ލޯކަލް ކައުންސިލް އިންތިޚާބުގެ ނަތީޖާ ކަށަވަރުކުރުމަށްޓަކައި 24 ފޮއްޓެއްގެ ސެކިއުރިޓީ އުރަތައް ކަނޑާ އެ ދާއިރާތަކުގެ ވޯޓު އަލުން ގުނަން ފަށައިފިއެވެ.
ބައެއް ދާއިރާތަކުގެ ވޯޓު ފޮށި ކަނޑާ، އަލުން ގުނުމަށް ނިންމީ، އެ ދާއިރާތަކުގެ ނަތީޖާ ޝީޓްތަކުގައި މައްސަލަތަކެއް ހުރިކަމަށް އިލެކްޝަންސް ކޮމިޝަނަށް ފާހަގަވެގެން އެ ޝީޓުތައް ކަށަވަރު ކުރުމަށްޓަކައިކަމަށް އެ ކޮމިޝަނުން ވިދާޅުވެއެވެ. އަދި އަލުން ވޯޓު ގުނާނީ ނަތީޖާ ޝީޓްތަކުގައި މައްސަލަ ޖެހިފައިވާ ދާއިރާތަކުގެ އެކަނިކަމަށްވެސް އިލެކްޝަންސް ކޮމިޝަނުން ވިދާޅުވެއެވެ.
އަލުން ގުނާ ދާއިރާތަކުގެ ތެރޭގައި، ހދ.އަތޮޅު ކައުންސިލް މަކުނުދޫ ދާއިރާއާއި، ރ.އަތޮޅު ކައުންސިލް ދުވާފަރު ދާއިރާއާއި، އެއަތޮޅު ކައުންސިލް އިނގުރާދޫ ދާއިރާއާއި، ހދ.ހަނިމާދޫ ކައުންސިލާއި، ބ.އަތޮޅު ހިތާދޫ ކައުންސިލާއި، ލ.އަތޮޅު ކައުންސިލް ފޮނަދޫ ދާއިރާއާއި، ހދ.އަތޮޅު ކައުންސިލް ހަނިމާދޫ ދާއިރާއާއި، ހދ.ކުޅުދުއްފުށި ކައުންސިލާއި، އއ.އަތޮޅު ކައުންސިލާއި، އަދ.އަތޮޅު ކައުންސިލް މާމިގިލީ ދާއިރާގެ އިތުރުން މ.އަތޮޅު ކައުންސިލާއި، ތ.އަތޮޅު ވިލުފުށި ކައުންސިލާއި، ތ.އަތޮޅު ތިމަރަފުށި ކައުންސިލާއި، ތ.އަތޮޅު ކިނބިދޫ ކައުންސިލް ހިމެނެއެވެ. އަދި ފުވައްމުލައް ސިޓީ ކައުންސިލް މެދު ދާއިރާއާއި، މާލެ ސިޓީ ގަލޮޅު ދެކުނު ދާއިރާއާއި، އއ.އަތޮޅު މަތިވެރި ކައުންސިލާއި، ށ.އަތޮޅު ކައުންސިލް މިލަންދޫ ދާއިރާއާއި، ށ.އަތޮޅު ކައުންސިލް ކަނޑިތީމް ދާއިރާއާއި، ގދ.އަތޮޅު ތިނަދޫ ކައުންސިލްގެ އިތުރުން ފ.އަތޮޅު ކައުންސިލް އަދި ގދ.އަތޮޅު ފިޔޯރީ ކައުންސިލާއި، ގދ.އަތޮޅު ކައުންސިލް ތިނަދޫ ދެކުނު އަދި ތިނަދޫ އުތުރު ދާއިރާއާއި، ހއ.އިހަވަންދޫ ކައުންސިލާއި، ގދ.ފަރެސްމާތޮޑާ ކައުންސިލާއި، ހއ.އަތޮޅު ހޯރަފުށި ކައުންސިލާއި، ހދ.ނޮޅިވަރަންފަރު ކައުންސިލާއި ލ.އަތޮޅު ކައުންސިލް ފޮނަދޫ ދާއިރާއެވެ.
އިލެކްޝަންސް ކޮމިޝަންގެ ސެކްރެޓަރީ ޖެނެރަލް އަޙްމަދު ޢަލީ ވިދާޅުވީ، ސެކިއުރިޓީ އުރަކަނޑަން ނިންމީ އެ ޝީޓުތަކުގައި އިދާރީ މައްސަލަތަކެއް ހުރެގެންކަމަށާއި، ނަތީޖާއަށް ބަދަލު އަންނާނެފަދަ މައްސަލައެއް ފާހަގަނުކުރެވޭކަމަށެވެ.
އިންތިޚާބުގައި އަށްހާސް ފަސް ސަތޭކައަށްވުރެ ގިނަ ޝީޓު އެކޮމިޝަނުން ތައްޔާރުކޮށްފައިވެއެވެ. ނަތީޖާ ޝީޓުތަކުގައި މައްސަލަހުރި ފޮށިތައް ކަނޑާފައިވަނީ ކެނޑިޑޭޓުންނާއި، ކެނޑިޑޭޓުންގެ މަންދޫބުން އަދި އޮބްޒާވަރުންނާއި މޮނިޓަރުންގެ ހާޒިރުގައެވެ.