އަޙްމަދިއްޔާ އިންޓަރނޭޝަނަލް ސްކޫލުގެ ދަރިވަރުން މިހާތަނަށް ދައްކާފައިވާ ނަތީޖާއަކީ ރާއްޖޭގެ އެހެން ސްކޫލްތަކަށް ނަމޫނާއެއް ކަމަށް ހޯމް މިނިސްޓަރ އަޒްލީން އަޙްމަދު ވިދާޅުވެއްޖެއެވެ.
ހޯމް މިނިސްޓަރ މިހެން ވިދާޅުވީ އެ ސްކޫލުގެ 35 ވަނަ އަހަރީ ދުވަސް ފާހަގަކުރެއްވުމަށް ބޭއްވެވި ޚާއްސަ އެސެމްބްލީގައި ވާހަކަފުޅުދައްކަވަމުންނެވެ. އަޙްމަދިއްޔާ އިންޓަރނޭޝަނަލް ސްކޫލުގެ 35 ވަނަ އަހަރީ ދުވަސް ފާހަގަކުރެއްވުމަށް ބޭއްވެވި ޚާއްސަ އެސެމްބްލީ ޝަރަފްވެރިކޮށްދެއްވީ މިނިސްޓަރ އޮފް ހޯމް އެފެއަރޒް އަޒްލީން އަޙުމަދުއެވެ. މި އެސެމްބްލީގައި ވާހަކަފުޅުދައްކަވަމުން ހޯމް މިނިސްޓަރ ވިދާޅުވީ ޖެހިޖެހިގެން އެތައް އަހަރުތަކެއް ވަންދެން އެކެޑެމިކް ޕަރފޯމަންސް އެންމެ ރަނގަޅު ސްކޫލެއްގެ ގޮތުގައި އަހުމަދިއްޔާ ސްކޫލް ދެމިއޮތުމަކީ އިއްތިފާޤެއް ނޫންކަމަށެވެ. އަޙްމަދިއްޔާ އިންޓަރނޭޝަނަލް ސްކޫލަކީ ރާއްޖޭގެ ތަޢުލީމީ ނިޒާމަށް ވަރަށް ބޮޑު ބަދަލެއް ގެނެސްދެއްވާފައިވާ ސްކޫލެއް ކަމަށް މިނިސްޓަރ ވިދާޅުވިއެވެ. އަދި އިންޓަރނޭޝަނަލް ސްކޫލަކަށް އެ ސްކޫލް ބަދަލުވުމުގެ ކުރިންވެސް އެސްކޫލަކީ މާލޭގެ ސްކޫލްތަކުގެ ތެރެއިން އެންމެ ކުރިއަރާފައިވާ އެއް ސްކޫލްކަން މިނިސްޓަރ ފާހަގަކުރެއްވިއެވެ. img:http://s3.psmnews.mv/images/660x400/14876646752175.JPG|އަޙްމަދިއްޔާ އިންޓަރނޭޝަނަލް ސްކޫލްގެ ދަރިވަރުންތަކެއް - ފޮޓޯ: އަޙްމަދިއްޔާ އިންޓަރނޭޝަނަލް ސްކޫލް
"އަހުމަދިއްޔާ ސްކޫލުގެ ޖާގައިގެ ދަތިކަމާއި އެކުވެސް އަހުމަދިއްޔާ ސްކޫލް ހޯދަމުންދާ ކާމިޔާބީއަކީ އަޙުމަދިއްޔާ ސްކޫލުގެ މެއިން ސްޓްރީމްގެ އިތުރުން، މި ދެންނެވީ ޕްރީސްކޫލުން ފެށިގެން ސެކަންޑަރީ ހަޔަރ ސެކަންޑަރީގެ އިތުރުން އަދި ކޮމިއުނިޓީން ދެއްވާ ރޭގަނޑުގެ ކްލާސްތަކަކީ ވެސް ޝައްކެއްނެތް ގޮތުގައި ތަޢުލީމީ ނިޒާމަށް އަހުމަދިއްޔާ ސްކޫލުން އާންމު ރައްޔިތުންނަށާއި ސްކޫލް ނިޒާމުން ފެއިލްވެފައި ނުވަތަ ސްކޫލް ނިޒާމުން ކާމިޔާބު ހާޞިލްކުރަން ބޭނުންވާ ވަރަށް ޙާޞިލް ނުކުރެވިވާ ފަރާތްތަކަށް ވަރަށް ބޮޑު ފުރުޞަތު ތަކެއް ހުޅުވިގެންދާ ކްލާސްތަކެއް." ހޯމް މިނިސްޓަރ އަޒްލީން އަޙްމަދު ވިދާޅުވިއެވެ.
