އަންނަ މަހު ބާއްވާ ލޯކަލް ކައުންސިލްތަކުގެ އިންތިޚާބުގައި ވޯޓުލުމަށް ބޭނުންވާ ވޯޓު ކަރުދާސްތައް ޗާޕްކުރުމުގެ މަސައްކަތް މިހަފްތާގެ ބުރާސްފަތި ދުވަހުގެ ނިޔަލަށް ނިންމާލެވޭނެކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
އަންނަ މަހުގެ ހަވަނަ ދުވަހު ބާއްވާ ލޯކަލް ކައުންސިލްތަކުގެ އިންތިޚާބަށް ތައްޔާރުވުމުގެ އެންމެ ފަހުގެ މަސައްކަތްތައް އިލެކްޝަންސް ކޮމިޝަނުން ގެންދަވަނީ ކުރައްވަމުންނެވެ. އެގޮތުން މިހާރު އެންމެ ބާރަށް ކުރިއަށްދާ އެއް މަސައްކަތަކީ ވޯޓު ކަރުދާސްތައް ޕްރިންޓް ކުރުމާއި، ވޯޓަރސް ލިސްޓުގައި ކެނޑިޑޭޓުންގެ ފަރާތުން ސޮއިކުރުމުގެ މަސައްކަތެވެ.
އިލެކްޝަންސް ކޮމިޝަންގެ ޑިރެކްޓަރ ޙަސަން ޒަކަރިއްޔާ ވިދާޅުވީ، ވޯޓު ކަރުދާސްތައް ޗާރޕްކުރުމުގެ މަސައްކަތް މިހާރު ކުރަމުންދާކަމަށެވެ. އަދި އެ މަސައްކަތް އަންނަ ބުރާސްފަތިދުވަހުގެ ނިޔަލަށް ނިންމަވާ ޗާޕްކުރި ވޯޓު ކަރުދާހުގެ ޢަދަދާއި، ޗާޕްކުރި ތަނުގެ މަޢުލޫމާތު ހާމަކުރައްވާނެކަމަށެވެ.
އިލެކްޝަން ކޮމިޝަންގެ އޮފިޝަލުންނާއެކު ވޯޓްކަރުދާހާއި އިންތިހާބަށް ބޭނުންވާ އެހެނިހެން ލިޔެކިޔުންތައް މިމަހުގެ ތިރީސްވަނަދުވަހު އަތޮޅުތަކަށް ފޮނުވުމުގެ މަސައްކަތް ފަށްޓަވާނެކަމަށްވެސް ޙަސަން ވިދާޅުވިއެވެ.
ވޯޓްކަރުދާސްތައް އަތޮޅުތަކަށް ފޮނުވަން ފަށްޓަވާތާ ދެދުވެހެއްގެ ތެރޭގައި ހުރިހާ ވޯޓްލާ މަރުކަޒަކަށް ކަރުދާސް ފޮނުވާ ނިމެނޭކަމަށްވެސް ޙަސަން ވިދާޅުވިއެވެ.
"ވޯޓުލާނެ މީހުންގެ ލިސްޓާއި އިދާރީ އެހެން އެއްޗެހި، ސެކިއުރިޓީގެ ގޮތުގައި ފޮނުވަންޖެހޭ ތަކެތި ސެކިއުރިޓީއާއިއެކު މިމަހުގެ ތިރީސް ވަނަ ދުވަހު ފޮނުވުމުގެ މަސައްކަތް ފެށުމަށް ވަނީ ތާވަލްކުރެވިފައި. މިމަހުގެ ތިރީސް ވަނަ ދުވަހު ރާއްޖޭގެ ހުރިހާ ހިސާބަކަށް ވޯޓު ކަރުދާހާއި އެކު އަޅުގަނޑުމެންގެ އޮފިޝަލުން ފުލުހުންގެ ހާޟިރުގައި މިތަކެތި ފޮނުވުމުގެ މަސައްކަތް ކުރާނަން. އަޅުގަނޑުމެން ޤަބޫލްކުރަނީ ތިރީސް ވަނަ ދުވަހުން ފެށިގެން ހިނގާ ދެދުވަހުގެ ތެރޭގައި މުޅި ރާއްޖެއަށް ވޯޓު ކަރުދާސް ޑިސްޕެޗްކޮށް ނިންމާލެވޭނެ. ފާހަގަކޮށްލަން، ކަނޑައެޅިފައިވާ ތާވަލާ އެއްގޮތަށް އިންތިޚާބުގެ ކަންކަން ވަރަށް ބާރަށް އެބަ ކުރިއަށްދޭ" ޙަސަން ވިދާޅުވިއެވެ.
ސެކިއުރިޓީއާއެކު ފޮނުވަންޖެހޭ ތަކެތިފިޔަވާ ހުރިހާ ތަކެއްޗެއް އަތޮޅުތަކަށް މިހާރު ފޮނުއްވާ ނިމިފައިވާކަމަށް އިލެކްޝަން ކޮމިޝަނުން ވިދާޅުވެއެވެ. އޭގެތެރޭގައި ވޯޓު ފޮށިތަކާއި ވޯޓު ބޫތުތައް ހިމެނެއެވެ. އަންނަ މަހުގެ ހަވަނަދުވަހު ބާއްވާ ލޯކަލް ކައުންސިލް އިންތިހާބުގައި ވޯޓްލުމަށް 420 ވޯޓް ފޮށި ބަހައްޓާނެއެވެ. އޭގެތެރޭގައި ރާއްޖޭގެ ހުރިހާ ރަށެއްގެ އިތުރުން 7 ރިސޯޓާއި ތިލަފުށި ހިމެނެއެވެ. މިފަހަރުގެ އިންތިހާބުގައި ރާއްޖެއިން ބޭރުގައި ވޯޓް ފޮށި ބެހެއްޓުމަށް ހަމަޖެހިފައިވަނީ ހަމައެކަނި ސްރީލަންކާގައެވެ. އެ ޤައުމުގައި 2 ވޯޓް ފޮށި ބެހެއްޓުމަށް އިލެކްޝަންސް ކޮމިޝަނުން ނިންމަވާފައިވެއެވެ.