8 ވަނަ ދިވެހި ފިލްމް އެވޯޑްސްގެ ނޮމިނޭޝަންތައް އިއުލާންކޮށްފިއެވެ. ފިލްމު އެވޯޑްސްގެ ނޮމިނޭޝަންތައް އިއުލާންކުރުމަށް ޓީވީއެމްގެ ސުޓޫޑިއޯ 1 ގައި ބޭއްވި ރަސްމިއްޔާތުގައި ޖުމްލަ 24 ފިލްމެއްގެ ނޮމިނޭޝަން އިއުލާން ކޮށްފައެވެ. މިފަހަރުގެ ފިލްމް އެވޯޑްސްގައި ޖުމްލަ 31 ދާއިރާއަކުން އެވޯޑް ދިނުމަށް ވަނީ ހަމަޖެހިފައެވެ. އޭގެތެރޭގައި ހިމެނެނީ ފީޗާރ ފިލްމްގެ ބައިން 23 އެވޯޑަކާއި ކުރު ފިލްމުގެ ބައިން 8 އެވޯޑެކެވެ.
ފީޗާރ ފިލްމުގެ ބައިން އެންމެ މޮޅު ފިލްމަކަށް ވާދަކުރަނީ ވާށޭމަށާއެކީ، ހުޅުދާން، އަހްޝަމް، އެންމެ ފަހު ވިންދާ ޖެހެންދެން އަދި މިކޮއެ ބައްޕަ ބައޭބައޭ އެވެ. ކުރުފިލްމު ބައިން އެންމެ މޮޅު ފިލްމަކަށް ވާދަކުރަނީ ކަޝްފު، ފަރިހިބެ 4 އަދި ވޫޑޫ އެވެ. ފީޗާރ ފިލްމުގެ ބައިން އެންމެ މޮޅި ޑައިރެކްޓަރުންނަށް އަލީ ޝިފާއުއާއި، އައިޝަތު ފުއާދު ތައުފީޤް އާއި، އަލީ ސީޒަން އަދި އަލީ ޝިފާއުގެ އިތުރުން ރަވީ ފާރޫގު ވާދަކުރެއެވެ. ކުރު ފިލްމުގެ ބައިން ވާދަކުރަނީ އަލީ ޝިފާއު އަދި އަބްދުﷲ މުއާޒްއެވެ. ބެސްޓް އެކްޓަރުންގެ ގޮތުގައި ނޮމިނޭޓް ވެފައިވަނީ މުހައްމަދު ޖުމައްޔިލްއާއި، ހަސަން މަނިކު އާއި، އަލީ ސީޒަންގެ އިތުރުން އިބްރާހިމް ޖިހާދުއެވެ. އަންހެން ބެސްޓް އެކްޓަރުންނަށް ވާދަކުރަނީ މަރިޔަމް މަޖުދާއާއި، ނިއުމާ މުހައްމަދުގެ އިތުރުން ރިޝްމީއެވެ.
މިފަހަރުގެ ފިލްމް އެވޯޑްސްގައި އެންމެ ގިނަ އެވޯޑަށް ވާދަކުރަނީ ޑާރކުރެއިން އެންޓަޓެއިންމަންޓްގެ ފިލްމް ވާށޭމަށާއެކީއެވެ. މި ފިލްމު ވަނީ 21 ކެޓަގަރީން 22 އެވޯޑަކަށް ނޮމިނޭޓް ވެފައެވެ. 8 ވަނަ ފިލްމު އެވޯޑްސްގައި ވާދަކުރަނީ 2014 ވަނަ އަހަރުން ފެށިގެން 2016 ވަނަ އަހަރާއި ހަމައަށް އުފައްދާފައިވާ ފިލްމުތަކެވެ. ފިލްމު އެވޯޑްސްގައި ބައިވެރި ކުރި ފިލްމުތަކަށް އިންސާފުކޮށްދެއްވީ ހަތް މެންބަރުންގެ މައްޗަށް އެކުލެވޭ ޖަޖުންގެ ޕެނަލަކުންނެވެ.