އައްޑޫސިޓީއަށް އައި އެންމެ ބޮޑު އެއް ކުރިއެރުމަކީ އެސިޓީގައި ރާއްޖޭގެ އެންމެ ފުރިހަމަ ދަތުރުފަތުރުގެ ނިޒާމް ޤާއިމްކުރައްވާފައިވުމެވެ.
އައްޑޫ ސިޓީގެ ގުޅިފައިވާ ރަށްތަކުގައި ދުވާލަކު އެވްރެޖުކޮށް 600 މީހުން ބަހުގެ ޚިދުމަތް ހޯދައެވެ. މާލެ ފިޔަވައި ރާއްޖޭގެ އެންމެ ބޮޑު އާބާދީއެއް އޮތް ސަރަޙައްދަކީ އައްޑޫސިޓީ އާއި ފުވައްމުލައްސިޓީއެވެ. މިއީ ބިމުގެ ގޮތުން ބޮޑު އަދި ގުޅިފައިވާ ރަށްތައް ގިނަ ސަރަޙައްދެކެވެ. ރާއްޖޭގެ އެހެނިހެން ސަރަޙައްދުތަކާ ޚިލާފަށް ދަތުރުފަތުރުގެ ހަރުދަނާ ނިޒާމެއްގެ ބޭނުން އެންމެ ބޮޑަށް ޖެހިފައި އޮތް އެއް ސަރަޙައްދަކީވެސް މިއީއެވެ. މީގެ ކުރިންވެސް އައްޑޫގެ ގުޅިފައިވާ ރަށްތަކުގައި ބަހުގެ ޚިދުމަތް ދެމުން ގެންދިއެވެ. އެހެންނަމަވެސް އެ ޚިދުމަތުގެ ފެންވަރު ދަށްވަމުންގޮސް މުޅިން ހުއްޓުމަކަށް އައެވެ. ސަބަބަކީ ދަތުރުފަތުރަށް ރައްޔިތުން ބޮޑު ހޭދައެއް ކުރަންޖެހުމެވެ.
ނަމަވެސް މޯލްޑިވްސް ޕޯޓްސްލިމިޓެޑް(އެމްޕީއެލް)އިން މި ސަރަހައްދުގައި ފެށި ބަހާއި ލޯންޗާއި، ފެރީގެ ޚިދުމަތާއި އެކު މިސަރަޙައްދުގެ ދަތުރުފަތުރަށް ރައްޔިތުންގެ ޖީބުން ކުރަންޖެހޭ ޚަރަދު މިވަނީ ވަރަށްބޮޑަށް ކުޑަވެފައެވެ. އައްޑޫ ސީޓީގެ ރައްޔިތުން އެއް ރަށުން އަނެއް ރަށަށް ދަތުރުފަތުރުކުރުމަށް ކުރިން 200 އާއި 500 އާ ދެމެދުގެ އަގެއް ދައްކަމުން އައިނަމަވެސް، މިހާރު އެޢަދަދު ވަނީ އެތައް ގުނައެއް ކުޑަވެފައެވެ. މިހާރު ހޭދަކުރަންޖެހެނީ ދިހަ ރުފިޔާއާއި ވިހި ރުފިޔާއާއި ދެމެދުގެ މިންވަރެކެވެ.
އައްޑޫގެ ގުޅިފައިވާ ރަށްތަކުގައި ޤާއިމުކޮށްފައިވާ އެއްގަމު ދަތުރުފަތުރުގެ ނިޒާމުގައި ބޭނުންކުރުމަށް، ފަންސާސް ގޮނޑިއާއި ތިރީސް ގޮނޑީގެ ޖުމްލަ ނުވަ ބަސް އޮވެއެވެ. އަދި ވަކިން އޮންނަ ހުޅުމީދޫގައި ތިރީސް މީހުންގެ ދެ ބަސް ބޭނުންކުރެއެވެ. މި ބަސްތަކުގައި ދުވާލަކު އެވްރެޖުކޮށް 600 މީހުން އެކި ތންތަނަށް ދަތުރުކުރެއެވެ. މި ސަރަހައްދުގައި ޚިދުމަތް ދެމުން އަންނަ ބަސްތަކަކީ ފެންވަރު ރަނގަޅު ޖާގަ ތަނަވަސް ބަސްތަކެއްކަން ފާހަގަކޮށްލެވެއެވެ. އެސީ ކޮށްފައިވާ މިބަސްތަކުގައި ޓީވީގެ ޚިދުމަތްވެސް ލިބެއެވެ. މިމަސައްކަތް ކުރުމަށް އެމް.ޕީ.އެލުންވަނީ ސަދަން ޓްރާންސްޕޯޓް ލިންކް (އެސްޓީއެލް)ގެ ނަމުގައި ޚާއްސަ ޑިވިޝަނެއް އުފައްދާފައެވެ.
