ރާއްޖެއިން ޔޫރަޕަށް އެކްސްޕޯޓްކުރާ މަހުގެ ބާވަތްތަކުން ނަގަމުންދާ ޓެކްސް ކުޑަކުރުމަށް މަޝްވަރާކުރަމުން ގެންދަވާކަމަށް ރާއްޖެއިން ޔޫރަޕިއަން ޔޫނިއަނަށް ކަނޑައަޅާފައި ހުންނަވާ ސަފީރު އަޙްމަދު ޝިއާން ވިދާޅުވެއްޖެއެވެ.
ރާއްޖެކީ މެދުފަންތީގެ ތަރައްޤީގެ ޤައުމަކަށްވާތީ، ރާއްޖޭން ޔޫރަޕަށް އެކްސްޕޯޓްކުރާ މަހަށް ދެމުން ދިޔަ ޑިއުޓީގެ އިނާޔަތް ކަނޑާލާފައިވަނީ 2014 ވަނަ އަހަރުގައެވެ. ޔޫރަޕަށް އެކްސްޕޯޓްކުރާ މަހުގެ ބާވަތްތަކަށް 14 ޕަސެންޓާއި 20 ޕަސެންޓާ ދެމެދުގެ ޑިއުޓީއެއް މިހާރު ނަގަމުންދެއެވެ. ރާއްޖެއިން ޔޫރަޕިއަން ޔޫނިއަނަށް ކަނޑައަޅާފައި ހުންނަވާ ސަފީރު އަޙްމަދު ޝިއާން ވިދާޅުވީ، މަސް އެކްސްޕޯޓް ކުރުމުގައި ނަގާ ޓެކްސްގެ ޢަދަދު ދަށްކުރުމަށް މަޝްވަރާކުރަމުން އަންނަކަމަށާއި، އެކަމަށް އަވަސް ޙައްލެއް ލިބޭނެކަމުގެ އުއްމީދު އެބައޮތްކަމަށެވެ.
ޝިއާން ވިދާޅުވީ، އިކޮނޮމިކް މިނިސްޓަރ މުޙައްމަދު ސަޢީދު އިނގިރޭސިވިލާތައް ކުރެއްވި ދަތުރުފުޅުގައި ރާއްޖެއާއި އިނގިރޭސިވިލާތާ ދެމެދު މިނިވަން ވިޔަފާރީގެ އެއްބަސްވުމެއް އެކުލަވާލުމަށް ރާއްޖެއިން ހުށައަޅުއްވާފައިވާކަމަށެވެ.
އިނގިރޭސިވިލާތް ޔޫރަޕް އިއްތިހާދުން ވަކިވުމުން އިނގިރޭސިވިލާތައް ޤައުމުތަކާއެކު ވަކިވަކިން މުއާހަދާތައް އެކުލަވާލޭވޭނެކަމަށާއި، މި މުއާހަދާގައި ރާއްޖެއިން ސޮއިކުރެވިއްޖެނަމަ ދިވެހި މަހާއި އެހެން ބާވަތްތައްވެސް އެކްސްޕޯޓްކުރުމުގައި ފުރުޞަތު ހުޅުވިގެންދާނެކަމަށް ޝިއާން ފާހަގަކުރެއްވިއެވެ.
ރާއްޖެއިން އެކްސްޕޯޓްކުރާ މަހުގެ ބާވަތްތަކުގެ ސާޅީހަށްވުރެ ބޮޑު އިންސައްތަ އެކްސްޕޯޓް ކުރަނީ ޔޫރަޕްގެ ޤައުމުތަކަށެވެ.