މި އެސެމްބްލީގައި ވާހަކަ ދައްކަވަމުން ސްކޫލްގެ ޕްރިންސިޕަލް މުޙައްމަދު ރަޝީދު ވިދާޅުވީ އެ ސްކޫލަކީ ރާއްޖެއިން އެންމެ ގިނަ ކުދިން އޯލެވެލްގައި ބައިވެރިކޮށް ފަސް މާއްދާއިން ފާސްވާ ކުދިން އެންމެ ގިނަ ސްކޫލް ކަމަށެވެ. އަދި އެ ސްކޫލުގެ މި ކާމިޔާބީތައް ދެމެހެއްޓުމަށް އެ ސްކޫލުން އަބަދުވެސް މަސައްކަތް ކުރައްވާނެ ކަމަށް މުޙައްމަދު ރަޝީދު ވިދާޅުވިއެވެ.
މި އެސެމްބްލީގައި އެ ސްކޫލުގެ އެކި މަޤާމްތަކަށް މިއަހަރު ހޮވުނު ދަރިވަރުންނަށް ޝޭޝް ހަވާލުކޮށްފައިވެއެވެ. އެ ސްކޫލުގެ ހަޔަރ ސެކަންޑަރީ ކެޕްޓަނަކަށް ހޮވިފައިވަނީ ގްރޭޑް 12 ގެ ދަރިވަރު މާހާ މުޙައްމަދެވެ. އަދި ސެކަންޑަރީ ކެޕްޓަނަކަށް ހޮވިފައިވަނީ ގްރޭޑް 10 އެއްގެ ދަރިވަރު އަޙްމަދު މިޒާނެވެ. އަހަރީ ދުވަސް ފާހަގަކުރުމަށްޓަކައި ޚާއްސަ ބެނާއެއް އިފްތިތާޙްކޮށް އަހަރީ ދުވަހުގެ ކޭކު ފެޅުން ވެސް އެ ސްކޫލުގައި ކުރިއަށް ގެންގޮސްފައިވެއެވެ.
21 ފެބްރުއަރި 1987 ގައި މަދަރަސަތުލް އަޙްމަދިއްޔާގެ ނަމުގައި ހުޅުވުނު މި ސްކޫލް އަހުމަދިއްޔާ އިންޓަރނޭޝަނަލް ސްކޫލުގެ ނަމަށް ބަދަލުކުރައްވާފައިވަނީ 2015 ވަނަ އަހަރުގެ ޖެނުއަރީމަހުގެ 14 ވަނަ ދުވަހުއެވެ. 200 ކުދިންނާއި އެކު އުނގަންނައިދޭން ފެށި މި ސްކޫލުގައި މިހާރު ދެހާސް ފަސްސަތޭކަ އަށްވުރެ ގިނަ ދަރިވަރުން ތަޢުލީމު ހާސިލްކުރަމުންދެއެވެ.ޕްރީސްކޫލުން ފެށިގެން މަތީ ތަޢުލީމާއި ހަމައަށް ކިޔަވައިދޭ މި ސްކޫލަކީ ޘާނަވީ އަދި މަތީ ޘާނަވީ އިމްތިޙާނުތަކުގައި ވެސް ފާހަގަކޮށްލެވޭ ކާމިޔާބީތަކެއް ހޯދަމުން އަންނަ ސްކޫލެކެވެ. އެގޮތުން 2005 ވަނަ އަހަރުން ފެށިގެން ކެމްބްރިޖް އޯލެވެލް އިމްތިޙާނުން އެއް ވަނަ ސްކޫލްގެ މަޤާމް ކޮންމެ އެހަރަކު އެ ސްކޫލުން އަންނަނީ ހޯދަމުންނެވެ.