ކޮލަންބޯ ޕްލޭން ކައުންސިލްގެ ކުރިއަށްއޮތް ދައުރުގެ ރިޔާސަތާއި ދިވެހިރާއްޖެއިން ހަވާލުވެއްޖެއެވެ. ކޮލަންބޯ ޕްލޭން ކައުންސިލްގެ ރިޔާސަތާއި ދިވެހިރާއްޖެއިން ހަވާލުވީ އަންގާރަ ދުވަހު ބޭއްވި އެކައުންސިލްގެ 293 ވަނަ ސެޝަންގައެވެ. ރާއްޖޭގެ ފަރާތުން ރިޔާސަތާއި ހަވާލުވެވަޑައިގަތީ ދިވެހިރާއްޖެއިން ސްރީލަންކާއަށް ކަނޑައަޅުއްވާފައި ހުންނަވާ ސަފީރު މުޙަންމަދު ޙުސައިން ޝަރީފެވެ. ކޮލަންބޯ ޕްލޭން ކައުންސިލްގެ ރިޔާސަތުގެ އިތުރުން މުޙަންމަދު ހުސައިން ޝަރީފް ގެންދަވަނީ އެ ޖަމިއްޔާގެ ކޮމިޓީ އޮން އެޑްމިނިސްޓްރޭޓިވް އެންޑް ފައިނޭންޝަލް މެޓާރސްގެ ޗެއަރކަންވެސް ކުރައްވަމުންނެވެ.
ކޮލަންބޯ ޕްލޭން ކައުންސިލްގެ ރިޔާސަތު ދިވެހިރާއްޖެއިން މީގެކުރިންވެސް 3 ފަހަރެއްގެ މަތިންވަނީ ބަލަހައްޓާފަވެއެވެ. އެންމެ ފަހުން ރިޔާސަތު ބަލަހައްޓާފައިވަނީ 2004 ވަނަ އަހަރުން 2005 ވަނަ އަހަރަށް މިހާރުގެ ފޮރިން މިނިސްޓަރ ޑރ މުޙަންމަދު އާސިމްއެވެ.
ކޮލަންބޯ ޕްލޭންއަކީ ދެކުނު އޭޝިޔާ އާއި ޕެސިފިކް ޤައުމުތަކުގެ އިޤްތިސާދީ، އިޖްތިމާއީ އަދި ތިމާވެށި ކުރިއެރުވުމަށް އެކުލަވާލާފައިވާ ބައިނަލްއަޤްވާމީ ޖަމިއްޔާއެކެވެ. މި ޖަމިއްޔާ އުފެއްދީ 1950 ވަނަ އަހަރުގެ ޖަނަވަރީ މަހުގެ ތެރޭގައި ކޮލަންބޯގައި ބޭއްވި ކޮންފަރެންސް އޮން ފޮރިން އެފެއާޒްގައެވެ.