އިސްލާމިކް ޔުނިވަރސިޓީ ބިނާކުރައްވާ ވަޤުފް ބިލްޑިންގ ގެ މަސައްކަތް މިއަހަރުގެ ތެރޭގައި ފަށްޓަވާނެކަމަށް އެ ޔުނިވަރސިޓީގެ ޗާންސެލާރ މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
އައިޔޫއެމުން މިއަހަރު ކުރިއަށް ގެންދަވަން ރާއްވާފައިވާ ޙަރަކާތްތަކާ ގުޅޭގޮތުން މަޢޫލޫމާތު ދެއްވަމުން ޝަހީމް ވިދާޅުވީ ވަޤުފް ބިލްޑިންގ ބިނާކުރައްވަނީ އެޔުނިވަރސިޓީގެ ޑިވެލޮޕްމަންޓް ފަންޑުގެ ތެރެއިން ކަމަށެވެ. އަދި ޢިމާރާތަށް ބޭނުންވާ ބިން ހުޅުމާލެއިން ހަމަޖެހިފައިވާ ކަމަށާއި މި ޢިމާރާތުގެ މަސައްކަތް އަންނަ އަހަރު ނިމޭނެކަމަށް ޝަހީމް ވިދާޅުވިއެވެ.
"ޙަޤީގަތުގައި މި ޔުނިވަރސިޓީ ކޮލެޖު ދުވަސް ވަރުން ފެށިގެންވެސް ދަޢުލަތުގެ ބަޖެޓަށް ބަރޯސާވެގެން ކުރިއަށް މިދަނީ. އެއީ އަޅުގަނޑުމެން ވަރަށް ބޮޑަށް އެކަމަށް ޝުކުރުވެރިވާ އުފާކުރާ ކަމެއްވެސްމެ. އެހެންނަމަވެސް އަބަދުވެސް ޔުނިވަރސިޓީ ކޮލެޖަށް އޭގެ އަމިއްލަ ވަޞީލަތްތައް ހުންނަންޖެހޭ ލާރި ހޯދާނެ ވަޞީލަތްތައް. އެހެންވީމަ މިހާރު އިޤްތިޞޯދީ ގޮތުން ކުރިމަތިވާ ޙާލަތްތަކަށް ބަލާއިރު އަމިއްލަ ވަޞީލަތައް ހުންނަން އެބަޖެހޭ." ޝަހީމް ވިދާޅުވިއެވެ.
ވަޤުފް ބިލްޑިން ޢިމާރާތްކުރެއްވުމަށްފަހު އެތަނުން ލިބޭ ޢާމްދަނީ ހޭދަކުރައްވާނީ އިސްލާމިކް ޔުނިވަރސިޓީ ތަރައްޤީކުރެއްވުމަށާއި ސްކޮލަރޝިޕްތަކަށްކަމަށް އެޔުނިވަރސިޓީން ވިދާޅުވެއެވެ.