޒުކުރުމުގެ ފުރަތަމަ މަރުޙަލާ މިއަހަރުގެ ތެރޭގައި ކުރިއަށްދާނެކަމަށްވެސް އެޑިއުކޭޝަން މިނިސްޓްރީން ހާމަކުރެއެވެ.
img:http://s1.psmnews.mv/images/660x400/15159042638146.gif|
ޕީ.އެސް.އެމް ނިއުސްއާ ވާހަކަދެއްކި، ބައެއް ސްކޫލް ދަރިވަރުން ބުނީ އެކުދިން ތިބީ ކިޔެވުން ފެށުމާއެކު ވަރަށްވެސް އުފަލުންކަމަށެވެ. އާ އަހަރަކާ ދަރިވަރުން ކުރިމަތިލާފައިވަނީ އާ ހުވަފެންތަކަކާއި ލަނޑުދަނޑިތަކެއް ހާސިލުކުރުމަށެވެ. ދަރިވަރުންގެ އުއްމީދުތައްވެސް ވަރަށް ފޮންޏެވެ.ސްކޫލް ދަރިވަރުންގެ އުއްމީދުތަކާއި ހުވަފެންތައް މިގޮތަށްހުރިއިރު، ދިރާސީ އާ އަހަރަށް ޓީޗަރުން ކުރާ އުއްމީދުތައްވެސް ކުޑައެއްނޫންނެވެ. ޓީޗަރުންނަކީ ދަރިވަރުންގެ ދެވަނަ ބެލެނިވެރިން ކަމުގައިވާއިރު، އެކުދިންގެ ޢިލްމީ ޤާބިލުކަން އިތުރުކުރުމަށް ހުރިހާ ޓީޗަރުންވެސް ތިބީ އަތުކުރިއޮޅާލައިގެންނެވެ.
img:http://s4.psmnews.mv/images/660x400/15159042496950.gif| ދިރާސީ އާ އަހަރުގެ ކިޔެވުން ފަށާފައިވާއިރު، ދަރިވަރުންނަށް ކިޔަވައިދިނުމަށް ބޭނުންވާނެ އެންމެހާ ވަސީލަތްތައް ސްކޫލްތަކަށް ހަމަކޮށްދީފައިވާކަމަށް އެޑިއުކޭޝަން މިނިސްޓްރީން ވިދާޅުވެއެވެ. ހަމައެހެންމެ މިއަހަރުގެ ދިރާސީ އާ އަހަރުގެ ކިޔެވުންފަށާފައިވާއިރު، ގިނަ ސްކޫލްތަކަށް ދިމާވެފައިވާ ޖާގައިގެ މައްސަލަ ހައްލުކޮށް، އާބާތުރަފިލުވުމަށްވެސް އެޑިއުކޭޝަން މިނިސްޓްރީން ވަނީ ގިނަ މަސައްކަތްތަކެއް ކޮށްފައެވެ. އެގޮތުން މިއަހަރުގެ ކިޔެވުން ފެށުމާއެކުވެސް އަލަށް ޢިމާރާތްކޮށްފައިވާ ގިނަ ކްލާސްރޫމްތަކެއް ވަނީ ބޭނުންކުރަން ފަށާފައެވެ.