ކުޅިވަރު އެސޯސިއޭޝަންތަކުގެ ފަރާތުން ބޭއްވި ތަރާވީޙުގައި ރައީސުލްޖުމްހޫރިއްޔާގެ ދެކަނބަލުން ބައިވެރިވެވަޑައިގެންފިއެވެ.
ކުޅިވަރު އެސޯސިއޭޝަންގެ ފަރާތުން، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާއި އަނބިކަނބަލުން ފާޠިމަތު އިބްރާހީމަށް އެރުވި ތަރާވީޙް އޮތީ ރޭ 22:00 ރަސްފަންނުގައެވެ. މި ތަރާވީޙުގައި ޔޫތު މިނިސްޓަރ އިރުތިޝާމް އާދަމާއި، އެފްއޭއެމްގެ ރައީސް ބައްސާމް ޢަދީލް ޖަލީލާއި، ކުޅިވަރު އެސޯސިއޭޝަންތަކުގެ އިސްވެރިންނާއި ކުޅިވަރު ޢާއިލާގެ ގިނަ ޢަދަދެއްގެ ކުޅުންތެރިން ބައިވެރިވެވަޑައިގެންނެވިއެވެ.
ރައީސްގެ ދެކަނބަލުން ވަނީ ކުޅިވަރު ކުޅުންތެރިންނާ ބައްދަލުކުރައްވާ ކުޅިވަރުގެ ކަންކަން އޮޅުންފިލުއްވާފައެވެ. އެސޯސިއޭޝަންތަކުގެ ފަރާތުން ވާހަކަ ދައްކަވަމުން، މޯލްޑިވްސް އޮލިމްޕިކް ކޮމިޓީގެ ރައީސް މުޙައްމަދު ޝަވީދު ވިދާޅުވީ، ރައީސުލްޖުމްހޫރިއްޔާގެ ދެކަނބަލުންނާއި ކުޅިވަރުގެ އާއިލާއާ އޮތީ ވަރަށް ގާތް ގުޅުމެއް ކަމަށާއި، ރައީސްގެ ދެކަނބަލުން ވަރަށް ގާތުން ކުޅިވަރުގެ އާއިލާއާއެކު މަސައްކަތް ކުރައްވަމުން ގެންދަވާ ކަމަށެވެ.
ނަތީޖާއެއްގެ ގޮތުން ރާއްޖޭގެ ތާރީޚުގައި މިހާތަނަށް އުފެދުނު އެންމެ އެކުވެރި ބަދަހި ގުޅުމެއް އެސޯސިއޭޝަންތަކުގެ މެދުގައި އުފެދިފައިވާ ކަމަށް ޝަވީދު ވިދާޅުވިއެވެ.