އައްޑޫސިޓީ ހިތަދޫގައި ހުންނަ އިކުއެޓޯރިއަލް ކޮންވެންޝަން ސެންޓަރު 100 އެނދުގެ ޓަރޝަރީ ހޮސްޕިޓަލަކަށް ބަދަލުކުރުމުގެ މަސައްކަތް 2018 ވަނަ އަހަރުގެ ޖޫންމަހުގެ ނިޔަލަށް ނިންމައި، ޚިދުމަތްދޭން ފަށާނެކަމަށް ހައުސިންގ މިނިސްޓްރީން ބުނެފިއެވެ.
މާލޭ ސަރަޙައްދުގެ އިތުރުން ރާއްޖޭގެ އުތުރާއި، ދެކުނުގައި ޓަރޝަރީ ފެންވަރުގެ ޚިދުމަތްދޭ ހޮސްޕިޓަލެއް ޤާއިމުކުރުމަކީ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމްގެ ރިޔާސީ ވަޢުދުތަކުގެތެރޭގައި ހިމެނޭ އެންމެ މުހިއްމު އެއްވަޢުދެވެ.
އެގޮތުން 17 ވަނަ ސާރކް ސަމިޓު ބޭއްވުމަށް އައްޑޫ ސިޓީގައި ޢިމާރާތްކުރި އިކުއެޓޯރިއަލް ކޮންވެންޝަން ސެންޓަރު، ޓަރޝަރީ ފެންވަރުގެ ހޮސްޕިޓަލަކަށް ބަދަލުކުރުމަށް ނިންމައި އެމަސައްކަތް ސަރުކާރުން ވަނީ ކުންފުންޏަކާ ހަވާލުކޮށްފައެވެ. 161 މިލިއަން ރުފިޔާއަށް މި މަސައްކަތް ކުރުމަށް ސަރުކާރުން ހަވާލުކުރައްވާފައިވަނީ އެލިއާ ކޮންސްޓްރަކްޝަނާއެވެ.
މި މަޝްރޫޢުގެ ދަށުން ކޮންވެންޝަން ސެންޓަރު ހުރި ޢިމާރާތަށް ބޮޑެތި ބަދަލުތަކެއް ގެނެސް، ޒަމާނީ ވަސީލަތްތަކާއެކު ޓަރޝަރީ ފެންވަރުގެ ޚިދުމަތްދޭ ހޮސްޕިޓަލަކަށް އެތަން ބަދަލުކުރާނެއެވެ. މިއާއެކު ދެކުނު ސަރަޙައްދުގެ ސިއްޙީ ނިޒާމަށް ބޮޑެތި ކުރިއެރުންތަކެއް ލިބިގެންދާނެކަމަށާ، ރައްޔިތުންގެ ސިއްޙީ ޚިދުމަތަށް ކުރާ ހޭދަ އެތައް ގުނައެއް ކުޑަވެގެންދާނެކަމަށް ސަރުކާރުންބުނެއެވެ. އެގޮތުން މިހާރު ކުރަމުންދަނީ ޢިމާރާތުގެ ސްޓްރަކްޗަރއަށް ގެންނަންޖެހޭ ބަދަލުތައް ގެނެސް، ޢިމާރާތަށް އިތުރުކުރަންޖެހޭ ބައިތައް އިތުރުކުރުމުގެ މަސައްކަތްކަމަށް ހައުސިންގ މިނިސްޓްރީން ވަނީ ބުނެފައެވެ. އަދި 2018 ވަނަ އަހަރުގެ ޖޫންމަހުގެ ނިޔަލަށް އެ މަސައްކަތް ނިންމާ، ހޮސްޕިޓަލް ހުޅުވުމަށް ހަމަޖެހިފައިވާކަމަށް ހައުސިންގ މިނިސްޓްރީން ބުނެއެވެ.
މި މަޝްރޫޢަށް ގާތްގަނޑަކަށް 161 މިލިއަން ރުފިޔާ ޚަރަދުވާއިރު، އެކަމަށް ބޭނުންވާ ފައިސާ ސަޢޫދީ ފަންޑުންނާއި، އޯޕެކް ފަންޑު މެދުވެރިކޮށް ހަމަޖެހިފައިވާކަމަށް ސަރުކާރުން ބުނެއެވެ.
އިކުއެޓޯރިއަލް ކޮންވެންޝަން ސެންޓަރު ޓަރޝަރީ ހޮސްޕިޓަލަކަށް ބަދަލުކުރުމުގެ މަސައްކަތް ހަލުވިކަމާއެކު ކުރިއަށްދާއިރު، ރާއްޖޭގެ އުތުރުން، ހދ.ކުޅުދުއްފުށީ ރީޖަނަލް ހޮސްޕިޓަލް 150 އެނދުގެ ޖާގައިގެ ޓަރޝަރީ ހޮސްޕިޓަލަކަށް ބަދަލުކުރުމުގެ މަސައްކަތްވެސް ސަރުކާރުން އަންނަނީ ކުރަމުންނެވެ. މި މަސައްކަތް ހަވާލުކޮށްފައިވަނީ އިންޑިއާގެ ނޫރުލް އިސްލާމް އިންޓަރނޭޝަނަލް ޕްރައިވެޓް ލިމިޓެޑާއެވެ.