މެލޭޝިއާގެ ލިމްކޮކްވިންގް ޔުނިވަރސިޓީގެ ފަރާތުން މިހާރު ރާއްޖެ އައިސް އުޅޭ ވަފްދުގެ ބޭފުޅުންނާ އެޑިއުކޭޝަން މިނިސްޓަރ ޑރ. ޢާއިޝަތު ޝިހާމް މިއަދު ބައްދަލުކުރައްވައިފިއެވެ.
މި ބައްދަލުކުރެއްވުން ބޭއްވެވީ މިއަދު ހެނދުނު އެޑިއުކޭޝަން މިނިސްޓްރީގައެވެ. ޕީއެސްއެމްގެ ދަޢުވަތަކަށް ރާއްޖެ އައި މިވަފުދުގެ ބޭފުޅުންނާ އެޑިޔުކޭޝަން މިނިސްޓަރ ބައްދަލުކުރެއްވި ބައްދަލުވުމުގައި ޕީ.އެސް.އެމްގެ އިސްވެރިންވެސް ބައިވެރިވެވަޑައިގެންނެވިއެވެ.
މިބައްދަލުކުރެއްވުމުގައި ރާއްޖޭގެ ތަޢުލީމީ ދާއިރާ މިހާރަށްވުރެ ހަރުދަނާކުރައްވައި ތަރައްޤީކުރެއްވުމަށް މެލޭޝީއާގެ ފަރާތުން ވަކިން ޚާއްޞަގޮތެއްގައި ލިމްކޮކްވިންގް ޔުނިވަރސިޓީގެ ފަރާތުން ދޭ އެހީތެރިކަމާއި އެއްބާރުލުން ފާހަގަކުރައްވައި، އެޑިއުކޭޝަން މިނިސްޓަރ ޑރ. ޢާއިޝަތު ޝިހާމް ވަނީ އެ ޔުނިވަރސިޓީއަށް ޝުކުރު އަދާކުރައްވާފައެވެ. އަދި ޕީ.އެސް.އެމްގެ މީޑިއާ އިންސްޓިޓިއުޓްކަމުގައިވާ "މޯލްޑިވްސް މީޑިއާ އިންސްޓިޓިއުޓް" މެދުވެރިކުރައްވައި، ރާއްޖޭގެ މިޑިއާއާއި ކްރިއޭޓީވް އިންޑަސްޓްރީއަށް ބޭނުންވާ ތަޢުލީމީ ޤާބިލު ޒުވާނުން ބިނާކުރުމަށް ހުރި ފުރުޞަތުތަކާ ގުޅޭގޮތުން މެލޭޝީއާގެ ލިމްކޮކްވިންގް ޔުނިވަރސިޓީއާއި، އެޑިއުކޭޝަން މިނިސްޓަރ މަޝްވަރާކުރައްވާފައިވެއެވެ.
މެލޭޝިއާގެ ލިމްކޮކްވިންގް ޔުނިވަރސިޓީގެ ވަފްދުގައި އިސްކޮށް ހުންނެވީ އެ ޔުނިވަރސިޓީގެ ވައިސް ޕްރެޒިޑެންޓް، ބްރޭންޑް ކްރިއޭޓިވިޓީ އެންޑް ޓެލެންޓް ޑިވެލޮޕްމަންޓް، ދާތޯ ޑރ. ޓިފާނީ މެރީ ލިމްއެވެ. މެލޭޝިއާގެ ލިމްކޮކްވިންގ ޔުނިވަރސިޓީއަކީ ދުނިޔޭގެ އެންމެ މަޝްހޫރު ޔުނިވަރސިޓީތަކުގެ ލިސްޓުގެ އެންމެ ކުރީގައި ގުނާލެވޭ އެއް ޔުނިވަރސިޓީއެވެ. އެ ޔުނިވަރސިޓީގެ ކެންޕަސްތައް މެލޭޝީއާގެ އިތުރުން ދުނިޔޭގެ އެކި ކަންކޮޅުތަކުގައި ޤާއިމުކޮށްފައިވެއެވެ.