މާލޭގައި ހުރި ބައެއް ބޮޑެތި މިސްކިތައް މިއަހަރުގެ ރަމަޟާންމަހަށް އާބާތުރަފިލުވުމުގެ މަސައްކަތް ނުކޮށްހުރީ، ރޯދަމަސް ނިމުމާއިއެކު އެ މިސްކިތްތައް ހުރި ބިމުގައި އައު މިސްކިތް ބިނާކުރުމުގެ މަސައްކަތް ފެށުމަށްޓަކައިކަމަށް އިސްލާމިކް މިނިސްޓަރ ޑރ. އަޙްމަދު ޒިޔާދު ވިދާޅުވެއްޖެއެވެ.
ރަމަޟާންމަހަށް އިސްލާމިކް މިނިސްޓްރީ ވަމުންދާ ތައްޔާރީތަށް ޕީއެސްއެމް ނިޔުސްއާއި ޙިއްސާ ކުރައްވަމުން އިސްލާމިކް މިނިސްޓަރ ވިދާޅުވީ، ރަމަޟާންމަސް ނިމުމާއިއެކު މިހާރު ހުރީ، ބައެއް ބާ މިސްކިތްތައް ތަޅާލާ އެ ތަންތަނުގައި ބޮޑެތި މިސްކިތްތައް ބިނާކުރުމަށް ހަމަޖެހިފައިވާކަމަށެވެ. ނަމަވެސް ކޮންމެހެން މަރާމަތު ކުރަންޖެހޭ މިސްކިތްތަކުގެ އާބާތުރަ ފިލުވުމުގެ މަސައްކަތް ކުރަމުންދާ ކަމަށާއި އަތޮޅުތަކުގެ ކައުންސިލްތަކާއި ކުލަބް ޖަމިއްޔާތަކުންވެސް މިކަމަށް ހުށައެޅުންތައް ލިބެމުންދާކަމަށް މިނިސްޓަރ ވިދާޅުވިއެވެ. ހުށައެޅުންތައް ލިބެމުންދާވަރަކަށް މިސްކިތް މަރާމާތުކުރުމުގެ މަސައްކަތް ކުރައްވަމުންގެންދާކަމަށް މިނިސްޓަރ ވިދާޅުވިއެވެ.
އެހެން އަހަރުތަކެކޭވެސް އެއްފަދައިން މި އަހަރުގެ ރަމަޟާންމަހުވެސް ދިވެހިންގެ ހިތްތަކުގައި ދީނީ ލޯބި އަށަގެންނެވުމަށް މުހިންމު މަސައްކަތްތަކެއް ކުރައްވާކަމަށާއި، ޚާއްޞަކޮށް ރާއްޖޭން ބޭރުގައި ދިރިއުޅުއްވާ ރައްޔިތުންގެ މެދުގައި ދީނީ ލޯބި އިތުރުކުރުމަށް މުހިންމު މަސައްކަތްތަކެއް ކުރައްވާނެ ކަމަށް އިސްލާމިކް މިނިސްޓަރ ވިދާޅުވިއެވެ. އަދި އެހެން އަހަރުތަކާއި ޚިލާފަށް މިއަހަރު ތާރާވީޙު ނަމާދު އިސްވެ ކުރައްވާނީ ރާއްޖޭގެ ޙާފިޒުން ކަމަށްވެސް އިސްލާމިކް މިނިސްޓަރ ވިދާޅުވިއެވެ.