މިއަދު ކުރިއަށްދާ ކައުންސިލް އިންތިޚާބު އޮބްޒާވް ކުރުމަށްޓަކައި، ޔޫރަޕާއި، ފޯރަމް އޮފް އިލެކްޝަން މެނޭޖްމަންޓް ބޮޑީސް އޮފް ސައުތު އޭޝިއާ, ފެންބޯސާގެ ޤައުމުތަކުގެ އޮބްޒާވަރުން ޙަރަކާތްތެރިވަމުންދާކަމަށް އިލެކްޝަންސް ކޮމިޝަނުން ހާމަކުރައްވައިފިއެވެ.
ޕީއެސްއެމް ނިއުސްގައި ވާހަކަފުޅުދައްކަވަމުން އިލެކްޝަންސް ކޮމިޝަނުގެ ރައީސް އަޙްމަދު ސުލައިމާން ވިދާޅުވީ، ވޯޓުގެ ކަންކަން އިންސާފުވެރިކަމާއި މިނިވަންކަމާއިއެކު ކުރިޔަށް ގެންދިޔުމަށް ކުރަންޖެހޭ ހުރިހާކަމެއް ކޮށްފައިވާކަމަށެވެ.
ވޯޓާ ގުޅޭ އެންމެފަހުގެ މައުލޫމާތު ޕީއެސްއެމް ނިއުސްއާ ޙިއްސާކުރައްވަމުން އިލެކްޝަން ކޮމިޝަނުގެ ރައީސް ވިދާޅުވީ، މިއަދުގެ އިންތިޚާބުގެ ކަންކަން އޮބްޒާވްކުރުމަށް ފެންބޯސާގެ ޤައުމުތަކާއި ޔޫރަޕްގެ ގައުމުތަކުގެ އޮބްޒާވަރުންވެސް ޙަރަކާތްތެރިވަމުންދާކަމަށާ، މިއޮބްޒާވަރުން ރާއްޖޭގެ އެކިކަންކޮޅުތަކުގައި ވެސް ހަރަކާތްތެރިވަމުން ގެންދާކަމަށެވެ. އިއްޔެއާއި ހަމަޔަށް އެ އޮބްޒާވަރުން ދާންޖެހޭ ދިމަދިމާލަށް ފޮނުވާލެވިފައިވާކަމަށާއި، ފަރުދީ ޒިންމާ އަދާކޮށް ކެންޑިޑޭޓުންގެ ޙައްޤުތައް ފުރިހަމައަށް އަދާކުރުމަށް ހުރިހާ ބޭފުޅުންވެސް ވޯޓްލުމަށް ނިކުމެވަޑައިގަތުމަށް އިލެކްޝަން ކޮމިޝަންގެ ރައީސް ގޮވާލެއްވިއެވެ.
ލޯކަލް ކައުންސިލްތަކުގެ ޤާނޫނުގެ ދަށުން މިއަދު ބާއްވާ ލޯކަލް ކައުންސިލްތަކުގެ އިންތިޚާބަކީ މިގޮތަށް ބާއްވާ ތިންވަނަ އިންތިޚާބެވެ. މިއަހަރު މި އިންތިޚާބަށް ވޯޓު ދިނުމުގެ ހައްޤު ލިބިފައިވާ ދުއިސައްތަ ފަންސާސް ފަސްހާސް، ނުވަސަތޭކަ އަށްޑިހަ ހަތް މީހުން ތިބިއިރު، މިއަހަރުގެ ކައުންސިލް އިންތިޚާބަށް، އެއްހާސް ހަތަރުސަތޭކަ އަށްޑިހަ ހަތް، ކެންޑިޑޭޓަކު ވަނީ ކުރިމަތިލާފައެވެ.