ފުވައްމުލައްސިޓީގެ ކުނިކޮށި އަޕްގްރޭޑްކުރެއްވުމުގެ އަމަލީ މަސައްކަތް ފަށްޓަވައިފިއެވެ.
އެންވަޔަރަމަންޓް މިނިސްޓްރީން ވިދާޅުވީ ފުވައްމުލަކުގެ ކުނިކޮށި ޒަމާނީ ފެންވަރަށް ތަރައްޤީކުރެއްވުމަށްޓަކައި، ކުނިކޮށްޓަށް އިތުރުކުރެވޭ ބަޔާއެކު އެރަށުގައި ހުރި ކުނިކޮށި އަޕްގްރޭޑްކުރުމުގެ މަސައްކަތް މިއަދު ފަށްޓަވާފައިވާ ކަމަށެވެ.
އެމްއާރުޑީސީއާއި ޙަވާލުކޮށްގެން ކުރިއަށްގެންދަވާ މިމަސައްކަތް ލަސްވެފައިވަނީ ކުނިކޮށްޓަށް އިތުރުކުރެވޭ ބައި ހިމެނޭ ސަރަޙައްދުގައި ހުރި ރުއްގަސްތަކަށް ބަދަލުދެއްވުމުގައި ދިމާވި ލަސްތަކާއި ގުޅިގެންކަމަށް އެންވަޔަރްމަންޓް މިނިސްޓްރީން ވިދާޅުވެއެވެ. އަދި ރުއްގަސްތަކަށް ބަދަލުދެއްވުމަށްފަހު ޢަމަލީ މަސައްކަތް މިއަދު ފަށްޓަވާފައިވާކަމަށް އެމިނިސްޓްރީން ވިދާޅުވެއެވެ.
ފުވައްމުލައްސިޓީގެ ކުނިކޮށި އަޕްގްރޭޑްކުރެއްވުމުގެ މަސައްކަތް ނިންމެވުމަށް ހަމަޖެހިފައިވަނީ ދެމަސް ދުވަހުގެ ތެރޭގައެވެ. މިމަޝްރޫޢަށް 2.1 މިލިއަން ރުފިޔާ ޚަރަދުވާނެކަމަށް އެންވަޔަރްމަންޓް މިނިސްޓްރީން މަޢުލޫމާތުދެއްވައެވެ.
ކުނިކޮށި އަޕްގްރޭޑްކުރުމުގެ މަސައްކަތާއެކު، ފުވައްމުލައްސިޓީގެ ރައްޔިތުންނަށް ދިމާވެފައިވާ ކުނީގެ މައްސަލައަށް ޙައްލެއް ލިބި އެރަށުގެ ކުނި ނައްތާލުމުގެ މަސައްކަތަށް އިތުރު ލުއިކަމެއް ލިބިގެންދާނެކަން އެންވަޔަރްމަންޓް މިނިސްޓްރީން ފާހަގަކުރައްވައެވެ.