ޤައުމީ ފެންވަރުގައި ރާއްޖޭގައި ބޭއްވެވި ފުރަތަމަ އެންޓި ކޮރަޕްޝަން މަހާސިންތާއަކީ، ކޮރަޕްޝަންގެ ޢަމަލުތައް ހުއްޓުވައި ކޮރަޕްޝަންގެ ޢަމަލުތަކުން ގެއްލިގެންދާ މުދަލާއި ފައިސާ އަލުން އަނބުރާ ދައުލަތަށް ހޯއްދެވުމާއެކު، ކޮރަޕްޝަންގެ ޢަމަލުތައް ހިންގާ ފަރާތްތަކާމެދު ހަމަހަމަކަމާ އިންސާފުވެރިކަމާއެކު ފިޔަވަޅު އެޅުމުގައި ކުރިމަތިވާ ގޮންޖެހުންތައް ތިލަކޮށް، އެންމެން ގުޅިގެން މަސައްކަތްކުރުމަށް ކަމާގުޅުން ހުރި އިދާރާތަކުގެ މަޝްވަރާ ހޯދުމަށް ބޭއްވި މަހާސިންތާއެކެވެ.
އެންޓިކޮރަޕްޝަން ކޮމިޝަނާއި، އިސްލާމީ ޔުނިވަރސިޓީ ގުޅިވަޑައިގެން އެޓާރނީ ޖެނަރަލްގެ އޮފީހާއި، ޕްރޮސިކިއުޓަރ ޖެނަރަލްގެ އޮފީހާއި މޯލްޑިވްސް ޕޮލިސް ސަރވިސް ހިމެނޭހެން ޖުމްލަ 10 އިދާރާއަކުން 11 ކަރުދާހެއް ހުށައެޅުއްވި މަޝްވަރާކުރެވުނު މަހާސިންތާގެ ބައިވެރިން ވަނީ ތަފާތު 11 ކަމަކަށް އެއްބަސްވެ، އިޤުރާރުވެފައެވެ. މީގެތެރޭގައި ދިވެހި މުޖުތަމަޢަކީ އިސްލާމީ ރިވެތި ސިފަތަކާއެކު ތަރައްޤީކޮށް ކޮރަޕްޝަނާއި، ފަސާދައަށް އެއްވެސް ފުރުޞަތެއް ނުދޭ ބަޔަކު ދިރިއުޅޭ މުޖުތަމައަކަށް ހެދުމާއި، ނަޒާޙަތްތެރި ޘަޤާފަތެއް އުފެއްދުމަށް ޤައުމީ މަންހަޖުގައި ހިމެނުމަށް މަސައްކަތްކުރުމާއި، ޙިސްބާގެ ނިޒާމް ތަޢާރަފްކުރެއްވުން ހިމެނެއެވެ. މީގެ އިތުރުން، ކޮރަޕްޝަންގެ ޢަމަލުތައް ހުއްޓުވުމަށް އޭސީސީން ދައުލަތުގެ އިދާރާތަކަށް އަންގަވާ އެންގެވުންތަކަކީ، އެއަށް ޢަމަލުކުރުން ދައުލަތުގެ މުވައްޒަފުންނަށް ލާޒިމް އެއްޗެއްގެ ގޮތުގައި ކަނަޑައެޅުމަށް އޭ.ސީ.ސީގެ ޤާނޫނަށް އިޞްލާޙް ގެނައުމަށް ކަމާ ގުޅުހުން ހުރި މުއްސަސާތަކަށް ގޮވާލުމާއި، ކަޅުފައިސާ ރާއްޖޭގެ އިޤްތިޞާދުގައި ދައުރުވުން ހުއްޓުވުމަށް އިދާރާތަކަށް ގޮވާލުންވެސް ހިމެނެއެވެ.
