ދިވެހިރާއްޖޭގެ ޤައުމީ ސަލާމަތަށް ނުރައްކާވެދާނެފަދަ އެއެވެސް ކަމަކަށް ފުރުސަތު ނުދެއްވާނެކަމަށް ޑިފެންސް މިނިސްޓަރ އާދަމް ޝަރީފް ޢުމަރު ވިދާޅުވެއްޖެއެވެ.
މިނިސްޓަރ އާދަމް ޝަރީފް ޢުމަރު މިރޭ ކުރެއްވި ޓްވީޓެއްގައި މިހެން ވިދާޅުވެފައިމިވަނީ، ރައްޔިތުންގެ މަޖިލީހުގެ ރައީސް އަބްދުﷲ މަޞީޙްގެ އިތުބާރު ނެތްކަމުގެ ވޯޓާއި ގުޅިގެން ހަމަނުޖެހުން ހިންގަން ބަޔަކު އުޅޭކަމުގެ ވާހަކަތަކެއް ފެތުރިފައިވާ ދަނޑިވަޅެއްގައެވެ.
tw:https://twitter.com/Adamshareefz/status/846036445768925188
ސަލާމަތީ ބަރުތަކުންވެސް ވަނީ މިފަދަ ރޭވުންތަކެއް ބަޔަކު ރާވާކަމުގެ ޚަބަރު ލިބިފައިވާކަން މިރޭ ހާމަކުރައްވާފައެވެ.
ވެރިކަންކުރާ ޕީ.ޕީ.އެމްގެ ޕާލިމެންޓްރީ ގްރޫޕުގެ މެންބަރުން ވިދާޅުވެފައިވަނީ ރައްޔިތުންގެ މަޖިލީހުގެ ރައީސްގެ އިތުބާރުނެތްކަމުގެ ވޯޓު ނެގުމަށް އިދިކޮޅު ފަރާތްތަކުން މަސައްކަތް ކުރަނީ، ސަރުކާރުން ރާއްޖޭގެ ތަރައްޤީއަށް، ކުރައްވާ މަސައްކަތްތައް ހުއްޓުވާލައި، ސަރުކާރަށް ޖެއްސުންކުރުމުގެ ގޮތުންކަމަށެވެ. އަދި ޤައުމުގައި އޮތް ހަމަޖެހުން ނަގާލައި، ފިތުނަފަސާދަ އުފައްދަން އިދިކޮޅު ފަރާތްތަކުން މަސައްކަތްކުރާކަމަށްވެސް ޕީޕީއެމްއިން ތުހުމަތުކުރެއެވެ.
ރައްޔިތުންގެ މަޖިލީހުގެ ރައީސް ޢަބްދުﷲ މަޞިޙުގެ އިތުބާރުނެތްކަމުގެ ވޯޓު އިދިކޮޅު ފަރާތްތަކަށް ކާމިޔާބު ނުކުރެއްވޭނެކަމަށް ޕީ.ޕީ.އެމް/އެމްޑީއޭގެ ޖޮއިންޓު ޕާލަމެންޓްރީ ގްރޫޕުން ވަނީ ވިދާޅުވެފައެވެ.