ނ. ޅޮހީގެ ކަރަންޓްގެ މަސައްލަ ހައްލުކޮށް ރޭގެ ވަގުތެއްގައި އެރަށަށް ކަރަންޓް ފޯރުކޮށްދީފައިވާކަމަށް ފެނަކަ ކޯޕަރޭޝަނަނުން ބުނެފިއެވެ.
ޅޮހީގެ ކަރަންޓުގެ މައްސަލައާއި ގުޅޭގޮތުން އެ ކޯޕަރޭޝަނުން ނެރުނު ނޫސްބަޔާނުގައި ބުނީ ޅޮހީގައި ކަރަންޓްގެ ޙިދުމަތް ފޯރުކޮށްދިނުމަށް ބޭނުން ކުރަމުން ގެންދިޔަ ތިން ޖަނަރޭޓަރުގެ ތެރެއިން 112 ކިލޯވޮޓުގެ ޖަނަރޭޓާރަށް ދިމާވި މައްސަލަ ހައްލުކުރުމަށް މި މަހުގެ 7 ވަނަ ދުވަހު 160 ކިލޯވޯޓުގެ ޖަނަރޭޓަރެއް އެރަށަށް ގެންގޮސް އިންސްޓޯލްކޮށް ކަރަންޓް ފޯރުކޮށްދީފައިވާކަމަށެވެ.
ނަމަވެސް ރައްޔިތުންގެ ތެރެއިން ބަޔަކު ނުކުމެ ޅޮހީގައި ގާއިމްކޮށްފައިވާ އިންޖީނުގެޔަށް ޤަވައިދާ ޙިލާފަށް ވަދެ ޙިދުމަތް ދިނުމަށް ބޭނުންކުރަމުންއައި ޖަނަރޭޓަރު ނިއްވާލުމާ ގުޅިގެން މުޅިރަށުން ކަރަންޓްގެ ޙިދުމަތް މެދުކެނޑުނު ކަމަށެވެ. މި ކަމާއި ގުޅިގެން ރައްޔިތުންގެ ފަރާތުން ލިބެމުންދިޔަ ޝަކުވާތަށް ބަލާ، ހުރި މައްސަލަތަށް ހައްލުކޮށް، ރޭ 8:45 ގައި ކަރަންޓްގެ ޙިދުމަތް ފޯރުކޮށްދީފައިވާކަމަށް ފެނަކަ ކޯޕަރޭޝަނުން ބުނެއެވެ.