ޚިޔާނާތާއި ފަސާދައަށް ރާއްޖެއިން އެއްވެސް ފުރުޞަތެއް ނުދިނުމާއި، ދައުލަތުގެ އިދާރާތަކުގެ މާލީ ހިސާބުތަށް ބެލެހެއްޓެވުން ހަރުދަނާކުރެއްވުމަށްވެސް މަހާސިންތާގެ ބައިވެރިން ވަނީ ގޮވާލައްވާފައެވެ.
img:http://s4.psmnews.mv/images/660x400/14944106664566.jpg|"އެންޓި-ކޮރަޕްޝަން ޤައުމީ މަހާސިންތާ" އިފްތިތާޙްކުރުމަށް ބޭއްވި ރަސްމިއްޔާތުގެ ތެރެއިން - ފޮޓޯ: ޕީއެސްއެމް / މުޙައްމަދު ވަޙީދު
މިމަހާސިންތާ ނިމުން ޝަރަފުވެރިކޮށްދެއްވައި ވާހަކަދައްކަވަމުން އިންފޮމޭޝަން ކޮމިޝަނަރ ޢަބްދުލް ޢަޒީޒް ޖަމާލު އަބޫބަކުރު ވިދާޅުވީ، ކޮރަޕްޝަނަކީ ވަރަށް ގިނަ ނުބައި ކަންކަން އޭގެތެރޭގައި ހިމެނިފައިވާ، އިޖްތިމާޢީ އަދި ދީނީ ބަލިމަޑު ކަމެއްކަމަށެވެ. ރާއްޖޭގައި ކޮރަޕްޝަން އޮތް މިންވަރު ދެނެގަނެވިފައި އޮތްކަމަށް ޤަބޫލުކުރަން ފަސޭހަނޫންކަން ފާހަގަކުރައްވަމުން އިންފޮމޭޝަން ކޮމިޝަނަރ ވިދާޅުވީ، ހާމަކަން ބޮޑުގޮތެއްގައި ހުރިހާ އިދާރާތަކުންވެސް މަސައްކަތް ކޮށްފިނަމަ ކޮރަޕްޝަންގެ ޢަމަލުތައް ނުހިނގާނެކަމަށެވެ.
މިރަސްމިއްޔާތުގައި ވާހަކަދައްކަވަމުން އެންޓިކޮރަޕްޝަން ކޮމިޝަންގެ މެންބަރު ޞަފްއަތު މުޙައްމަދު ވިދާޅުވީ، މިއީ ކާމިޔާބު މަހާސިންތާއެއް ކަމަށާއި، މަހާސިންތާގައި ނިންމެވު ނިންމެވުންތައް ތަންފީޒުވާނެކަމުގެ ފުރިހަމަ ޔަޤީންކަން އެބައޮތްކަމަށެވެ.
އެންޓި ކޮރަޕްޝަން ޤައުމީ މަހާސިންތާ ބޭއްވެވުމުގައި އެންމެ އިސްދައުރެއް އަދާކުރެވި އެއް މުއްސަސާކަމުގައިވާ އިސްލާމީ ޔުނިވަރސިޓީގެ ޑެޕިއުޓީ ވައިސް ޗެއަރ އެކަޑަމިކް އެފެއަރޒް ޙައްވާ ލަޠީފް ވިދާޅުވީ، ކޮރަޕްޝަންގެ ޢަމަލުތަކަށް ލޯހުޅުވައި އެފަދަ ޢަމަލުތަކުން މުޖުތަމަޢު ސަލާމަތްކުރުމަށް އެ ޔުނިވަރސިޓީން ހިންގާ ކޯސްތަކުގައި ހިމަނައި އެކަން އުނގަންނައިދިނުމުގެ މަސައްކަތްކުރައްވަމުން ގެންދަވާކަމަށެވެ.
އެންޓިކޮރަޕްޝަން ކޮމިޝަނުން އިސްލާމީ ޔުނިވަރސިޓީއާ ގުޅިގެން ޕީ.އެސް.އެމްއާއި، ފެނަކަ ކޯޕަރޭޝަނާއި، އެއަރޕޯޓްސް ކޮންޕެނީ އެމް.ޑަބްލިޔު.އެސް.ސީއާއެކު، ބޭއްވި މި މަހާސިންތާގައި ކޮރަޕްޝަން އަށަގެންފައިވާ މިންވަރުވެސް ދައުލަތުގެ އިދާރާތަކުން ދެއްވި މަޢުލޫމާތުން ވަނީ ހާމަވެފައެވެ.