ހުޅުމާލޭގައި އިންޑިއާގެ އާރް.ޕީ.ޕީ ގްރޫޕްއިން ތަރައްޤީކުރާ އެޕާޓްމަންޓްތަކުގެ ޢަމަލީ މަސައްކަތް ފަށައިފިއެވެ. މި ހައުސިންގ ޔުނިޓްގެ މަސައްކަތްތައް އަންނަ އަހަރުގެ އޭޕްރިލަށް ނިންމުމަށް އެކުންފުނިން ދަނީ މަސައްކަތް ކުރަމުންނެވެ.
ބޯހިޔާވަހިކަން ފޯރުކޮށްދިނުމަށް ސަރުކާރުން ގެންގުޅުއްވާ ސިޔާސަތުގެ ދަށުން އެކި ފަންތީގެ ފްލެޓްތައް ހުޅުމާލޭގައި ދަނީ ތަރައްޤީ ކުރަމުންނެވެ. މިގޮތުން 7،000 ހައުސިންގ ޔުނިޓްތައް ޢިމާރާތްކުރުމުގެ މަސައްކަތް ސަރުކާރުން ވަނީ ރާއްޖެއާއި ރާއްޖެއިން ބޭރުގެ އަމިއްލަ ކުންފުނިތަކާއި ޙަވާލުކުރައްވާފައެވެ. މިގޮތުން އިންޑިޔާގެ ކުންފުންޏަކާއި ޙަވާލުކުރައްވައިގެން ހުޅުމާލޭގައި ކުރިޔަށް ގެންދަވާ މަޝްރޫއު ފާހަގަކޮށްލެވެއެވެ.
"ރެނާޓަސް އިތާ މުތް" މިނަމުގައި އިންޑިޔާގެ އާރް.ޕީ.ޕީ ގްރޫޕްއިން ކުރިއަށްގެންދާ ޕްރޮޖެކްޓަކީ މިކްސްޑް ޔޫސް ރެޒިޑެންޝަލް ކޮމްޕްލެކްސްއެކެވެ. މި މަޝްރޫޢޫގެ ދަށުން ހުޅުމާލޭގައި ލަގްޒަރީ ފެންވަރުގެ 72 އެޕާޓްމަންޓް ތަރައްޤީކުރެވޭނެއެވެ. ހުޅުމާލޭ ފެރީ ޓާރމިނަލް ކައިރީގައި ޢިމާރާތްކުރާ މިއެޕާޓްމަންޓްތަކަކީ ޒަމާނީ ފެންވަރުގެ ވަޞީލަތްތަކާއެކު ތަރައްޤީކުރާ އެޕާޓްމަންޓް ކޮމްޕްލެކްސްއެއް ކަމަށާއި، މިތަނުގައި ހަތަރު ޕެންޓްހައުސްގެ އިތުރުން އެއް ކޮޓަރި، ދެ ކޮޓަރި އަދި 3 ކޮޓަރީގެ އެޕާޓްމަންޓްތައް ހުންނާނެކަމަށް އާރް.ޕީ.ޕީ ގްރޫޕުން ބުނެއެވެ.
ޕީއެސްއެމްއަށް މަޢުލޫމާތު ދެއްވަމުން އާރް.ޕީ.ޕީ ގްރޫޕުން ބުނީ އެޕާޓްމަންޓްތައް ޢިމާރާތްކުރުމުގެ ޢަމަލީ މަސައްކަތަށް ބޭނުންވާ ތަކެތި ރާއްޖެ ގެނެސް ޢަމަލީ މަސައްކަތްތައް ފަށާފައިވާ ކަމަށެވެ. މި މަސައްކަތުގައި މިހާރު ކުރިއަށްދަނީ ޢިމާރާތުގެ ފައުންޑޭޝަން އެޅުމަށް ކުރަންޖެހޭ މަސައްކަތްތަށް ކަމަށާއި، އަމާޒަކީ އަންނަ އަހަރުގެ އެޕްރީލް މަހުގެ ނިޔަލަށް މި މަޝްރޫޢުގެ މަސައްކަތް ނިންމާލުން ކަމަށެވެ.
އެކުންފުނިން ވަނީ އެޕާޓްމަންޓްތައް ބުކްކުރުމުގެ ފުރުޞަތު އާއްމުކޮށް ހުޅުވާލާފައެވެ. މިއެޕާޓްމަންޓް ކޮމްޕްލެކްސްގައި ފިޓްނަސް ކްލަބަކާއި ކުޑަކުދިންގެ ޕްލޭ ރޫމްއެއްގެ އިތުރުން އެހެނިހެން ވަޞީލަތްތައްވެސް ޤާއިމުކުރާނެ ކަމަށް އާރް.ޕީ.ޕީ ގްރޫޕުން ބުނެއެވެ.