އެސްޓީއެލްގެ ޖެނެރަލް މެނޭޖަރ މުޙައްމަދު ޝަފީޢު ވިދާޅުވީ، މި ސަރަޙައްދުގައި ދަތުރުފަތުގެ ޚިދުމަތް ދެމުން އަންނަނީ އަދި ގެއްލުމުގައި ނަމަވެސް މީ ރައްޔިތުންނަށް ކޮންމެހެން ފޯރުކޮށްދޭންޖެހޭ ޚިދުމަތެއް ކަމުގައި ދެކޭކަމަށެވެ. އަދި މި ޚިދުމަތް ތަރައްޤީކުރުމަށް ކުރަމުންދާ މަސައްކަތުގެ ތެރެއިން، މިހާރު ހުރި ބަސް ސްޓޮޕްތަކުގައި މިއަހަރުގެ މެދެއްހާ ހިސާބުގައި ބަސް ސްޓޭންޑް ޤާއިމުކުރައްވާނެކަމަށްވެސް ޝަފީއު ވިދާޅުވިއެވެ. ކަނޑުދަތުރުފަތުރަށް ބަލާއިރު ހުޅުމީދޫން އައްޑޫގެ ގުޅިފައިވާ ރަށްތަކަށް ދުވާލަކު 2 ފެރީގެ ޚިދުމަތް ދެމުން އަންނައިރު 2 ލޯންޗުވެސް މި ދެތެރޭ ދަތުރުކުރެއެވެ.
ފުވައްމުލަކަށް ހަފްތާއަކު 4 ދަތުރުކުރާއިރު، މި ޚިދުމަތަށް ބޭނުންކުރާ ލޯންޗުތަކަކީވެސް ފެންވަރު ރަނގަޅު ޖާގަ ތަނަވަސް ލޯންޗުތަކެކެވެ. ދަތުރުފަތުރުގެ ނިޒާމާއެކު މި ސަރަޙައްދުގައި ވަޒީފާގެ އެތައް ފުރުޞަތުތަކެއް ތަނަވަސްވެގެންގޮސްފައިވެއެވެ. މިގޮތުން މިގޮތުން ސަތޭކަ ފަންސަހަށްވުރެ ގިނަ މުވައްޒަފުން މި މަސައްކަތުގައި ހަރަކާތްތެރިވެއެވެ. އައްޑޫ ސިޓީގައި ޤާއިމުކޮށްފައިވާ ފެރީ ޓަރމިނަލްގައިވެސް ތަފާތު ގިނަ ޚިދުމަތްތަކެއް މިހާރު ދެމުންއާދެއެވެ. އެގޮތުން މިތަނުގައި ޓަކްޝޮޕާއި ރެސްޓޯރަންޓުގެ ޚިދުމަތްވެސް ވަރަށް އަވަހަށް ފަށްޓަވާނެކަމަށް ޝަފީޢު ވިދާޅުވިއެވެ.
ފެރީގެ ޚިދުމަތަށްވެސް ބޮޑު ތަރުހީބެއް ލިބެމުން އަންނައިރު މި ސަރަހައްދުގެ ރައްޔިތުން ތިބީ ވަރަށް ހިތްހަމަޖެހިފައި. ފެރީ ނޯންނަ ގަޑިތަކުގައިވެސް ޢާންމުން ބޭނުންވެއްޖެނަމަ ކުޑަ އަގެއްގައި އެޚިދުމަތް ދެމުން އަންނަކަން ފާހަގަކޮށްލެވެއެވެ.
އެމްޕީއެލްގެ ތަފާސް ހިސާބުތަކަށް ބަލާއިރު، ބަހުގެ ޚިދުމަތް ފެށި ތާރީޚުން ފެށިގެން މިހާތަނަށް 67000 އަށްވުރެ ގިނަ މީހުން އެ ޚިދުމަތް ހޯދާފައިވެއެވެ. އަދި ފެރީ ދަތުރުގެ ޚިދުމަތް ފުވައްމުލަކުން އަށްހާހަށް ވުރެ ގިނަ މީހުން ހޯދާފައިވާއިރު، ހުޅުމީދޫން ފަސްދޮޅަސް ތިން ހާހަށްވުރެ ގިނަ މީހުން މި ޚިދުމަތް ހޯދާފައިވެއެވެ.