މޯލްޑިވްސް މާރކެޓިން އެންޑް ޕަބްލިކް ރިލޭޝަން ކޯޕަރޭޝަންގެ ޚިޔާނާތުގެ މައްސަލަ ރައްދުވާ ބައެއް މީހުން ރާއްޖޭގައި ނެތުމުން ތަޙްޤީޤަށް އެމީހުންގެ ބަހެއް ނުލިބުނުނަމަވެސް އެ މައްސަލައިގެ ރިޕޯޓް މިމަހު ޢާއްމުކުރައްވާނެކަމަށް އެންޓިކޮރަޕްޝަން ކޮމިޝަނުން ވިދާޅުވެއްޖެއެވެ.
އެންޓި-ކޮރަޕްޝަން ކޮމިޝަންގެ ރައީސް ޙަސަން ލުޠުފީ ވިދާޅުވީ، އެމް.އެމް.ޕީ.އާރް.ސީގެ ޚިޔާނުގެ މައްސަލަ ރައްދުވާ ބައެއް މީހުން ދިރިއުޅެމުން ގެންދަނީ ރާއްޖެއިން ބޭރުގައިކަމަށާއި މިހާތަނަށް ކުރި މަސައްކަތުން ތަޙުޤީޤަށް އެ މީހުންގެ އެއްވެސް ބަހެއް ލިބިފައިނުވާކަމަށެވެ. މައްސަލަ ރައްދުވާ ފަރާތްތަކުގެ ބަހެއް ތަޙްޤީޤަށް ނުލިބުނުނަމަވެސް މައްސަލަ ނިންމަވައި އެ ރިޕޯޓް މިމަހު ޢާންމުކުރައްވާނެކަމަށް ލުޠުފީ ވިދާޅުވިއެވެ. މައްސަލައިގެ ބާވަތުން މަޢުލޫމާތު ހޯދަން އެހާ ފަސޭހަ ނުވިނަމަވެސް އެމްއެމްޕީއާރުސީގެ ޚިޔާނާތުގެ ތަޙުޤީޤު ކުރިއަށްދާ ސްޕީޑް އަވަސްކަމަށް ލުޠުފީ ވިދާޅުވިއެވެ.
އެމް.އެމް.ޕީ.އާރް.ސީގެ ތަޙުޤީޤަށް އޭސީސީން ވަނީ 9 ބޭފުޅުންގެ ޚާއްޞަ ޓީމެއް އެކުލަވާލައްވާފައެވެ. ތަޙުޤީޤުގެ ހުރިހާ މަސައްކަތެއް ކުރިއަށް ގެންދަނީވެސް އެޓީމުންނެވެ.
އޭސީސީން ކުރިން ވިދާޅުވެފައިވަނީ، އޮޑިޓް އޮފީހުން ޢާއްމުކުރައްވާފައިވާ ފައިސާގެ ޢަދަދާއި އޭސީސީން ހޯއްދެވި މަޢުލޫމާތުން ލިބުނު ޢަދަދުގައި މާ ބޮޑު ތަފާތެއް ނެތްކަމަށެވެ. އޮޑިޓް ރިޕޯޓްގައިވާ ގޮތުން އެމް.އެމް.ޕީ.އާރް.ސީން ދައުލަތަށް ވަންނަން ޖެހޭ 1.2 ބިލިއަން ރުފިޔާ ވަނީ ގެއްލިފައެވެ.