ރ. އުނގޫފާރުގައި އަލަށް ޤާއިމްކުރެއްވި ޤައުމީ ޔުނިވަރސިޓީގެ އައުޓްރީޗް ސެންޓަރުގައި ޑިޕްލޮމާ އިން ނާސިންގ ކޯހެއް ފަށްޓަވައިފިއެވެ.
މިކޯހުގައި 22 ދަރިވަރުން ބައިވެރިވެފައިވާ ކަމަށް ޤައުމީ ޔުނިވަރސިޓީން ވިދާޅުވެއެވެ. މިއީ ނާރސިންގ ދާއިރާއިން މީހުން ތަމްރީނުކުރެއްވުމަށް އައުޓްރީޗް ސެންޓަރެއްގައި ފެއްޓެވި ފުރަތަމަ ކޯހެވެ. ޤައުމީ ޔުނިވަރސިޓީން ވިދާޅުވީ، މިކޯސް ހިންގަވަން ހަމަޖެހިފައިވަނީ ޤައުމީ ޔުނިވަރސިޓީއާއި އުނގޫފާރު ރީޖަނަލް ހޮސްޕިޓަލާއި މާޅޮސްމަޑުލު އުތުރުބުރީ އަތޮޅު ކައުންސިލްގެ އިދާރާއާއި އުނގޫފާރު ކައުންސިލް އިދާރާއާ ގުޅިވަޑައިގެން ކަމަށެވެ.
ކޯސް އިފްތިތާޙުކުރެއްވުމަށް އުނގޫފާރުގައި ބޭއްވެވި ރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އާދަމް ޝަރީފް ޢުމަރުއެވެ. ޑިފެންސް މިނިސްޓަރގެ ވާހަކަފުޅުގައި، ރ.އަތޮޅުގެ މުއައްސަސާތަކުން އަތޮޅުގެ ތަޢުލީމް ކުރިއެރުވުމަށް ދެއްވާ އިސްކަން ފާހަގަކުރެއްވިއެވެ. އަދި ޓެކްނޮލޮޖީގެ ބޭނުން ހިފައިގެން ގިނަ ބަޔަކަށް މަތީ ތަޢުލީމު ދެވޭނެ ގޮތްތައް ހޯދުމުގެ މުހިންމުކަމުގެ މައްޗަށް އަލިއަޅުވާލެއްވިއެވެ.
img:http://s2.psmnews.mv/images/660x400/14859342911189.jpg|އުނގޫފާރުގައި ޤާއިމްކުރައްވާފައިވާ އެމްއެންޔޫގެ އައުޓްރީޗް ސެންޓަރ / ފޮޓޯ: އެމްއެންޔޫ
މިރަސްމިއްޔާތުގައި ވާހަކަފުޅު ދައްކަވަމުން ޤައުމީ ޔުނިވަރސިޓީގެ ޗާންސެލރ ޑރ. މުޙައްމަދު ލަޠީފް ވިދާޅުވީ، ކުރިއަށް އޮތްތާނގައި ރާއްޖޭގެ އެކިއެކި ކަންކޮޅުތަކުގައި އައުޓްރީޗް ސެންޓަރުތައް ޤާއިމްކުރެއްވުމުގައި މިފަދަ ގޮތަކަށް އެކި ފަރާތްތަކާ ގުޅިގެން މަތީ ތަޢުލީމްގެ ފުރުޞަތުތައް ފުޅާކުރުމަށް މަސައްކަތްކުރައްވާނެކަމަށެވެ.
ރާއްޖޭގެ ޞިއްޙީ ދާއިރާއަށް ބޭނުންވާ ތިންހާސް ނަރުހުން ތަމްރީނުކުރެއްވުމަށް ހެލްތް މިނިސްޓްރީއާއި ޤައުމީ ޔުނިވަރސިޓީއާ ދެމެދު ވަނީ އެއްބަސްވުމެއްގައި ސޮއިކުރައްވާފައެވެ.