އޭސީސީ ނަވާރަ އަހަރުން ދަށުގެ ކްރިކެޓް މުބާރާތުގައި ވާދަކުރާ ދިވެހި ޓީމާ ބައްދަލުކޮށް، ކުޅިވަރާއި ބެހޭ މިނިސްޓަރ ހިތްވަރުދެއްވައިފިއެވެ. މިމަހުގެ އެގާރަ ވަނަ ދުވަހު ކުވެއިތުގައި ފަށާ މުބާރާތުގައި ވާދަކުރާ ރާއްޖޭގެ ޒުވާން ޓީމާ މިނިސްޓަރ މިއަދު ބައްދަލުކުރައްވާ ކާމިޔާބީ ހޯދަން މަސައްކަތް ކުރުމަށް ވަނީ ހިތްވަރުދެއްވާފައެވެ. މިނިސްޓަރ ވިދާޅުވީ މުބާރާތަށް ޓީމު ފުރުމުގެ ކުރިން ޓީމާ ބައްދަލުކޮށްލަން ފުރުސަތު ލިބުނުން ވަރަށް ބޮޑަށް އުފާވާ ކަމަށާއި، މުބާރާތުން ރާއްޖެއަށް ރީތި ވަނައެއް ހޯއްދަވައިދެއްވުމަށް އެދޭކަމަށެވެ.
" ވަރަށް ޒުވާން ޓީމެއް މިދަނީ. ރަނގަޅު ކާމިޔާބީއެއް ހޯދާނެކަމަށް އަޅުގަނޑު އުއްމީދުކުރަން. ކްރިކެޓް ބޯޑުން ކްރިކެޓް ކުރިއަރުވަން ޚާއްޞަކޮށް ވައިޑީޕީއަށް ކުރާ މަސައްކަތްތައްވެސް އަޅުގަނޑު ފާހަގަކުރަން " މިނިސްޓަރ ވިދާޅުވިއެވެ.
ކްރިކެޓް ޓީމުގެ ކެޕްޓަން ޔޫސުފް އަޒްޔާން ފަރުހަދު ބުނީ ގައުމެއް ތަމްސީލް ކުރުމަށް ލިބުމަކީ ލިބޭ ވަރަށް ބޮޑު ޝަރަފެއްކަމަށާއި، މި ލިބުނު ފުރުސަތުގައި ރާއްޖެއަށް ރީތި ނަން ހޯދައިދިނުމަށް މަސައްކަތް ކުރުމަށް މުޅި ޓީމް އޮތީ ތައްޔާރަށްކަމަށެވެ.
" އަޅުގަނޑުމެންނަށް ލިބޭ ޝަރަފެއް ޤައުމު ތަމްޝީލްކުރުމަކީ. ވަރަށް ބޮޑަށް މަސައްކަތްކުރާނަން ރަނގަޅު ކާމިޔާބީއެއް ހޯދަން " ޒުވާން ކެޕްޓަން ބުންޏެވެ.
މިމުބާރާތުގައި ރާއްޖެ ވާދަކުރަން ޖެހެނީ ޤަޠަރާ، ކުވެއިތުގެ އިތުރުން އިރާނާއެވެ. ރާއްޖޭގެ ފުރަތަމަ މެޗުގައި މިމަހުގެ ތޭރަ ވަނަ ދުވަހު ވާދަކުރާނީ އިރާނާއެވެ. ދެވަނަ މެޗުގައި މިމަހުގެ ފަނަރަ ވަނަ ދުވަހު ވާދަކުރާނީ ޤަތަރާއެވެ. ފަހު މެޗުގައި ކުވެއިތާ ވާދަކުރާނީ މިމަހުގެ ސޯޅަ ވަނަ ދުވަހުއެވެ.