ރާއްޖޭގައި ގިނަ އެއާޕޯޓްތައް ތަރައްޤީވެ އެތެރޭގެ އުދުހުންތައް އިތުރުވެގެން ދިއުމަކީ ސަރުކާރުގެ އިޤްތިޞާދީ އެޖެންޑާ ކުރިޔަށް ގެންދިޔުމަށް ލިބިގެންދާ ވަރަށް ބޮޑު ފަސޭހައެއް ކަމަށް ޓުއަރިޒަމް މިނިސްޓަރ މޫސާ ޒަމީރު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އިތުރުވަމުން އަންނަ އެތެރޭގެ އުދުހުންތަކާއި ގުޅޭގޮތުން ޕީއެސްއެމްއިން ދެންނެވި ސުވާލަކަށް ޖަވާބު ދެއްވަމުންނެވެ.
ޓޫރިޒަމް ސިނާއަތުގެ ކުރިއެރުމާއި އެއްވަރަށް ރާއްޖޭގެ ވައިގެ ދަތުރުފަތުރުގެ ދާއިރާ ތަރައްޤީ ކުރެއްވުމަށް އަދުގެ ސަރުކާރުން ދަނީ މަސައްކަތް ކުރައްވަމުންނެވެ. ރާއްޖޭގެ ތަރައްޤީއަށް ކުރަމުންދާ މަސައްކަތުގައި ސަރުކާރު އެއާރލައިން މޯލްޑިވިންގެ ހިއްސާ ބޮޑުކަން ފާހަގަކުރައްވާ ވާހަކަފުޅު ދައްކަވަމުން ޓޫރިޒަމް މިނިސްޓަރ ވަޒީރު މޫސާ ޒަމީރު ވިދާޅުވީ މޯލްޑިވިއަންގެ އޮޕަރޭޝަންތައް އިތުރަށް ތަރައްޤީ ކުރެއްވުމަށް ސަރުކާރުގެ ފަރާތުން ދޭންޖެހޭ އެއްބާރުލުން ދެމުން ގެންދަވާ ކަމަށެވެ. ރާއްޖޭގައި ތަރައްޤީ ކުރެވެމުންދާ ސަރަޙައްދީ އެއާރޕޯޓްތައް އިތުރުވެ، ވައިގެ މަގުން ކުރާ ދަތުރުތަކަށް ޑިމާންޑް ބޮޑުވެފައިވާއިރު، ޑިމާންޑާއި އެއްވަރަށް ޚިދުމަތް ދިނުމަކީ މުހިންމު ކަމެއްކަމަށް މިނިސްޓަރ ވިދާޅުވިއެވެ.
ރާއްޖޭގެ އެކި ކަންކޮޅުތަކުގައި 11 އެއާރޕޯޓެއް ހިންގަމުންދާއިރު އިތުރު އެއާރޕޯޓްތައް ދާދި އަވަހަށް ތަރައްޤީވެގެންދާނެ ކަމަށް މިނިސްޓަރ ވިދާޅުވިއެވެ. އަދި މިހާރުވެސް ބައެއް އެއާރޕޯޓުތައް ތަރައްޤީކުރުމުގެ މަސައްކަތް ކުރިއަށްދާކަން މިނިސްޓަރ ފާހަގަކުރެއްވިއެވެ.
ރާއްޖޭގައި އެންމެ ފުޅާ ދާއިރާއެއްގައި ވައިގެ އުދުހުންތައް ކުރިއަށް ގެންދަނީ ރާއްޖޭގެ ޤައުމީ އެއާލައިން މޯލްޑިވިއަނުންނެވެ. އަދި އިތުރުވެގެންދާ ސަރަޙައްދީ އެއާޕޯޓުތަކާއެކު އެކުންފުނީގެ ޚިދުމަތް ފުޅާކޮށް، ދޭ ޚިދުމަތުގެ ފެންވަރުގެ ރަނގަޅުކުރުމަށް އައިލެންޑު އޭވިއޭޝަނުން ގެންދަވަނީ ގިނަ މަސައްކަތްތަކެއް ކުރައްވަމުންނެވެ.
މިގޮތުން މޯލްޑިވިއަންގެ އޮޕަރޭޝަންތަކުގައި ބޭނުންކުރުމަށް ޑޭޝް އެއިޓް މަރުކާގެ އިތުރު ބޯޓުތައް ގެނައުމަށް އެކުންފުނިން ގެންދަވަނީ މަސައްކަތް ކުރަމުންނެވެ. އައިލެންޑް އޭވިއޭޝަނުން ރާއްޖޭގެ 10 އެއަރޕޯޓަކަށް ދަތުރުކުރާއިރު މިހާރު އެކުންފުނިން ތައްޔާރުވަމުން ދަނީ ކުޑަހުވަދޫގައި ތަރައްޤީކޮށްފައިވާ ދާލު އެއާރޕޯޓަށް ދަތުރު ފެށުމަށެވެ. އައިލެންޑް އޭވިއޭޝަންގެ މެނޭޖިންގ ޑިރެކްޓަރ ޢަބްދުލްހާރިސް ވިދާޅުވީ އިތުރު އެއާރޕޯޓްތަކާއި، ޓުއަރިޒަމަށް އަންނަމުންދާ ކުރިއެރުމާއި އެއްވަރަށް އެ ކުންފުނީގެ ކެޕޭސިޓީ އިތުރުކުރުމަށްވެސް މަސައްކަތް ކުރައްވަމުން ގެންދަވާ ކަމަށެވެ.
މޯލްޑިވިއަންގެ މަތިންދާބޯޓު ފްލީޓުގައި ޑޭޝް އެއިޓް މަރުކާގެ 9 މަތިންދާބޯޓު އޮންނައިރު، އެއާރބަސް މަރުކާގެ 2 މަތިންދާބޯޓުވެސް އޮވެއެވެ. މީގެ އިތުރުން 10 ސީޕްލޭންވެސް މޯލްޑިވިންގެ ފްލީޓްގައި ހިމެނެއެވެ. މިއަހަރު ފަހުކޮޅު އެއާރބަސް މަރުކާގެ ބޯޓަކާއި ޑޭސް އެއިޓް މަރުކާގެ ބޯޓެއް އެ ކުންފުނީގެ ޚިދުމަތާއި އަލަށް ގުޅޭނެ ކަމަށް އައިލެންޑް އޭވިއޭޝަނުން ވަނީ ހާމަކޮށްފައެވެ.