ކޮރަޕްޝަންގެ ޢަމަލުތައް ހުއްޓުވުމާ ގުޅޭގޮތުން ޤައުމީ ފެންވަރުގައި މަޝްވަރާކޮށް ގޮތްތަކެއް ނިންމެވުމައްޓަކައި "އެންޓި-ކޮރަޕްޝަން ޤައުމީ މަހާސިންތާ" ގެ ނަމުގައި ޚާއްޞަ މާހާސިންތާއެއް އިފްތިތާޙްކޮށްދެއްވައިފިއެވެ.
މިމަހާސިންތާ އިފްތިތާޙްކޮށްދެއްވީ ރައީސުލްޖުމްހޫރިއްޔާގެ ނާއިބު ޢަބްދުﷲ ޖިހާދުއެވެ. އެންޓި-ކޮރަޕްޝަން ޤައުމީ މާހާސިންތާއަކީ، ކޮރަޕްޝަންގެ ޢަމަލުތައް ހުއްޓުވައި ކޮރަޕްޝަންގެ ޢަމަލުތަކުން ގެއްލިގެންދާ މުދަލާއި ފައިސާ އަލުން އަނބުރާ ދައުލަތަށް ހޯއްދެވުމާއެކު، ކޮރަޕްޝަންގެ ޢަމަލުތައް ހިންގާ ފަރާތްތަކާމެދު ހަމަހަމަކަމާ އިންސާފުވެރިކަމާއެކު ފިޔަވަޅު އެޅުމުގައި ކުރިމަތިވާ ގޮންޖެހުންތައް ތިލަކޮށް، އެންމެން ގުޅިގެން މަސައްކަތްކުރުމަށް ބާއްވަވާ ޤައުމީ ފެންވަރުގެ މަހާސިންތާއެކެވެ.
މި ރަސްމިއްޔާތުގައި ވާހަކަފުޅު ދައްކަވަމުން އެންޓި ކޮރަޕްޝަން ކޮމިޝަނުގެ ރައީސް ޙަސަން ލުޠުފީ ވިދާޅުވީ، ކޮރަޕްޝަން ހުއްޓުވުމަށްޓަކައި އެ ކޮމިޝަނުން ކުރައްވާ މަސައްކަތްތަކަށް ބައެއް ފަރާތްތަކުގެ ފާޑުކިއުންތައް އަމާޒުވިނަމަވެސް، އެ މަސައްކަތައް ކުރައްވަނީ، ޤާނޫނީ އިމުގެ ތެރެއިން ކަމަށެވެ. އަދި މިއަހަރުގެ މިހާތަނަށްވެސް އޭ.ސީސީން ކުރައްވާފައިވާ މަސައްކަތުން އެކަން ފެންނާނެ ކަމަށާއި، ވަކި މީހަކަށް ނުވަތަ ވަކި ފަރުދަކަށް ވީތީ ކޮރޮޕްޝަންގެ މައްސަލައެއް ނުބައްލަވައި ދޫކޮށްލައްވާފައި ނޯންނާނެ ކަމަށް ވިދާޅުވިއެވެ. ޚިޔާނާތެއްކަމަށް ތުހުމަތުކުރެވޭ ކޮންމެ މައްސަލައެއްވެސް އޭ.ސީ.ސީން ތަޙްޤީޤު ކުރައްވާނެ ކަމަށް ޙަސަން ލުޠުވީ ވިދާޅުވިއެވެ.
އިސްލާމީ ޔުނިވަރސިޓީއާ ގުޅިގެން ޕީ.އެސް.އެމްއާއި، ފެނަކަ ކޯޕަރޭޝަނާއި، އެއަރޕޯޓްސް ކޮންޕެނީ އެމް.ޑަބްލިޔު.އެސް.ސީއާއެކު، ފެއްޓެވި އެންޓި-ކޮރަޕްޝަން ޤައުމީ މާހާސިންތާގައި، ކޮރަޕްޝަނާ ދެކޮޅަށް މަސައްކަތް ކުރުމުގެ މުހިއްމުކަން ފާހަގަކުރައްވައި ވާހަކަފުޅުދައްކަވަމުން އިސްލާމީ ޔުނިވަރސިޓީގެ ޗާންސެލަރ ޑރ. މުޙައްމަދު ޝާހީމް ޢަލީ ސަޢީދު ވިދާޅުވީ، މި މަހާސިންތާގެ ނިންމުންތައް މީޑިއާގެ ޒަރީޢާއިން އެންމެހާ ފަރާތްތަކަށް ފޯރުކޮށްދެއްވުމާއި، ޕަބްލިޝްކުރުންވެސް މުހިއްމު ކަމަށެވެ. މަހާސިންތާ ނިމިގެންދާއިރު މުހިއްމު މަޝްވަރާތަކެއް ކުރައްވައި ފައިދާކުރުވަނިވި ކަންތައްތަކެއް ނިންމުން މުހިއްމު ކަމަށާއި، އެކަމުގެ އިންމީދު އެބްއޮތް ކަމަށް ޝަހީމް ވަނީ ފާހަގަކުރައްވާފައެވެ.
ދެ ދުވަހުގެ މި މަހާސިންތާގައި ބައިވެރިންގެ ވިސްނުން ކޮރަޕްޝަނާ ދެކޮޅަށް އެއްވިސްނުމަކަށް ގެނެސްދިނުމަށްޓަކައި، އޭސީސީގެ ފަރާތުން މިއަދުގެ ކޮރަޕްޝަންގެ ޙާލަތާ ބެހޭގޮތުންނާއި، އެކަމަށް ޙައްލު ހޯދުމަށް ތައްޔާރުކުރެވެމުންދާ ނޭޝަނަލް އިންޓެގްރިޓީ ޕްލޭނާއި، ކޮރަޕްޝަން ހުއްޓުވުމަށް ހިންގަވާ ޙަރަކާތްތަކުގެ މައްޗަށް ތަފްޞީލީ ކަރުދާހެއް ހުށަހަޅުއްވާނެއެވެ.
މި މަހާސިންތާގައި އެޓަރނީ ޖެނެރަލްގެ އޮފީހާއި، މޯލްޑިވްސް ޕޮލިސް ސަރވިސްއާއި، އޮޑިޓަރ ޖެނެރަލްގެ އޮފީހާއި، މޯލްޑިވްސް މަނިޓަރީ އޮތޯރިޓީގެ ފަރާތުންވެސް ކަރުދާސް ހުށައަޅުއްވާނެއެވެ.
"އެންޓި-ކޮރަޕްޝަން ޤައުމީ މަހާސިންތާ" ގެ ޑިކްލަރޭޝަން އިޢުލާނު ކުރުމާއެކު، މި މަހާސިންތާ ނިމިގެންދާނީ މުސްތަޤްބަލަށް އައު އުންމީދުތަކެއް ލިބިދީ، ނަޒާޙަތްތެރި މުޖްތަމަޢަކަށް މުއައްސަސާތަކުގެ ދައުރު އަދާކުރުމުގައި އިތުރަށް ލޯތައް ހުޅުވާލަދެމުން ކަމަށް މިކަން އިންތިޒާމްކުރައްވާ ފަރާތުން ވިދާޅުވެއެވެ.